I nderuar Zoti Kryeministër

          Z. Ministër

          Më lejoni t’ju përshëndes për të gjithë nismat e Qeverisë Tuaj dhe veprimtarinë konkrete për përmirësimin e infrastrukturës rrugore të vendit. Por me cilësinë e Avokatit të Popullit dhe njëkohësisht të një qytetari shqiptar, dëshiroj të tërheq vëmendjen Tuaj tek një problem, të cilin pothuaj të gjithë shqiptarët dhe të huajt e ndeshin përditë në aksin rrugor Plepa-Mali i Robit, Kavajë.

          Dihet se ky aks (Durrës-Rrogozhinë) është më i ngarkuari në të gjithë vendin për shkak se është e vetmja rrugë që lidh Veriun, Tiranën e Durrësin me zonën bregdetare jugore të vendit. Për arsye të pashpjeguara, segmenti Durrës-Rrogozhinë është ndërtuar si superstradë, jo si autostradë me dy korsi, siç janë segmentet Tiranë - Durrës dhe Rrogozhinë – Lushnjë. Si rrjedhojë, tashmë në pikën e sezonit të plazhit, n.q.s. nga Tirana në Durrës vjen për rreth 30 minuta, për të përshkuar segmentin Plepa – Mali i Robit (rreth 6 km) duhen nga 30-60 minuta. Nuk dua ta dramatizoj situatën, por në mënyrë të veçantë në ditët e shtuna dhe të djela, kalimi i këtij segmenti rrugor përbën një makth të vërtetë që ta zbeh dëshirën për të shkuar në plazhet e Durrësit e Kavajës, por edhe më poshtë, në drejtim të jugut të vendit.

          Për të gjitha këto arsye, do të sugjeroja që me një vendim të veçantë të Qeverisë, të prokurohet pa tender projektimi dhe ndërtimi i këtij segmenti rrugor brenda vitit 2008. Besoj se për një segment kaq të vogël (rreth 6 km) nuk do të ishte vështirë për të gjetur financim nga buxheti i shtetit. Zgjidhja e këtij problemi që mund të duket i vogël, besoj se do t’i japë një impuls të madh edhe Turizmit. Gjithashtu më e pakta do të na kursejë të gjithëve kohën dhe stresin që na shkaktohet.

          Duke besuar në mirëkuptimin Tuaj,

                                                           Me respekt

AVOKATI  I  POPULLIT

        Ermir  DOBJANI