Nr. 15 Prot.                                                                            Tiranë, më 16/01/2003

Lënda:             Rekomandim për rritjen e objektivitetit të ekspertimeve mjeko-ligjorë.

Drejtuar:        Shërbimit Qendror të Ekspertimit mjeko-ligjor

                        Zotit  Sokrat  MEKSI

                  Për dijeni:        Ministrit të Drejtësisë

                                                          Zotit  Spiro  PEÇI

Tiranë

          Zoti Drejtor,

          Duke ju  falenderuar  për  bashkëpunimin institucional që kemi patur dhe besojmë se do të vazhdojmë të kemi në interes të zbatimit të ligjit  dhe të  mbrojtjes së të drejtave dhe lirive të njeriut;

          Për të patur gjithmonë një ekspertim mjekoligjor sa më objektiv e të kualifikuar;

          Për  të  ruajtur paanësinë e ekspertëve tuaj në rrethe nga presionet e gjithanëshme që  mund të vijnë si nga familjarët, nga zyrtarët ashtu edhe nga punonjësit e policisë,  kur këta akuzohen për dhunë gjatë kryerjes së detyrës që ka shkaktuar vdekje.

Duke   patur  parasysh  rastin  e  fundit  në  lidhje  me ekspertimin mjekoligjor të viktimës Gazmend Tahirllari;

          Në  mbështetje të pikës 3  të  nenit 63 të Kushtetutës së Republikës së Shqipërisë që thotë se  “Avokati i Popullit ka të drejtë të bëjë rekomandime dhe të propozojë masa kur  vëren  shkelje të  të drejtave dhe  lirive të njeriut nga administrata publike”, si dhe të pikës b të nenit 24 të ligjit nr.8454 dt.04.02.1999 “Për Avokatin e Popullit”

R E K O M A N D O J M E:

          Të  udhëzoni  të gjithë ekspertët mjeko ligjorë në vartësinë tuaj nëpër rrethe që në rastet  kur  nga  organet   përkatëse  ju  kërkohet  të  bëjnë  ekspertime  mjekoligjore  të viktimave  (të  vdekur)  dhe  kur për vdekjen “akuzohen” (nga prokuroria, familjarët apo Mediat)  se  punonjës  të  policisë  apo  nëpunës  të shtetit, gjatë kryerjes së detyrës tyre kanë  përdorur  dhunë,  të  vënë  në  dijeni  menjëherë  paraprakisht drejtorin e shërbimit mjekoligjor në qendër.

          Kryerja  e  ekspertimit  në  këto  raste  të  bëhet gjithmonë në prezencë dhe të një mjeku ligjor të dërguar nga qëndra.

          Duke besuar në mirëkuptimin tuaj, lutemi na ktheni përgjigje brenda 30 ditëve.

AVOKATI  I  POPULLIT

       Ermir   DOBJANI