Z. Dekan,

            Ne vijim te korespondences se zhvilluar deri tani, lidhur me ankesen e nje grupi studentesh te cilet pretendojne se duhet te zhvillojne studimet ne nivelin e dyte ne perfundim te te cilit merret Diplome e Nivelit te dyte kemi konstatuar se:

Grupi i personave, te cilet jane ankuar prane Institucionit te Avokatit te Popullit dhe, qe perfaqesojne studentet qe hyne ne greve urie, kerkojne qe te pranohen ne menyre te detyrueshme per te ndjekur studimet ne ciklin e dyte, pavarësisht mesatares qe ata kane ne përfundim te ciklit te pare te studimeve.

Bazuar ne Ligjin Nr.8454 date 04.02.1999 “Per Avokatin e Popullit” i ndryshuar, nga ana e zyres tone u ndemror nje proçes hetimi. Keshtu ne përgjigje te kerkeses tone per shpjegime, me tuajen Nr. 105 prot. Date 09.11.2009, jemi informua se :

“ Referuar Ligjit per arsimin e larte, te gjithe studentet qe shkojne ne DND, apo dhe ne MNP duhet t’u nënshtrohen, nder te tjera , dy kritereve dhe standardeve baze: Kuotave te miratuara nga Qeveria qe per rastin tone jane 100 kandidate dhe kriterit te notes mesatare, qe per rastin tone eshte 7 e larte”.

Duke analizuar qëndrimin tuaj, pretendimet e parashtruara ne ankese, dhe njekohesisht duke ju referuar akteve ligjore e nenligjore qe rregullojne kete çeshtje, kemi konstatuar se Rregullorja e Studimeve te ciklit te dyte nuk ka fuqine si nje akt administrativ. Ne menyre qe ky akt te sjell pasojat e deshiruara, nje nga kushtet e vlefshmerise eshte pikërisht miratimi i tij nga organi kompetent apo organet kompetente kur kërkohet miratimi nga dy ose me shume organe.

Ne rastin konkret na rezulton se:

Ligji nr.9741, datë 21.5.2007 “Për arsimin e lartë në Republikën e Shqipërisë” ne nenin 34 te tij, Pranimi në ciklin e dytë e në ciklin e tretë të studimeve, parashikon se:

“1. Kanë të drejtë të aplikojnë për t’u regjistruar në ciklin e dytë të studimeve individë që kanë përfunduar një program studimi të ciklit të parë, si dhe plotësojnë standardet akademike të kritereve të pranimit të institucionit respektiv.

3. Kriteret e pranimit për standardet akademike të përzgjedhjes së kandidatëve për t’u pranuar në programet e ciklit të dytë dhe të ciklit të tretë të studimeve përcaktohen në statutet e institucioneve të arsimit të lartë, bazuar dhe në rekomandimet e Këshillit të Arsimit të Lartë dhe Shkencës.

4. Kuotat e pranimit në institucionet publike të arsimit të lartë, për programet e studimeve të ciklit të dytë dhe të tretë, miratohen nga Këshilli i Ministrave me propozim të Ministrisë së Arsimit dhe Shkencës. Ministria e Arsimit dhe Shkencës formulon propozimin e saj pas konsultimit me institucionet publike të arsimit të lartë dhe rekomandimet e Këshillit të Arsimit të Lartë dhe Shkencës.

Nderkohe Neni 39 i po te njëjtit ligj parashikon se:

“3. Institucionet e arsimit të lartë dhe njësitë e tyre përbërëse rregullojnë veprimtarinë e tyre mbështetur në rregulloret e tyre të brendshme, që hartohen nga vetë institucioni në përputhje me këtë ligj dhe statutin e institucionit. Rregulloret miratohen sipas mënyrës së përcaktuar në statutin e institucionit të arsimit të lartë".

            Por çfare parashikon Statuti i Universitetit Bujqesor ?

