Nr.  119/1  Prot.                                         Tiranë, më 16/12/2005

Lenda:        Rekomandojmë që t’i propozoni Kuvendit ndryshimin dhe përmirësimin e përmbajtjes së nenit 86 të Kodit Penal, për veprën penale të torturës.

Drejtuar:    Ministrit të Drejtësisë

                             Z. Aldo  BUMÇI

Per dijeni:  Kryeministrit të Shqipërisë

                   Z. Sali  BERISHA

                                                                          Tiranë

            I nderuar zoti Ministër,

            Në nenin 86 të Kodit Penal të Republikës së Shqipërisë është parashikuar vepra penale e torturës. Ky nen parashikon se : “Tortura, si dhe çdo akt tjetër çnjerëzor apo poshtërues dënohen me burgim nga pesë gjer në dhjetë vjet”. Siç konstatohet lehtë, ky nen i formuluar në këtë mënyrë, nuk përkufizon se çfarë është tortura dhe nuk përputhet me përkufizimin e bërë në “Konventën kundër torturës dhe dënimeve a trajtimeve të tjera mizore, çnjërëzore ose degraduese”, miratuar nga Asambleja e Përgjithshme e Kombeve të Bashkuara, më 10 Dhjetor 1984.

Në nenin 1 të kësaj Konvente parashikohet se: “Sipas qëllimeve të kësaj Konvente, me termin “torturë” kuptohet çdo veprim, me anën e të cilit një personi i janë shkaktuar me dashje dhimbje ose vuajtje të rënda, fizike ose mendore, me synim për të marë prej tij ose prej një tjetri informata ose pohime, për ta ndëshkuar për një veprim që ai ose një person tjetër ka kryer ose dyshohet që e ka kryer, për ta frikësuar ose për të bërë presion mbi të, ose për të frikësuar a për të bërë presion mbi një person tjetër, ose për çdo motiv tjetër të bazuar në një formë të çfarëdollojshme, ku një dhimbje e tillë ose vuajtje të tilla janë shkaktuar nga një person zyrtar ose nga çdo person tjetër që vepron me titull zyrtar ose me nxitjen e tij ose me miratimin e tij të shprehur ose të heshtur. Ky term nuk përfshin dhimbjen ose vuajtjen që janë pasojë vetëm e sanksioneve të ligjshme, që janë pjesë e pandarë e këtyre sanksioneve ose janë shkaktuar prej tyre”.

            Duke e krahasuar përmbajtjen e nenit 86 të Kodit tonë Penal me përmbajtjen e nenit 1 të Konventës, rezulton se dispozita e Kodit tone Penal duhet të ndryshojë e të përmirësohet, duke u përputhur plotësisht me përmbajtjen e Konventës. Kjo domosdoshmëri parashikohet edhe në pikën 2 të nenit 1 të Konventës ku thuhet: “Ky nen nuk cënon asnjë instrument ndërkombëtar ose asnjë ligj kombëtar që përmban ose mund të përmbajë dispozita të një karakteri më të gjërë”. Kjo do të thotë që Konventa pranon dispozita më të gjëra për torturën, por kurrsesi dispozita më të ngushta siç është aktualisht në Kodin tonë Penal.

            Ky është një konkluzion dhe rekomandim i Komitetit kundër Torturës, pas paraqitjes së raportit fillestar të Republikës së Shqipërisë mbi zbatimin e Konventës kundër Torturës, që u mbajt në Gjenevë, më 10,11 maj 2005.

            Përsa më sipër, bazuar në pikën 3 të nenit 63 të Kushtetutës tonë ku thuhet se: “Avokati i Popullit ka të drejtë të bëjë rekomandime dhe të propozojë masa kur vëren shkelje të të drejtave dhe lirive të njeriut nga administrata publike”, dhe në gërmën “a” të nenit 24 të Ligjit Nr. 8454, dt. 04.02.1999 “Për Avokatin e Popullit” ku thuhet se: “Kur Avokati i Popullit vëren se është vetë përmbajtja e ligjit ose e akteve të tjera normative dhe jo zbatimi i tyre shkaku që krijon premisa për shkelje të të drejtave të njeriut, të njohura nga Kushtetuta ose ligjet e tjera, ka të drejtë: t’u rekomandojë organeve që kanë të drejtën ligjvënëse të bëjnë propozime për ndryshimin dhe përmirësimin e ligjeve” Ju;

R E K O M A N D O J M Ë

           Që t’i propozoni Kuvendit ndryshimin dhe përmirësimin e përmbajtjes së nenit 86 të Kodit Penal sipas përmbajtjes së nenit 1 të Konventës së cituar më sipër.

            Lutemi të na ktheni përgjigje lidhur me shqyrtimin e këtij rekomandimi brenda afatit ligjor prej 30 ditësh të parashikuar në nenin 22 të Ligjit “Për Avokatin e Popullit”.

            Duke besuar në mirëkuptimin tuaj,