I nderuar Z.Ministër,

Duke ju respektuar personalisht për shkak se kam bindjen se, Ju, jeni funksionar publik që e kuptoni rëndësinë e të drejtave të njeriut në shtetin ligjor dhe që keni luftuar dhe luftoni për t’i respektuar këto parime, do të dëshiroja që këtë akt të firmosur prej meje si përfaqesues i Institucionit të mbrojtjes së të drejtave të njeriut, ta interpretoni si një mesazh mirëkuptimi me interes të përbashkët.

Unë mendoj se ky interes i përbashkët është përcaktuar në Kushtetutë dhe në Ligjet përkatëse, prandaj do të ishte në nderin tuaj dhe kënaqësi për mua që marrëdhëniet e punës të ishin sa më korrekte, duke kryer sejcili detyrën e tij, pa qënë unë i detyruar t’ju kujtoj nevojën e respektimit të Kushtetutës.

Në këtë kuadër e ndjejmë të nevojshme që të mbajmë me Ju, një linjë komunikimi të vazhdueshme, e cila duhet të ketë për qëllim zgjidhjen e çështjeve me interes reciprok që kanë në themel të tyre mbrojtjen dhe garantimin e të drejtave dhe lirive themelore të individëve.

Në vijim të kësaj, më lejoni të referoj pranë Jush një çështje e cila kërkon angazhimin dhe përkushtimin Tuaj maksimal për të shmangur vonesat e mëtejshme dhe të panevojshme për një kërkesë të ligjshme të kryer prej shtetases Ardita Alsula.

Konkretisht, pranë Institucionit të Avokatit të Popullit ka paraqitur ankesë shtetësja e lartëpërmendur, në të cilën ngre shqetësimin e saj për zvarritjen dhe mosekzekutimin e Vendimit Gjyqësor Nr. 94, datë 14.07.2008 të dhënë nga Gjykata e Apelit Tiranë, sipas të cilit është lënë në fuqi Vendimi Nr. 46, datë 12.02.2008, i Komisionit të Shërbimit Civil, me të cilin është vendosur detyrimi i Ministrisë së Drejtësisë të kryej rikthimin e ankueses në vendin e mëparëshme të punës si dhe të paguaj pagën për kohën e qëndrimit pa punë.

Institucioni i Avokatit të Popullit, bazuar në kompetencat e dhëna nga Ligji Nr. 8454 datë 04.02.1999 “Për Avokatin e Popullit”, i ndryshuar, ka kërkuar shpjegime me Shkresat Nr. K2/A15-4, datë 13.02.2009 dhe Nr. K2/A15-5, datë 24.02.2009, Ministrisës së Drejtësisë,  lidhur me shkaqet e mosekzekutimit të Vendimit Gjyqësor Nr. 94, datë 14.07.2008, i cili ka lënë në fuqi Vendimin 46, datë 12.02.2008 të Komisionit të Shërbimit Civil. Marrja e informacionit të kërkuar deri më sot nuk është bërë e mundur, megjithëse procedurat për ekzekutimin e detyrueshëm kanë nisur prej Zyrës përmbarimore, Tiranë, qysh më datë 05.01.2009.

Sipas konfirmimit të kryer nga Zyra Përmbarimore, Tiranë, në Shkresën Nr. 3276 prot datë 09.03.2009, rezulton se, Ministri i Drejtësisë paraardhës, për çështjen në fjalë, është shprehur kundër ekzekutimit të këtij Vendimi Gjyqësor dhe se do të bëhet kërkesë në Gjykatë për kundërshtimin e veprimeve përmbarimore.

Në kushtet kur qëndrimi i mbajtur, ndaj detyrimit për zbatimin e Titullit Ekzekutiv Nr.46, datë 12.02.2008, nuk ka shkak ligjor që e justifikon, Institucioni i Avokatit të Popullit me Shkresën Nr. K2/A15-8, datë 26.03.2009, ka rekomanduar Zyrës Përmbarimore, Tiranë, vendosjen e sanksioneve ligjore ndaj personave që nuk kryejnë veprimet përkatëse për ekzekutimin e Titullit Ekzekutiv, konform përcaktimeve të kryera në nenin 606 si dhe kryerjen e procedurave përmbarimore sipas përcaktimeve të kryera në nenin 589 të K.Pr.C.

Konstatohet se Zyra Përmbarimore, Tiranë, deri më sot, nuk ka kryer përmbushjen e detyrimit ligjor të përcaktuar në nenin 22 të Ligjit Nr. 8454, datë 04.02.1999, “Për Avokatin e Popullit”, i ndryshuar, për kthimin e përgjigjes brenda 30 ditëve nga data e dërgimit të Rekomandimit Nr.K2/A15-8, datë 26.03.2009.

Nga analiza në tërësi e kësaj çështje, duke e vleresuar të drejtë dhe të bazuar në ligj këtë ankesë, Avokati i Popullit kërkon edhe njëherë t’ju sjellë në vëmendjen Tuaj detyrën tuaj funksionale dhe kushtetuese për mbrojtjen e të  drejtave, lirive dhe interesave të ligjshme të shtetasve, të cilat cënohen nga veprimet e parregullta e të paligjshme të organeve dhe funksionarëve të Administratës Publike, Qëndrore dhe Vendore.