Neni 35 i Statutit te U.Bujqesor parashikon se:

“Këshilli i Fakultetit, përveç detyrave, të cilat parashikohen në Ligjin nr. 9741, datë 21.05.2007 “Për Arsimin e Lartë në Republikën e Shqipërisë” (i ndryshuar), neni 18, ushtron dhe këto kompetenca:

a.      përpunon strategjitë për zhvillimin afatgjatë të fakultetit, përfshirë propozimin e programeve, departamenteve apo seksioneve të reja;

b.      shqyrton kurrikulat dhe planet mësimore të kurseve të studimit për të gjitha nivelet e mësimdhënies që janë nën përgjegjësinë e fakultetit;

c.       zhvillon dhe zbaton programet kërkimore;

d.      propozon zhvillimin e marrëdhënieve akademike në nivelin kombëtar dhe ndërkombëtar;

e.       krijon komisionin e zgjedhjeve në fakultet;

f.        propozon kërkesat për investime, për pajisje dhe shpenzime korrente;

g.      miraton rregulloren e fakultetit dhe ia propozon atë Rektorit;

Duke ju referuar ne vijimesi Statutit te UBT, Neni 41 parashikon se:

“Studimet e ciklit të dytë:

Ofrojnë programe studimi të cilat japin njohuri të thelluara, teorike e praktike brenda një specialiteti, realizohen me 120 kredite dhe afati kohor për realizimin e këtij cikli është dy vjet.

Kanë të drejtë të aplikojnë për t’u regjistruar në ciklin e dytë të studimeve studentët që kanë përfunduar një program studimi të ciklit të parë si dhe plotësojnë kriteret e pranimit të përcaktuara paraprakisht në Rregulloren e Fakultetit.”

            Por rregullorja e Fakultetit, e cila eshte miratuar dhe nga Rektori i Universitetit tuaj ne Neni 52 te saj parashikon se:

Pranimi në programin e DND-të

1. Kanë të drejtë të aplikojnë për t’u regjistruar në programin e studimeve të Nivelit të Dytë individët që kanë përfunduar një program studimi të Ciklit të Parë si dhe plotësojnë kriteret akademike të pranimit të përcaktuara në rregulloret e studimeve universitare të Fakultetit.

2. Kriteret akademike duhet të mbajnë parasysh meritën e kandidatëve.

3. Pranimi i kandidatëve bëhet në mbështetje të kuotave të miratuara nga Këshilli i Ministrave”

Dhe ne rastin konkret ekziston nje Rregullore e Studimeve te Ciklit te dyte e cila ne Neni 22 parashikon se:

“Pranimi në programin e DND-të

4. Kanë të drejtë të aplikojnë për t’u regjistruar në programin e studimeve të Nivelit të Dytë individët që kanë përfunduar një program studimi të Ciklit të Parë si dhe plotësojnë kriteret akademike të pranimit të përcaktuara në rregulloret e studimeve universitare të Fakultetit.

5. Kriteret akademike duhet të mbajnë parasysh meritën e kandidatëve.

6. Pranimi i kandidatëve bëhet në mbështetje të kuotave të miratuara nga Këshilli i Ministrave dhe notes mesatare te studimeve te ciklit te pare, te përcaktuara keto ne formen e aplikimit per DND nga çdo departament.

7. Ne programin e studimeve te ciklit te dyte, pranohen kandidate (pa plotësim të njohurive formuese para hyrjes në program) nga:

1. Studente te diplomuar ne ciklin e pare te studimeve ne DDA

2. Studente te diplomuar ne ciklin e pare te studimeve ne DEPA

3. Studente te diplomuar ne ciklin e pare te studimeve ne DFK

4. Studente te diplomuar ne ciklin e pare te studimeve ne Fakultete te tjera te ekonomise.

8. Nota mesatare per pranim ne programin e ciklit te dyte te studimeve eshte mbi shtate

            Pra sa me siper:

1. Ligji per Arsimin e larte e përcakton te qarte se eshte Statuti i institucionit te arsimit te larte akti qe duhet te parashikoje kriteret akademike per te vazhduar studimet ne ciklin e dyte;

2. Statuti i UBT ja jep kete kompetence Rregullores se fakultetit te Ekonomise dhe Agrobiznesit;

3. Rregullorja e Fakultetit parashikon se duhet te vendosen kriteret ne Rregulloret e studimeve universitare te Fakultetit.

4. Por pavarësisht se ekziston nje rregullore studimesh e cila parashikon kriteret, kjo nuk eshte pjese e Rregullores se fakultetit pasi nuk eshte miratuar nga Rektori siç e kerkon Statuti per rregulloren e fakultetit;

5. Statuti nuk parashikon se cfare natyre ka rregullorja e studimeve dhe si duhet te miratohet ajo;

Si konkluzion ne gjykojme se ne Rregulloren e Fakultetit te Ekonomise dhe Agrobiznesit duhet te ishte parashikuar se, “Rregulloret e Studimeve duhet te miratohen nga Rektori pasi propozohen nga Këshilli i Fakultetit”. Rregulloret e studimeve duhet te jene pjese e rregullores se Fakultetit. Statuti e ka te parashikuar qarte se kriteret do te parashikohen ne Rregulloren e Fakultetit. Por edhe sikur mos te ishin pjese e saj ne nje moment te dyte ato duhet te miratohen nga Rektori.

