Duke ju falenderuar paraprakisht per shpjegimet e percjella lidhur me çeshtjen e ekzekutimit te vendimit te Komisionit te Sherbimit Civil ne favor te Zj.Dolores Misha, jeni te lutur te ndiqni sa me poshte vijon, referuar shkreses tuaj te dates 24.05.2004.

            Në përgjigje te kerkeses tone, Ju na keni sqaruar se vendimi i Komisionit të Shërbimit Civil Nr.111 date 28.07.2003, eshte konsideruar si akt administrativ absolutisht i pavlefshem, pasi eshte nxjerrë në kapërcim të kompetencave që i jep ligji këtij organi dhe si të tilla ato nuk do të merren në konsideratë për t’u zbatuar.

Refuzimi për zbatimin e vendimeve të Komisionit të Shërbimit Civil, ju e keni  mbështetur në një vendim të Gjykatës së Lartë (Numër vendimi, datë, kolegj nuk specifikohet) i cili për analogji përdoret për të përligjur përgjithsimin e rasteve ku kërkesat për zbatimin e vendimeve të Komisionit të Shërbimit Civil nuk do të pranohen, duke i konsideruar të pambështetura në ligj.

          Avokati i Popullit, duke konsideruar absolutisht të padrejtë qëndrimin refuzues që mban Drejtoria e Përgjithshme e Doganave per keto raste dhe në përgjithsi për aplikimin e praktikës administrative të mësipërme, ka detyrimin ligjor t’ju parashtroje sa vijon:

          Në argumentimin tuaj ju i referoheni Kolegjit Civil të Gjykatës së Lartë, i cili në seancat gjyqësore të datave 9.03.2004 dhe 23.03.2004 ka marrë në shqyrtim çështjen civile me pale ndergjyqesa, ish punonjes te doganave, Drejtorinë e Përgjithshme të Doganave dhe Komisionin e Shërbimit Civil, me objekt të padisë kundërshtimin e vendimit administrativ për largimin nga puna. Në përfundim ky kolegj me anë të vendimit Nr.703 dt.23.03.2004 ka vendosur, pranimin e padisë së Drejtorisë së Përgjithshme të Doganave, duke anulluar Vendimin e Komisionit të Shërbimit Civil si të pabazuar në ligj.

Në pjesën arsyetuese të këtij vendimi, krahas të tjerash është analizuar kuadri ligjor që rregullon statusin e doganierit si nëpunës publik, duke u ndalur në elementët përbërës si kategoria, struktura dhe funksioni që përmbush, trajtimi i mardhënieve të punës etj. Në këtë këndvështrim, Kolegji Civil i Gjykatës së Lartë ka arritur në konkluzionin se Ligji Nr.8549 dt.11.11.1999 “Statusi i Nëpunësit Civil” nuk mund të zbatohet për doganierët e doganave të rretheve, sepse në kuptim të nenit 2 dhe 3 të këtij ligji, administrata doganore në rrethe nuk konsiderohet institucion i administratës publike të nivelit qëndror apo vendor. Gjithsesi ky interpretim i ligjit është kryer në kuadrin e zgjidhjes së një çështje konkrete dhe nuk mund të pengojë aspak zbatimin e rasteve e tjera ku vetë Kolegji Civil i Gjykatës së Lartë ka rrëzuar kërkesën e Drejtorisë së Përgjithshme të Doganave. Raste të tilla janë zbatuar pa hezitim nga Drejtoria e Përgjithshme e Doganave dhe sot ish punonjës së doganës kanë rifilluar detyrën në degët e doganave në rrethe.

Gjithashtu pjesa arsyetuese dhe dispozitivi i Vendimit Nr.703 dt.23.03.2004 i Kolegjit Civil të Gjykatës së Lartë nuk shpreh në mënyrë qarte pavlefshmërinë absolute të vendimeve të Komisionit të Shërbimit Civil, por duke marrë në analizë çështjen konkrete i ka argumentuar ato të lidhura ngushtë me zbatimin korrekt të legjislacionit në fuqi. Përveç kësaj, nuk shikohet që në vendimin e mësiperm të ketë aspekte përgjithsuese, pasi unifikimi i praktikës gjyqësore, i cili njehson qëndrimet e ndryshme të gjykatave, kryhet nga Kolegjet e Bashkuara të Gjykatës së Lartë. Për aq kohë sa Kolegjet e Bashkuara nuk do të japin një vendim unifikues ne lidhje me legjislacionin që do të aplikohet për nëpunësit e doganave, gjykatave të të gjitha niveleve ju lind e drejta të vendosin rast pas rasti për anullimin ose jo të vendimeve të Komisionit të Shërbimit Civil, që trajtojnë konflikte të largimit nga puna të doganierve.

          Krahas kësaj, vlen të përmendet se vendimi i Komisionit të Shërbimit Civil, i cili ka vendosur anullimin e vendimit të Drejtorit të Përgjithshëm të Doganave për lirimin nga detyra të Zj.Dolores Misha, nuk eshte ankimuar në shkallët e mëtejshme gjyqësore (megjithse keni marrë dijeni të rregullt për vendimet e KSHC-së) duke lënë shkak që këto vendime të marrin formë të prerë dhe të kërkohet ekzekutimi i tyre.

