I nderuar zoti Ministër,

Në vijim të komunikimit tone institucional, ju informojmë se Institucioni i Avokatit të Popullit ka ndërmarrë prej kohësh inisiativën për të parë se çfarë mungesash vërehen në plotësimin e ligjeve në fuqi me aktet nënligjore që duhet të dalin në fushën e mbrojtjes.

Nga verifikimet e kryera për këtë ka dalë se në vështrim të nenit 39 të Ligjit nr.9210 datë 23.03.2004 “Për Statusin e ushtarakut” duhet të dalë një vendim Qeverie për të përcaktuar kriteret e përfitimit nga ushtarakët të së drejtës së parablerjes për objektet (bashkë me trojet funksionale), të dala të lira nga ristrukturimi i F.A. dhe që mbeten pronë e shtetit, për  nevoja për strehim. Dalja e një vendimi të tillë ishte parashikuar brenda 12 muajve nga hyrja në fuqi e këtij ligji. Por ndonëse ka një kohë të gjatë (rreth katër vjet) që ligji ka hyrë në fuqi, një vendim i tillë ende nuk ka dalë. Mos nxjerrja e aktit nënligjor është një nga shkaqet kryesore që ka çuar në mohimin e kësaj të drejte për ushtarakët aktiv dhe ata në rezervë. Theksojmë se prej vitesh ne kemi disa ankesa nga ushtarakët për këtë problem.

Prandaj për këtë çështje ne i kemi dërguar një Rekomandim Ministrisë së Mbrojtjes më date 30.05.2006 Në përgjigje të këtij rekomandimi nga ana Ministrisë sqarohet se është paraqitur në Këshillin e Ministrave projekt vendimi, por ka hasur në kundërshtimin e disa Ministrive. Këto Ministri të tjera kanë argumentuar se neni 39 i Ligjit nr. 9210, datë 23.03.2004 “Për statusin e Ushtarakut”, bie ndesh me nenin 23 të Ligjit nr. 7512 datë 10.08.1992 ”Për sanksionimin dhe mbrojtjen e pronës private, të nismës së lirë, veprimtarive private të pavarura dhe privatizimit”, ku përcaktohet se: “Kalimi i pronës shtetërore në pronë private bëhet nëpërmjet ankandit, shitjes së lirë të aksioneve, dhënies falas të aksioneve personave fizik vëndas, si dhe me çdo mënyrë tjetër të përshtatëshme”. Gjithashtu pretendohet se bie në kundërshtim edhe me nenin 28 të Ligjit  nr. 9235 datë 29.07.2004 “Për kthimin dhe kompesimin e pronës” që përcakton se: “Për tokat që janë në pronësi të shtetit, organet kompetente të administratës publike ndalohen të lidhin kontrata posedimi a pronësie me të tretë deri në përfundim të proçesit të kthimit dhe kompesimit të pronave”. Në përfundim në atë përgjigje argumentohet se miratimi i një projekt - vendimi që rregullon kriteret dhe proçedurat e fitimit të së drejtës së parablerjes nga ushtarakët e F.A., për objektet që së bashku me trojet funksionale, dalin të lira nga ristrukturimi i Forcave të Armatosura, nuk është i mundur deri në momentin e mbarimit të proçesit të kthimit dhe kompesimit të pronës.

Institucioni i avokatit të Popullit insiston në rregullimin e këtij problemi mbasi së pari nuk duhet të lejohet një boshllëk ligjor ose një gjëndje e tillë paligjëshmërie. Për këtë rast ka dy rrugë: Ose të hartohet Vendimi i Këshillit të Ministrave siç është përcaktuar në ligj, ose në të kundërt, të propozohet shfuqizimi i nenit 39 të Ligjit nr. 9210 datë 23.03.2004 “Për Statusin e Ushtarakut të Forcave të Armatosura të Republikës së Shqipërisë”. Në këtë mënyrë mund t’i jepet edhe rrugëzgjidhje ligjore problemit të qindra ushtarakëve të cilët me anën e autorizimeve të lëshuara nga Ministra e Mbrojtjes janë strehuar në objektet të cilat kanë mbetur të lira nga ristrukturimi i ushtrisë dhe ata vetë i kanë adoptuar në banesa. Por kjo gjëndje nuk është rregulluar akoma për shkak se organet e pushtetit vendor nuk i kanë cilësuar këto objekte për strehim.

Për këto arsye, në mbështetje të nenit 63 të Kushtetutës së Shqipërisë që thotë: “Avokati i Popullit ka të drejtë të bëjë rekomandime dhe të propozojë masa kur vëren shkelje të të drejtave dhe lirive të njeriut nga administrata publike” dhe të nenit 24/b të Ligjit nr.8454 datë 04.02.1999 “Për Avokatin e Popullit”, që thotë se: “kur Avokati i Popullit vëren se është vetë përmbajtja e ligjit ose e akteve të tjera normative dhe jo zbatimi i tyre shkaku që krijon premisa për shkelje të të drejtave të njeriut, të njohura nga Kushtetuta ose ligjet e tjera, ka të drejtë… t’u propozojë organeve të administratës ndryshimin ose përmirësimin e akteve nënligjore”;

R E K O M A N D O J M Ë

1.     Marrjen e masave për hartimin e draftit të Vendimit të Këshillit të Ministrave “Për kriteret e përfitimit të të drejtës së parablerjes për objektet dhe trojet që dalin të lira nga ristrukturimi i ushtrisë” dhe përcjelljen e projektit Qeverisë për miratim.

2.     Për masat e marra lutemi të njoftohemi zyrtarisht brenda 30 ditëve.

                                                           Me respekt

AVOKATI  I  POPULLIT

        Ermir  DOBJANI