Referuar teorise se vlefshmerise se aktit administrativ, qe ai te jete i vlefshem duhet te miratohet nga organi kompetent. Ne rastin konkret duke qene se Statuti i UBT dhe Rregullorja e Fakultetit te Ekonomi Agrobiznesit nuk parashikojne se cila do te jete struktura qe do t’i miratoje keto Rregullore, nisur dhe nga parashikimet e mesiperme, rezulton se, keto Rregullore duhet te miratohen sipas proçedures dhe ne te njejten menyre qe parashikon Statuti per Rregulloret e Fakulteteve. Ne kushtet kur ky akt eshte miratuar vetëm nga Keshilli i Fakultetit dhe nuk eshte miratuar nga Rektori, ai nuk mund te konsiderohet si akt qe ka fuqi juridike dhe si pasoje ai nuk mund te zbatohet. Ai eshte pa fuqi juridike, pasi qe te konsiderohet akti i nxjerre ai duhet te gjeje miratimin ne rastin konkret te dy organeve, konkretisht te Keshillit te Fakultetit dhe te Rektorit te Universitetit. Pa kunderfirmimin e Rektorit ky akt nuk mund te konsiderohet me fuqi juridike. Këshilli i Fakultetit ne kete rast ka vetëm fuqi propozuese dhe jo vendimmarrëse.

Bazuar sa me siper ne e gjejme te bazuar kerkesen e studenteve aktuale. Ne jemi per rritjen e cilesise se specialisteve qe perfundojne arsimin e larte dhe specializimet perkatese. Por, rregullat e lojes duhen vendosur sipas parimeve te shtetit ligjor dhe palet duhet te informohen ne kohen e duhur, duke rritur transparencen ne veprimtarine tuaj

Per sa me siper, ne mbeshtetje te pikes 3 te nenit 63 te Kushtetutes, ku thuhet shprehimisht se: “Avokati i Popullit ka te drejte te beje rekomandime dhe te propozoje masa kur veren shkelje te te drejtave dhe lirive te njeriut nga administrata publike”, dhe ne vijim te nenit 21/b dhe 24/b, te Ligjit nr.8454 date 4.02.1999 “Per Avokatin e Popullit”, me ndryshimet e mevonshme, ku thuhet perkatesisht se;

“Pas perfundimit te hetimit, Avokati i Popullit kryen keto veprime:

-   paraqet rekomandime per venien ne vend te se drejtes se shkelur tek organi administrativ, qe, sipas tij ka shkaktuar shkelje te te drejtave dhe lirive...”

 “Kur Avokati i Popullit veren se eshte vete permbajtja e ligjit ose e akteve te tjera normative dhe jo zbatimi i tyre shkaku qe krijon premisa per shkelje te te drejtave te njeriut, te njohura nga Kushtetuta ose nga ligjet e tjera, ka te drejte:

-   t’u rekomandoje organeve te administrates ndryshimin ose permiresimin e akteve nenligjore…”

R E K O M A N D O J M E

1. Zbatimin e Statutit te Universitetit Bujqesor te Tiranes qe per hyrjen ne fuqi te Rregullores se studimeve te ciklit te dyte ne Fakultetin e Ekonomise dhe Agrobiznesit, te kerkohet miratimi i saj nga Rektori i Universitetit Bujqesor.

2. Ne perputhje me nenin 22 te Ligjit Nr.8454 date 04.02.1999 “Per Avokatin e Popullit”, plotesuar me Ligjin nr.8600 date 10.04.2000, ndryshuar me Ligjin nr.9398, date 12.05.2005, ku thuhet shprehimisht se;

“Organet te cilave Avokati i Popullit u ka drejtuar nje rekomandim, duhet ta shqyrtojne rekomandimin dhe te kthejne pergjigje brenda 30 ditesh nga data e dergimit te rekomandimit”, lutemi ta shqyrtoni dhe te na vini ne dijeni per qendrimin Tuaj ndaj ketij rekomandimi, brenda 30 diteve.

Duke besuar ne bashkepunimin tuaj,

                                                           Me respekt

AVOKATI  I  POPULLIT

        Ermir  DOBJANI