I nderuar z.Ministër i Drejtësisë !

          Në institucionin tonë ka bërë ankesë shtetasi Vladimit Laze, i cili aktualisht është duke vuajtur dënimin penal në Burgun e Fushë-Krujës.Ky dënim i tij është rrjedhojë e njohjes nga Gjykata e Rrethit Gjyqësor Tiranë me vendimin e saj nr. 161 dt.03.03.2004 të vendimit nr.38 dt.06.03.2003 të Gjykatës së Shkallës së Parë Malmoe, të shtetit të Suedisë.

          Ankuesi pretendon se meqënëse ai ka plotësuar kriteret ligjore për lirim para kohe, i është drejtuar me kërkesë Gjykatës së Rrethit Gjyqësor Krujë dhe kjo gjykatë ndërmjet të tjerave i ka kërkuar edhe dëshminë e penalitetit.

Në këto rrethana të afërmit e tij kanë aplikuar duke kërkuar dëshminë e penalitetit në Drejtorinë e Përgjithshme të Burgjeve, e cila me shkresën e saj me nr.11 prot datë 14.10.2009 ka lëshuar vërtetimin përkatës. Nga ky vërtetim rezulton se shtetasi Vladimit Laze figuron i padënuar në regjistrin e gjendjes gjyqësore.

Në fakt ankuesi është i dënuar me burg dhe po vuan dënimin penal, dhe  vuajtja e dënimit të tij ka filluar me datën 13.03.2004.

          Gjithashtu nga verifikimi ynë rezultoi se ky vendim, ndonëse ka marrë formë të prerë me datën 13.03.2004, nga sekretaria gjyqësore e Gjykatës së Rrethit Gjyqësor Tiranë, nuk është plotësuar dhe nuk është dërguar buletini i dënimit në Sektorin e Gjendjes Gjyqësore në Ministrinë e Drejtësisë.  Moskryerja e këtij veprimi vjen në kundërshtim me kërkesat e nenit 19, pika 25 të Rregullores “Për organizimin dhe funksionimin e veprimtarisë së administratës gjyqësore”, të miratuar me urdhërin e Ministrit të Drejtësisë nr.1830 dt.03.04.2001, ku parashikohen detyrat e sekretarit gjyqësor në fushën penale, dhe në këtë rregullore përcaktohet se sekretari gjyqësor :“Evidenton dhe plotëson të dhënat e duhura dhe statistikën penale”.

          Mirëpo nga nga ana jonë u konstatua se, mbasi vendimi gjyqësor me nr.161 akti datë 03.03.2004 i Gjykatës së Rrethit Gjyqësor Tiranë ka marrë formë të prerë, nga sekretari gjyqësore nuk është plotësuar dhe nuk është dërguar në zyrën e gjendjes gjyqësore të Ministrisë së Drejtësisë buletini i dënimit për shtetasin Vladimit Laze, siç veprohet edhe për rastet e tjera të gjykimit të zakonshëm.

          Nga shqyrtimi i ankesës rezultoi gjithashtu se i dënuari Vladimir Laze, i është drejtuar me kërkesë për gjykim për lirim para kohe gjykatës me dt.22.07.2009 dhe dëshmia e penalitetit nga sektori i gjendjes gjyqësore është lëshuar me datën 11.11.2009, pra mbas 3 muajsh e 19 ditë.

Kjo vonesë ka ardhur kryesisht nga fakti se sekretaria gjyqësore nuk ka plotësuar dhe nuk ka dërguar në kohë buletinin e dënimit të vendimit të njohjes së vendimit të gjykatës së huaj pasi ai  ka marrë formë të prerë. Ky veprim u bë i mundur vetëm mbi ndërhyrjen e institucionit tonë duke argumentuar para gjykatës faktin se ky person aktualisht ndodhet i dënuar në burg dhe se në aktet e gjendjes gjyqësore figuron si i padënuar për shkak se nuk është plotësuar e dërguar në kohë, buletini sipas Rregullores :”Për Organizimin dhe Funksionimin e veprimtarisë së administratës gjyqësore” të miratuar nga Ministri i Drejtësisë, me urdhërin nr.1830 datë 03.04.2001.

Prandaj duke patur parasysh se në rastin konkret kjo shkelje e rregullores ndikon në cënimin e të drejtave të njeriut, dhe lë shteg për abuzim dhe veprime korruptive nga organet e administratës publike, menduam t’ua bëjmë prezentë problemin me qëllim që ky rast të analizohet dhe të merren masa e nevojshme që raste të kësaj natyre të mos përsëriten në të ardhmen.

Në këto rrethana duke u bazuar në nenin 63/3 të Kushtetutës së Republikës së Shqipërisë, ku thuhet se :”Avokati i Popullit ka të drejtë të bëjë rekomandime dhe të propozojë masa kur vëren shkeljen e të drejtave dhe lirive të njeriut nga administrata publike”, si dhe në nenin 25/ç të Ligjit nr.8454 datë 04.02.1999”Për Avokatin e Popullit”, ndryshuar me Ligjin nr.9398 datë 12.05.2005 “Për Avokatin e Popullit”, ku thuhet se :”Avokati i Popullit pranon ankesa ose njoftime për shkeljen e të drejtave të njeriut që rrjedhin nga administrata e pushtetit gjyqësor, vendimet e formës së prerë dhe proçedurat gjyqësore. Hetimi dhe kërkesa e Avokatit të Popullit nuk prekin pavarësinë e gjykatës në marrjen e vendimit,  për sa më sipër, Ju

R E K O M A N D O J M Ë :

1. Analizimin e këtij rasti për shkeljen e kryer dhe marrjen e masave të nevojshme me qëllim që shkelje të tilla të mos përsëriten më në të ardhmen.

2. Nxjerrjen e një akti nënligjor ( udhëzim apo qarkore ) për të gjitha Gjykatat e Rretheve Gjyqësore lidhur me rastet e gjykimeve të kërkesave për njohjen e vendimeve të gjykatave të huaja nga gjykatat shqiptare, që pasi vendimet të marrin formë të prerë, në çdo rast të plotësohen dhe të dërgohen menjëherë buletinet e dënimit në Sektorin e Gjendjes Gjyqësore.

Për shqyrtimin e këtij rekomandimi dhe masat që do merrni në zbatim të tij në bazë të nenit 22 të Ligjit nr.8454 datë 04.02.1999”Për Avokatin e Popullit”, lutemi të vihemi në dijeni sa më pparë por jo më vonë se 30 ditë nga marrja e tij.

Duke besuar në mirëbesimin tuaj.

                                                           Me respekt

AVOKATI  I  POPULLIT

        Ermir  DOBJANI