Te nderuar Zoterinj!

Pranë Institucionit të Avokatit të Popullit kanë paraqitur ankesa Shoqatat e ish të Përndjekurve Politikë të Shqipërisë, në të cilat pretendojnë se Ligji Nr. 9831 datë 12.11.2007 “Për dëmshpërblimin e ish të dënuarve politikë të regjimit komunist” bie në kundërshtim me Kushtetutën e Republikës së Shqipërisë, Konventën Europiane për të Drejtat e Njeriut si dhe me Rezolutën  e Këshillit të Europës për Dënimin e Krimeve të Komunizmit, në të cilat përcaktohet e drejta e viktimave të regjimit komunist për rivendosjen e drejtësisë, rehabilitimin moral e politik, dëmshpërblimin ekonomik si dhe riintegrimin real në shoqëri.

          Gjithashtu ata pretendojnë se Ministria e Drejtësisë ka miratuar disa procedura tepër të ndërlikuara dhe të vështira për t’u plotësuar dokumentacioni që u kërkohet të dënuarve politikë për të përfituar dëmshpërblimin që ju takon sipas Ligjit përkatës. Sipas tyre proçedurat e miratuara nga Ministria e Drejtësisë janë në kundërshtim jo vetëm me ligjet dhe VKM-të e miratuara për dëmshpërblimin e ish të dënuarve politikë të regjimit komunist, por ato janë edhe në kundërshtim të hapur me Ligjin Nr.9831 datë 12.11.2007.

Në lidhje me këtë çështje në Institucionin e Avokatit të Popullit kanë ardhur edhe shumë ankesa individuale nga ish të dënuarit politikë, me të njëjtat kërkesa dhe pretendime.

Duke patur parasysh nenin 2 paragrafi i dytë të Ligjit Nr.9831 datë 12.11.2007, në të cilin përcaktohet se dëmshpërblimi financiar, sipas këtij ligji, nuk përjashton marrjen e masave të tjera, të njëkohëshme ose të mëvonshme, ligjore apo administrative, në dobi të të persekutuarve e të burgosurve politikë të regjimit komunist, të cilat i shërbejnë rivendosjes së drejtësisë dhe dinjitetit shoqëror të kësaj shtrese të masakruar apo krijimit të kushteve favorizuese për riintegrimin politiko-shoqëror të tyre, Avokati i Popullit në vazhdimësi ka marrë  në shqyrtim të gjitha pretendimet e ish të dënuarve politikë, ligjet si dhe aktet nënligjore e administrative të nxjerra nga institucionet shqiptare për dëmshpërblimin e tyre.

Nga studimi dhe verifikimi i akteve ligjore dhe nënligjore të miratuara nga institucionet publike shqiptare, që kanë të bëjnë më dëmshpërblimin e ish të burgosurve dhe të persekutuarve politikë nga regjimi komunist si dhe të ankesë-kërkesave dhe pretendimeve të ish të burgosurve politikë, mendojmë se mund te kete të persekutuar politikë nga regjimi komunist qe janë përjashtuar padrejtësisht nga e drejta e dëmshpërblimit moralo-finaciar.

Pa u shprehur per te gjitha pretendimet e mesiperme, sipas te dhenave qe  disponojmë na rezulton se numri i ish të burgosurve politikë të regjimit komunist që akoma jetojnë është rreth 2 (dy) mije persona. Në këto kushte mendojmë se do të ishte mëse e arsyeshme që të beheshin përpjekje dhe të dëmshpërbleheshin menjëherë  për burgimin e padrejtë  kjo kategori e ish të burgosurve politikë të regjimit komunist të cilët  akoma janë gjallë, me pare se4 se kategorite e tjera qe perfitojne nga fakti se jane te paslindur etj, ne raport me personin e denuar politikisht.

Sa me lart, duke qene se qellimi i Ligjit te sipercituar eshte dhenia e demshperbilimit financiar per ish te denuarit politike dhe ky perfitim te gezohet edhe nga ata persona qe aktualisht jetojne, në mbështetje të pikës 3 të nenit 63 të Kushtetutës së Republikës së Shqipërisë ku thuhet se: “Avokati i Popullit ka të drejtë të bëjë rekomandime dhe të propozojë masa kur vëren shkelje të të drejtave dhe lirive të njeriut nga administrata publike”, si dhe ne baze te nenit 21/b te ligjit “Per Avokatin e Popullit”ku thuhet se : “Paraqet rekomandime per venien ne vend te se drejtes se shkelur tek organi administrativ, qe, sipas tij ka shkaktuar shkelje te te drejtave dhe lirive”,

R E K O M A N D O J M E :

Marrjen e masave per dhenien e menjehershme te demshperblimit per te denuarit politike gjate regjimit komunist qe jane deklaruar te pafajshem dhe qe aktualisht jane gjalle, me pare se sa kategorite e tjera.

Ne perputhje me nenin 22, te Ligjit Nr.8454 date 04.02.1999 “Per Avokatin e Popullit”, ku thuhet se, “Organet te cilave Avokati i Popullit u ka drejtuar nje rekomandim, duhet ta shqyrtojne rekomandimin dhe te kthejne pergjigje brenda 30 ditesh nga data e dergimit te rekomandimit”,

lutemi ta shqyrtoni dhe te na vini ne dijeni per qendrimin Tuaj ndaj ketij rekomandimi.

Duke besuar ne mirekuptimin dhe bashkepunimin Tuaj,

                                                           Me respekt

AVOKATI  I  POPULLIT

        Ermir  DOBJANI