VENDIM

Nr.480, datë 6.5.2009

PËR MBROJTJEN E VEÇANTË PERSONALE, TË  FAMILJES DHE TË PRONËS SË GJYQTARËVE DHE PËR SIGURIMIN E JETËS E TË PRONËS SË TYRE

Në mbështetje të nenit 100 të Kushtetutës, të neneve 9 e 10 të ligjit nr.9110, datë 24.7.2003 “Për organizimin dhe funksionimin e gjykatave për krime të rënda”, të nenit 24 të ligjit nr.9877, datë 18.2.2008 “Për organizimin e pushtetit gjyqësor në Republikën e Shqipërisë”, të ndryshuar, dhe të shkronjës “dh”, të nenit 4 të ligjit nr.9749, datë 4.6.2007 “Për Policinë e Shtetit”, me propozimin e Ministrit të Drejtësisë, Këshilli i Ministrave

VENDOSI:

1. Gjyqtarëve të gjykatës së shkallës së parë për krime të rënda dhe të gjykatës së apelit për krime të rënda u sigurohet mbrojtje e veçantë personale, të familjes dhe të pronës, sipas parashikimeve të këtij vendimi, kur, për shkak të detyrës, u rrezikohet jeta, familja dhe prona.

2. Me mbrojtje të veçantë personale, sipas këtij vendimi, do të kuptohen masat me karakter organizativ dhe profesional, për sigurimin dhe ruajtjen e veçantë fizike, mbrojtjen e familjes dhe të pronës së gjyqtarëve, si dhe masat e tjera, që lidhen me këtë mbrojtje.

3. Për shqyrtimin e kërkesës për sigurimin e mbrojtjes së veçantë ngrihet komisioni i posaçëm për mbrojtjen e gjyqtarëve (më poshtë “Komisioni”), i cili përbëhet nga:

a)  Një përfaqësues i Këshillit të Lartë të Drejtësisë;

b)  Një përfaqësues i Ministrisë së Drejtësisë;

c)  Një përfaqësues i Ministrisë së Brendshme;

ç)  Kryetari i Gjykatës, pranë së cilës ushtron detyrën gjyqtari, për të cilin kërkohet mbrojtje;

d)  Një përfaqësues i Drejtorisë së Përgjithshme të Policisë së Shtetit.

Kryetar i komisionit është përfaqësuesi i KLD-së. Në mungesë të kryetarit, anëtarët thirren nga personi i autorizuar prej tij, i cili kryeson mbledhjen e komisionit. Masa e shpërblimit të anëtarëve të komisionit është 5000 (pesë mijë) lekë për çdo mbledhje.

4. Kërkesa për mbrojtje të veçantë i paraqitet komisionit me shkrim nga:

a)  gjyqtari;

b)  përfaqësuesi i Policisë së Shtetit në komision ose një përfaqësues i autorizuar prej tij.

5. Kriteret, për të përfituar për mbrojtje të veçantë, janë:

a)  Kërkesa me shkrim;

b)  Prania e rrethanave serioze, që rrezikojnë jetën, familjen ose pronën e gjyqtarit;

c)  Prania e lidhjes shkakore, ndërmjet rrethanave serioze dhe ushtrimit të detyrës nga gjyqtari.

6. Kërkesa me shkrim e gjyqtarit, që kërkon mbrojtje të veçantë, duhet të përmbajë:

a)  Gjeneralitetet e plota të gjyqtarit kërkues;

b) Një përmbledhje e fakteve dhe të rrethanave, që përbëjnë rrezik serioz për gjyqtarin, të cilat e detyrojnë atë të kërkojë mbrojtje të veçantë, si dhe burimin e provave, ku bazohen ato;

c)  Llojin e masës dhe kohëzgjatjen e saj.

7. Kërkesa për mbrojtje i paraqitet KLD-së nga përfaqësuesi i Policisë së Shtetit ose përfaqësuesi i autorizuar prej tij, atëherë kur ka të dhëna të besueshme, që provojnë se një gjyqtari i rrezikohet jeta, familja ose prona. Përfaqësuesi i Policisë së Shtetit njofton menjëherë kryetarin, i cili merr masa të shpejta për mbledhjen e komisionit.

