Tirane

          Siç jeni në dijeni, mbi ankesat e disa shtetasve, nga ana jonë është filluar një proçes hetimi në lidhje me mundësinë e dëmtimit të shëndetit të njerëzve që janë të ekspozuar ndaj rrjeteve të telefonisë celulare.

          Gjatë hetimit tonë për 3 raste u kryen edhe matje me aparaturat përkatëse, të disponuara nga një ekspert i pavarur Italian. Në të tre rastet rezultoi se pajisjet e vendosura nga dy kompanitë, Vodafon dhe AMC rrezatonin mbi normat e lejuara nga legjislacioni i vendeve të Bashkimit Europian, pra kishte mundësi për dëmtimin e shëndetit të njerëzve që ishin apo janë në rrezen e rrezatimit jo jonizues. Kjo sepse vendi yne nuk ka përcaktuar akoma norma për këtë qëllim, por sipas nenit 32 të ligjit nr.8618 dt.14.06.2000 “Për telekomunikacionet në Republikën e Shqipërisë” thuhet, “Operatorët e telekomunikacioneve detyrohen të marrin të gjitha masat për mbrojtjen e shëndetit të përdoruesve të rrjeteve të telekomunikacioneve dhe të personave që janë të ekspozuar ndaj këtyre rrjeteve si dhe mbrojtjen e mjedisit”.

          Duke qenë gjendja e tillë, në përputhje me kompetencat tona, i kemi rekomanduar Prokurorisë së rrethit të Tiranës të fillojë proçedimin penal ndaj drejtuesve dhe personave përkatës përgjegjës në këto dy kompani si dhe ndaj punonjësve të ish Komitetit Shtetëror të Mjedisit, që nuk kanë kryer detyrat e tyre dhe kanë lejuar shkeljen e ligjit “Për mbrojtjen e mjedisit” dhe ligje të tjera. Tashmë jemi në pritje të hetimeve nga Prokurori, por në Kodin tonë Penal (kreun e 6, vepra penale kundër mjedisit) nuk ka një dispozitë të veçantë për këto lloj rrezatimesh. Ne e kemi referuar çështjen penale tek neni 201 i Kodit Penal. (ndotja e ajrit) sepse nuk ka dispozitë tjetër specifike.

          Nga ana tjetër, duke shqyrtuar legjislacionin përkatës dhe përgjigjet e tre dikastereve (Shëndetësisë, Mjekësisë dhe Telekomunikacioneve), ku theksohet boshllëku i legjislacionit për mbrojtjen nga rrezatimet jo jonizuese, mungesa e aparaturave përkatëse, kontrolli jo i plotë për respektimin e legjislacionit ekzistues etj; në bazë të pikës 3 të nenit 63 të Kushtetutës së Republikës së Shqipërisë që thotë: “Avokati i Popullit ka të drejtë të bëjë rekomandime dhe të propozojë masa kur vëren shkelje të të drejtave dhe lirive të njeriut nga administrata publike”, si dhe të nenit 24 të ligjit nr.8454 dt.04.02.1999 “Për Avokatin e Popullit”,

R E K O M A N D O J M E:

1.     Përgatitja sa më shpejt e projektligjeve për plotësimin e legjislacionit për mbrojtjen e shëndetit të njerëzve dhe të ambientit nga rrezatimet jo jonizuese të telefonisë celulare si dhe të dënimit apo zhdëmtimit nga personat që kryejnë këto veprime të paligjshme.

2.     Marrjen e masave që mbi bazën e legjislacionit ekzistues, të parandalohen, të ndërpriten apo të ndëshkohen shkeljet e kryera.

Mbi masat e marra, lutemi na vini në dijeni sa më shpejt.

                                                                        Me respekt

                                                 AVOKATI  I  POPULLIT

     Ermir DOBJANI