VENDIM

PËR

DISA NDRYSHIME E SHTESA NË VENDIMIN NR.306,  DATË 27.6.2002, TË KËSHILLIT TË MINISTRAVE, “PËR MIRATIMIN E STRUKTURËS DHE TË NIVELIT TË PAGAVE TË PUNONJËSVE ME ARSIM TË LARTË NË SISTEMIN E MINISTRISË SË SHËNDETËSISË DHE SPITALIN USHTARAK QENDROR UNIVERSITAR, NË SISTEMIN E MINISTRISË SË MBROJTJES”, TË NDRYSHUAR

Në mbështetje të nenit 100 të Kushtetutës, të nenit 5/1, të ligjit nr.8487, datë 13.5.1999, “Për kompetencat për caktimin e pagave të punës”, të ndryshuar, dhe të nenit 8, të ligjit nr.9836, datë 26.11.2007, “Për buxhetin e shtetit, të vitit 2008”, të ndryshuar, me propozimin me propozimin e ministrit të Brendshëm dhe të ministrit të Financave, Këshilli i Ministrave

V E N D O S I:

1. Në vendimin nr.306, datë 27.6.2002, të Këshillit të Ministrave, të ndryshuar, bëhen këto ndryshime e shtesa:

a)   Kreu 1.1, i lidhjes nr.1, “Strukura e  pagave për punonjësit me arsim të lartë në Qendrën Spitalore Universitare “Nënë Tereza”, Tiranë, Spitalin Universitar Obstetrik Gjinekologjik nr.1 e nr.2, Tiranë, Spitalin Universitar të Sëmundjeve të Mushkërive, “Shefqet Ndroqi”, Tiranë, Klinikën Stomatologjike Universitare, Tiranë, Spitalin Ushtarak Qendror Universitar, Tiranë”, zëvendësohet me kreun me të njëjtin numër dhe titull, që i bashkëlidhet këtij vendimi dhe është pjesë përbërëse e tij.

b)   Titulli i kreut 1.9, në lidhjen nr.1, që përmendet në pikën 1, të vendimit, ndryshohet, si më poshtë vijon:

“Struktura e pagave për punonjësit me arsim të lartë në Qendrën Kombëtare të Cilësisë, Sigurisë dhe Akreditimit të Institucioneve Shëndetësore dhe në Qendrën Kombëtare të Edukimit në Vazhdim, të punonjësve të shëndetësisë”.

c)      Në pikën 4 bëhen këto ndryshime:

i) Paragrafi i parë ndryshohet, si më poshtë vijon:

“Punonjësit me arsim të lartë, në sistemin shëndetësor, të cilët trajtohen me pagë, sipas lidhjes nr.1 (krerët 1.2, 1.3, 1.4, 1.5, 1.6, 1.7, 1.8, 1.9 e 1.10), si dhe punonjësit me arsim të lartë të personelit jomjekësor, që trajtohen në pagë, sipas lidhjes nr.1, kreu 1.1, përfitojnë shtesë për kualifikimin, gradën apo titullin shkencor, në masën e përcaktuar në lidhjen nr.2, që i bashkëlidhet këtij vendimi dhe është pjesë përbërëse e tij.”.

ii) Para paragrafit të fundit shtohet një paragraf, me këtë përmbajtje:

“Punonjësit e personelit mjekësor, që trajtohen me pagë, sipas lidhjes nr.1, kreu 1.1, përfitojnë shtesën për kualifikimin “Master i nivelit të dytë/studime të thelluara pasuniversitare/studime specializuese afatgjata”, sipas lidhjes nr.2 dhe kritereve të përcaktuara në shkronjën “a”.”.

ç)      Pas pikës 6/1 shtohet pika 6/2, me këtë përmbajtje:

“6/2. Shtesën për kushte pune, në masën 8 000 (tetë mijë) lekësh, që përfitojnë punonjësit e shërbimit infektiv në QSUT, e përfitojnë edhe mjekët me tituj e grada shkencore, që janë pjesë e këtij shërbimi, të cilët trajtohen me pagë me vendimin nr.1231, datë 2.7.2008, të Këshillit të Ministrave, “Për pagat e punonjësve mbështetës në institucionet buxhetore dhe të nëpunësve të disa institucioneve buxhetore”.”.

2. Efektet financiare, për paga e sigurime shoqërore, që rrjedhin nga zbatimi i këtij vendimi, të fillojnë nga data 1 korrik 2008 dhe të përballohen nga fondet e parashikuara në buxhetin e vitit 2008, miratuar për Ministrinë e Shëndetësisë.

3. Efekti financiar, për paga e sigurime shoqërore, që rrjedh nga zbatimi i këtij vendimi, për shtesën për kushte pune të punonjësve të shërbimit infektiv në QSUT, të fillojë nga data 1 janar 2009 dhe të përballohet nga fondet e parashikuara në buxhetin e shtetit, të vitit 2009, miratuar për sistemin e Ministrisë së Shëndetësisë.

Ky vendim hyn në fuqi pas botimit në "Fletoren zyrtare".

K R Y E M I N I S T R I

SALI BERISHA

24/12/2008