Në këto kushte lind e drejta të shprehemi se detyrimi juaj për ekzekutimin e vendimeve të Komisionit të Shërbimit Civil (organ i cili mbikqyr menaxhimin e shërbimit civil) nuk duhet justifikuar kurrsesi nga vendime të veçanta të Gjykatës së Lartë, të cilat në thelb i kanë dhënë zgjidhje një çështje konkrete. Përveç kësaj, Drejtoria e Përgjithshme e Doganave nuk duhet të fshehë pas një vendimi gjyqësor i nxjerre vetem ne Mars te vitit 2004, zvarritjen burokratike  të ekzekutimit të vendimeve të Komisionit të Shërbimit Civil te cilat kane ndodhur kohe me pare, thjesht duke u justifikuar dhe përgjithesuar qëndrimin e saj indiferent me një Vendim të veçantë të Kolegjit të Gjykatës së Lartë të vitit 2004, i cili eshte nominal dhe aspak detyrues per çeshtje analoge, ne mungese te nje vendimi unifikues te kesaj Gjykate.

          Në qoftë se nisemi të analizojmë pretendimin tuaj se vendimet e Komisionit te Shërbimit Civil janë absolutisht të pavlefshme dhe si të tilla nuk do të zbatohen, kemi mendimin se ky pretendim nuk gjen aspak zgjidhje ligjore nëpërmjet qëndrimit që mbani. Në bazë të nenit 117/2 paragrafi I i Kodit të Proçedurave Administrative, secila palë e interesuar në një proçedurë administrative ka të drejtë të kërkojë që akti administrativ të konstatohet absolutisht i pavlefshëm. Sipas doktrinës administrative ky konstatim mund të kërkohet në organin administrativ i cili ka nxjerrë aktin, në organin administrativ epror të organit i cili ka nxjerrë aktin dhe me anë të rrugës gjyqesore (Ref neni 331 paragrafi II i Kodit të Proçedurës Civile).

Në këtë këndvështrim, lind detyrimi që për çdo akt administrativ, për të cilin ka dyshime se përmban elementë të pavlefshmërisë absolute, kërkohet medoemos vendimmarrja konstatuese e pavlefshmërisë nga organet kompetente. Kërkesa për konstatimin e pavlefshmërisë mund të bëhët nga palët e interesuara dhe kurrsesi akti administrativ nuk mund të paragjykohet apo injorohet për zbatim paraprakisht. Si rrjedhim përmbajtja e shkresës tuaj e dates 24.05.2004 e Drejtorisë së Përgjithshme të Doganave, ku shprehet mos zbatimi i vendimeve të Komisionit të Shërbimit Civil për arsye se vetë Drejtoria e Përgjithshme e Doganave i deklaron ato absolutisht të pavlefshme është në kundërshtim me kërkesat ligjore të Kodit të Proçedurave Administrative.

Gjithsesi qëndrimi juaj është kontradiktor edhe me vetë aktivitetin e Drejtorisë së Përgjithshme të Doganave, pasi siç dihet kjo drejtori ka pranuar të ekzekutojë vendime të Komisionit të Shërbimit Civil, duke rimarrë në punë nëpunës të shkarkuar pa të drejtë. Kjo proçedurë është ndjekur dhe zbatuar vazhdimisht, madje në një rast duke pranuar edhe rekomandimin e Avokatit të Popullit për zbatimin e një vendimi të Komisionit të Shërbimit Civil.

          Në këto kushte, kemi mendimin se reflektimi ndaj legjislacionit në fuqi dhe ndaj të drejtave dhe lirive themelore të individit, do t`ju shërbejë për të ndryshuar qëndrimin tuaj në shërbim edhe të rritjes së imazhit të mirëqeverisjes së organeve shtetërore dhe te respektimit te ligjit.

Nga sa me siper, lutemi te rishikoni edhe njehere qendrimin tuaj lidhur me kete çeshtje, ne kendveshtrimin ligjor te ekspozuar me lart.

Në këto kushte, Avokati i Popullit, pasi konstaton se ndaj Zj.Dolores Misha, Drejtoria e Përgjithshme e Doganave vazhdon të shfaqë qëndrime zyrtare të parregullta e të paligjshme, të cilat kanë sjellë si pasojë mohimin e një sërë të drejtash dhe interesash të ligjshme të saj si nëpunëse civile, në mbështetje të Kushtetutës së Shqipërisë Neni 63/3 në të cilën parashikohet se: ”Avokati i Popullit ka te drejtë te bëjë rekomandime dhe te propozoje masa kur veren shkelje të të drejtave dhe lirive të njeriut nga administrata publike” si dhe në zbatim të nenit 19/b te ligjit Nr.8454 dt.4/02/1999 ”Për Avokatin e Popullit” ku parashikohet se:”Avokati i Popullit, paraqet rekomandime për venien në vend të së drejtës së shkelur tek organi administrativ që, sipas tij, ka shkaktuar shkelje të të drejtave dhe lirive”

JU  R E K O M A N D O N

            Rivënien në vend të të drejtave të mohuara ndaj Zj.Dolores Misha, duke vënë në zbatim Vendimin Nr.111 dt.28.07.2003 të Komisionit të Shërbimit Civil.

Nga ana juaj, në zbatim të nenit 22 te Ligjit Nr.8454 dt.4.02.1999 “Për Avokatin e Popullit” ku thuhet se: “Organeve, të cilave Avokati i Popullit u ka drejtuar një rekomandim, kërkesë apo propozim për shkarkim, duhet ta shqyrtojnë rekomandimin, kërkesën apo propozimin për shkarkim dhe të kthejnë përgjigje brenda 30 ditësh nga data e dërgimit të rekomandimit, kërkesës apo propozimit për shkarkim. Përgjigja duhet të përmbajë shpjegime të arsyetuara për çështjen në fjalë, si dhe çfarë veprimesh apo masash ka ndërmarrë ai organ” nevojitet të na paraqitet brenda 30 ditësh një përgjigje zyrtare e arsyetuar, lidhur me qëndrimin që do të mbani ndaj këtij rekomandimi.

           Duke besuar ne bashkepunimin dhe mirekuptimin tuaj.

                                                               AVOKATI  I  POPULLIT

         ERMIR DOBJANI