Kur rreziku ndaj gjyqtarit është serioz dhe i çastit, përfaqësuesi i Policisë së Shtetit në komision urdhëron strukturat e Policisë së Shtetit të marrin masa të menjëhershme, për të garantuar jetën, familjen ose pronën e gjyqtarit, deri në mbledhjen e komisionit. Komisioni, pas shqyrtimit të kërkesës, vlerëson masat e marra nga strukturat e Policisë së Shtetit dhe vendos, kur është rasti, për vazhdimin e mëtejshëm të tyre.

8. Kryetari, menjëherë pas marrjes së kërkesës për mbrojtje, njofton anëtarët e komisionit për mbledhjen e radhës. Komisioni duhet të mblidhet menjëherë dhe jo më vonë se 48 orë nga paraqitja e kërkesës, sipas pikës 5 të këtij vendimi. Mbledhjet e komisionit zhvillohen në ndërtesën e KLD-së. Komisioni mund të asistohet nga një sekretar, i caktuar nga përfaqësuesi i KLD-së, i cili mban procesverbalin e zhvillimit të mbledhjes.

9. Mbledhjet e komisionit janë të vlefshme kur janë të pranishëm jo më pak se katër anëtarë të tij. Vendimet janë të vlefshme kur miratohen të paktën nga tre anëtarë, të pranishëm në mbledhje. Kur numri i votave të anëtarëve pro dhe kundër është i barabartë, gjyqtari e përfiton mbrojten e veçantë.

10. Komisioni merr në shqyrtim kërkesën e paraqitur dhe, kur bindet për nevojën e sigurimit të mbrojtjes për gjyqtarin, shprehet me vendim për të. Vendimi përmban masat konkrete të mbrojtjes së veçantë, numrin e shoqëruesve personalë, kur është rasti, afatin, brenda të cilit sigurohet mbrojtja, si dhe masa të tjera, që lidhen me këtë mbrojtje. Vendimi i komisionit i njoftohet gjyqtarit nëpërmjet kryetarit të gjykatës, ku ushtron detyrën, dhe strukturave përgjegjëse për mbrojtjen, nga përfaqësuesi i Drejtorisë së Përgjithshme të Policisë së Shtetit.

11. Komisioni, me kërkesë të gjyqtarit në mbrojtje, mund të vendosë zgjatjen e afatit të masave të mbrojtjes, nëse rrethanat, për të cilët është siguruar më parë mbrojtja, vazhdojnë të ekzistojnë edhe pas përfundimit të këtij afati.

12. Sigurimi i mbrojtjes së veçantë zbatohet me kërkesë të gjyqtarit, i cili kërkon mbrojtje dhe, në rastin e gjyqtarëve të tjerë të sistemit të drejtësisë, sipas kritereve e kushteve të përcaktuara në këtë vendim.

13. Shteti siguron jetën, aftësinë për punë dhe pronën e gjyqtarëve të gjykatës së shkallës së parë për krime të rënda dhe të gjykatës së apelit për krime të rënda, nëpërmjet lidhjes së kontratave të sigurimit me shoqëritë e sigurimit, gjatë të gjithë kohës, që ata ushtrojnë detyrën. Zyra e Administrimit të Buxhetit Gjyqësor, pasi përcakton numrin e gjyqtarëve, të cilëve u sigurohet jeta, shëndeti dhe prona, lidh kontratën e sigurimit për çdo gjyqtar. Prona sigurohet nga zjarri dhe veprimet keqdashëse dhe përfshin vetëm banesën, në pronësi të gjyqtarit ose të familjarit të tij bashkëjetues.

14. Efektet financiare për zbatimin e këtij vendimi përballohen si më poshtë vijon:

a) shpenzimet operative për organizimin e mbledhjeve të komisionit të posaçëm, nga buxheti i Këshillit të Lartë të Drejtësisë.

a) Shpenzimet për lidhjen e kontratave të sigurimit nga buxheti i Zyrës së Administrimit të Buxhetit Gjyqësor.

15. Ngarkohen Ministri i Drejtësisë, Ministri i Brendshëm, Këshilli i Lartë i Drejtësisë dhe Zyra e Administrimit të Buxhetit Gjyqësor për zbatimin e këtij vendimi.

Ky vendim hyn në fuqi pas botimit në Fletoren Zyrtare.

KRYEMINISTRI

Sali Berisha