Në vijim të një rasti të publikuar në median sociale, të dy të miturve që punojnë në ndërtim, në një subjekt privat, Avokati i Popullit ka kërkuar nga Inspektorati Shtetëror i Punës dhe Agjencia Shtetërore për të Drejtat dhe Mbrojtjen e Fëmijës inspektimin e subjektit dhe marrjen e masave për mbrojtjen e fëmijëve të përfshirë.

Punësimi i të miturve rregullohet në mënyrë strikte nga legjislacioni i Punës dhe nga detyrimet e Shqipërisë sipas Konventës për të Drejtat e Fëmijës. Institucionet përgjegjëse për zbatimin e ligjit duhet të veprojnë me urgjencën që kërkon kjo çështje dhe Avokati i Popullit pret që ato ta bëjnë këtë.

Avokati i Popullit do të monitorojë nëse autoritetet përgjegjëse i kanë përmbushur detyrimet e tyre ligjore dhe do të informojë publikun mbi konkluzionet e tij.

Kjo çështje sjell në vëmendje nevojën që Kuvendi të miratojë ligjin e ri për Avokatin e Popullit, duke e lejuar atë të hetojë edhe sektorin privat, ku shkelen të drejtat e qytetarëve.