Z. Burgaj,

Së pari, duke përfituar nga rasti i dërgimit të drejtpërdrejtë në emër tuaj të kësaj shkrese, Ju uroj suksese në detyrën e rëndësishme të Drejtorit të Përgjithshëm të Policisë së Shtetit. Kam bindjen e plote se me eksperiencen që keni në organet e Policisë së Shtetit, cilësitë e larta që ju karakterizojnë dhe përkushtimin që keni demostruar në punën tuaj, Policia e Shtetit do të rritë rezultatet e punës në përmbushje të misionit të saj ligjor, të përcaktuar në nenin 1 të ligjit nr. 9749, dt. 04.06.2007 “Për Policinë e Shtetit”, të ruajtjes së rendit dhe sigurisë publike, në përputhje me ligjin dhe duke respektuar të drejtat dhe liritë e njeriut.

            Duke ju respektuar personalisht për shkak se kam bindje se ju jeni funksionar publik që e kupton rëndësinë e të drejtave të njeriut në shtetin ligjor dhe që keni luftuar dhe luftoni për t’i respektuar këto parime, do të dëshiroja që këtë letër të firmosur prej meje si përfaqësues i Institucionit të mbrojtjes së të drejtave të njeriut, ta interpretoni si një mesazh mirëkuptimi me interes të përbashkët.

            Unë mendoj se ky interes i përbashkët është përcaktuar në Kushtetutë dhe në Ligjet përkatëse, prandaj do të ishte në nderin tuaj dhe kënaqësi për mua që marrëdhëniet e punës të ishin sa më korrekte, duke kryer secili detyrën e tij, pa qënë unë i detyruar t’ju kujtoj nevojën e respektimit të Kushtetutës.

            Së dyti, Ju vëmë në dijeni se gjatë muajit Shtator 2009 nga ana e institucionit tonë u bënë disa inspektime në disa Drejtori të Policive në Qarqe si në Lezhë, Shkodër, Kukës dhe Dibër dhe në Komisariatet në varësi të tyre lidhur me kushtet e ambjenteve të shoqërimit dhe sigurimit, si dhe për respektimin e kritereve ligjore të shoqërimit të shtetasve të organet e policisë dhe respektimin e të drejtave të tyre nga punonjësit e policisë.

            Gjatë inspektimeve të bëra u konstatuan një sërë problemesh lidhur me ambjentet e shoqërimit dhe të sigurimit, për kriteret dhe rastet ligjore të shoqërimit, si dhe për respektimin e të drejtave ligjore të të shoqëruarëve, të arrestuarëve dhe të ndaluarëve nga policia.

Për zgjidhjen e problemeve të konstatuara kemi bërë rekomandimet përkatëse Drejtuar Drejtorit të Përgjithshëm të Policisë së Shtetit dhe njëkohësishtë edhe Drejtorëve të Drejtorive në Qarqet e inspektuara. Mirëpo, megjithse afati ligjor prej 30 ditësh, i përcaktuar nga neni 22  të ligjit nr. 8454, dt. 04.02.1999 “Për Avokatin e Popullit”, i ndryshuar, kaloi, me përjashtim të Drejtorit të Policisë së Qarkut Lezhë, të tjerët si Drejtori i Përgjithshëm i Policisë ashtu edhe Drejtorët e Policive në Qarqet Shkodër, Kukës dhe Dibër nuk na i kthyen përgjigjet e rekomandimeve të bëra.

            Përsa më sipër, lutemi që ta vlerësoni këtë shqetësim tonin dhe të na dërgoni brenda 10 ditëve, Ju dhe Drejtorët e Policive në Qarqe përgjigjet e rekomandimeve të përshkruara më sipër.

            Bashkelidhur po ju dërgojmë edhe fotokopje të katër rekomandimeve në fjalë.

            Duke besuar paraprakisht në mirëkuptimin Tuaj,

AVOKATI  I  POPULLIT

        Ermir  DOBJANI