 Mosrespektimi i të drejtës së ankueses brenda afatit ligjor, neglizhenca, mungesa e predispozicionit, mosimpenjimit dhe vlerësimit si duhet të këtij problemi të mprehtë social dhe ekonomik, nuk i shërben rritjes dhe përmirësimit të standarteve të shtetit ligjor, përkundrazi ndikon në mosfinalizimin e proçesit të dhënies së drejtësisë, dhe sikundër kuptohet edhe nga ankesa e mësiperme, ul autoritetin e institucionit tuaj dhe krijon premisa për humbjen e besimit ndaj dhënies së drejtësisë, duke cënuar të drejtat dhe liritë e shtetasve të mbrojtura nga Kushtetuta dhe Ligjet.

Nuk janë të pakta vendimet e Gjykatës Kushtetuese, sipas të cilave është vendosur për konstatimin e cënimit të së drejtës për një proces të rregullt ligjor si rjedhoj e mosekzekutimit të titujve ekzekutiv.

Për sa më sipër qëndrimi i derisotëm i mbajtur prej Ministrisës së Drejtësisë, është në kundërshtim me nenin 6 të Konventës Europiane për Mbrojtjen e të Drejtave dhe Lirive Themelore, në të cilën Republika e Shqipërisë ka aderuar.

Konventa e vlerëson ekzekutimin e vendimeve si pjesë përbërëse dhe të rëndësishme të një gjykimi të drejtë dhe publik, brenda një afati të arsyeshëm dhe nga një gjykatë e pavarur dhe e caktuar me ligj. Në këtë kuadër do të vinim theksin në faktin që angazhimet ndërkombëtare të Shqipërisë po bëhen gjithnjë dhe më konkrete, sidomos në planin e të drejtave të njeriut, të zbatimit të akteve juridike ndërkombetare dhe të integrimit europian. Prandaj, do të ishte një turp dhe do të cënohej rëndë autoriteti i shtetit, nëse ankuesit do të drejtoheshin pranë Gjykatës së Strasburgut kundër Shtetit Shqiptar, për një të drejtë të kësaj natyre, ndërkohë që Qeveria në programin e saj e ka konsideruar  problem të mprehtë dhe është angazhuar për ekzekutimin e vendimeve gjyqësore.

Qëndrimi i derisotëm i Ministrisës së Drejtësisë shkel nenin 142/3 të Kushtetutës së Republikës të Shqipërisë, në të cilin përcaktohet se; “Organet e  Shtetit janë të detyruar të ekzekutojnë vendimet gjyqësore”. Në këtë konteks gjejmë rastin të nënvizojmë faktin se vendimet gjyqësore të formës së prerë nuk duhen konsideruar si çështje dëshire, nuk mund të interpretohen në mënyrë subjektive nga askush, por duhen konceptuar si detyrime ligjore që duhen respektuar me përpikmëri nga të gjithë drejtuesit e institucioneve shtetërore.

Avokati i Popullit nisur vetëm nga parimi i zbatimit të ligjshmërisë,  qëllimi i mirë për përmirësimin e punës, dhe rritjes së efektivitetit në ekzekutimin e vendimeve gjyqësore të formës së prerë, si dhe për një zgjidhje ligjore të këtij problemi e çmon me vend të bëjë këtë rekomandim, duke shpresur se kështu do të ndihmojmë bashkërisht për vënien në vend të së drejtës të shkelur ankueses në fjalë. 

Për të gjitha këto arsye, në përputhje me nenin 63/3 të  Kushtetutës  së Republikës së Shqipërisë, ku përcaktohet se; “Avokati i Popullit ka të drejtë të bëjë rekomandime  dhe të propozoje masa kur konstaton shkelje të të drejtave dhe lirive nga Administrata publike”, si dhe nenit 21/b të Ligjit Nr.8454, datë 04.02.1999, i ndryshuar, i cili përcakton se ; “Avokati i Popullit paraqet rekomandime për marrje masash për vënien në vend të së drejtës së shkelur tek organi administrativ që ka shkaktuar shkeljen”.

REKOMANDOJME

Marrjen e masave për ekzekutimin sa më parë të Vendimit Gjyqësor Nr.94, datë 14.07.2008, të dhënë nga Gjykata e Apelit, Tiranë, sipas të cilit është vendosur për lënien në fuqi të Vendimit Nr.46, datë  132.02.2008, të Komisionit Shërbimit Civil.

Lidhur me veprimet që do të kryhen, lutemi konfirmoni ato brenda afatit prej 10 ditësh nga marrja dijeni e këtij rekomandimi.

Bashkëlidhur ju dërgojmë:

1-  Shkresë Nr. K2/A15-4, datë 13.02.2009, e Institucionit të Avokatit të Popullit.

2-  Shkresë Nr. K2/A15-5, datë 24.02.2009, e Institucionit të Avokatit të Popullit.

3-  Shkresë Nr. 3276, datë 09.03.2009, e Zyrës Përmbarimore, Tiranë.

4-  Shkresë Nr. K2/A15-8, datë 26.03.2009, e Institucionit të Avokatit të Popullit.

Lidhur me veprimet që do të kryhen, konform përcaktimit të kryer në nenin 19 të Ligjit Nr. 8454, datë 04.02.1999 “Për Avokatin e Popullit , i ndryshuar, me nenin 5 të Ligjit Nr. 9398, datë 12.05.2005, lutemi konfirmoni ato brenda afatit prej 10 ditësh nga marrja dijeni e këtij rekomandimi.

Duke besuar në bashkëpunimin tuaj,

                                                           Me respekt

AVOKATI  I  POPULLIT

        Ermir  DOBJANI