Te nderuar zoterinj,

            Institucioni i Avokatit te Popullit ka regjistruar me iniciative rastin e bere publik ne media per vetvarjen ne ambjentet e Komisariatit te Policise Durres te shtetasit Klodian Bushi me dt. 12.11.2009. Nga ana jone ky rast u hetua ne vend nga nje grup ekspertesh, te cilet kqyren ambjentin ku ndodhi ngjarja, pyeten punonjesit e policise qe e kishin thirrur ate, punonjesit e policise qe kishin marre kontakt dhe qe kishin dijeni per ngjarjen, bashkeshorten dhe kunatin e tij, si dhe moren e administruan dokumenta te ndryshme qe lidheshin me kete ngjarje.

            Nga shqyrtimi i kesaj çeshtjeje rezultoi se nga informacionet e policise, shtetasi Klodian Bushi ishte autor i dyshuar i vjedhjes se nje banese ne qytetin e Durresit, ndodhur ne daten 09.11.2009, ku ishin vjedhur disa sende (bizhuteri), disa prej te cileve ishin shitur nga bashkeshortja e tij ne nje dyqan qe tregton sende floriri. Nga Komisariati i Policise Durres ishte bere referimi i vepres penale Prokurorise se Rrethit Gjyqesor Durres dhe i eshte kerkuar prokurorit te çeshtjes thirrja e te dyshuareve dhe kryerja e veprimeve hetimore proceduriale, ndermjet te tjerave edhe paraqitja per njohje e bashkeshortes se Klodianit. Me miratimin e prokurorit, shtetasit Klodian e Gjulferie Bushi ne daten 12.11.2009, rreth ores 16.00 u thirren verbalisht nga punonjesit e policise Maringlen Muçaj, me detyre specialist per hetimin e krimeve kunder prones dhe Arben Luçi, me detyre specialist i policise se zones, qe te vinin ne Komisariatin e Policise. Meqenese Klodiani nuk ishte ne banese ne kohen qe shkuan punonjesit e policise, keta i thane bashkeshortes se tij qe te paraqiteshin te dy ne polici ne kohen qe Klodiani do te vinte ne banese. Rreth ores 18.30 te dt. 12.11.2009, shtetasit Klodian dhe Gjulferie Bushi, se bashku edhe me vajzen e tyre 5 vjeçe jane paraqitur ne Komisariatin e Policise Durres. Ne polici ata jane pritur nga punonjesit e policise Maringlen Muçaj dhe Arben Luçi. Pasi jane regjistruar ne librin e takimeve ne Drejtorine e Policise se Qarkut Durres dhe ne librin e personave te shoqeruar ne polici, ata jane marre dhe jane futur ne ambjentet e policise nga punonjesi i policise Maringlen Muçaj. Ky i fundit, Klodianin e ka lene ne koridorin e katit te pare te godines se policise, te ulur ne karrike, ndersa Gjulferien dhe vajzen e saj te vogel i ka futur ne zyren e tij, e cila ndodhej aty prane dhe ne prezencen e specialistit te policise kriminale Ledjon Hizmo e ka pyetur ate me cilesine e personit qe tregon rrethanat e hetimit. Ne kete kohe ne polici ka ardhur edhe prokurori i çeshtjes Sokol Nishani, i cili eshte njohur me materialet e administruara nga policia. Meqenese bashkeshortja e Klodianit dha te dhena dhe prova te rendesishme materiale ne ngarkim te Klodianit, punonjesi i policise Maringlen Muçaj, ka dale nga zyra dhe ia ka dhene ne dorezim Klodianin punonjesit te policise te informacionit te Komisariatit te Policise Durres Beqir Gjergji per ta shoqeruar e siguruar ate ne ambjentet e shoqerimit, duke i thene se ai do te ndalohej. Punonjesi i policise Beqir Gjergji, pasi i ka bere kontrollin personal, e ka shoqeruar Klodianin ne dhomat e shoqerimit, te cilat ndodhen ne katin e pare, prapa godines se policise. Atij i ka lene veten cigare dhe e ka mbyllur ate ne kete ambjent te pajisur me dere hekuri, shul e dryn, pa ndriçim elektrik dhe ne erresire te plote (sqarojme se qe kur jane rikontruktuar keto dhoma qe para rreth dy vjetesh ato nuk kane ndriçim elektrik). Keto dhoma jane pa stola apo karrike per te qendruar ulur. Sipas punonjesve te policise te informacionit dhe komandantit te tyre, meqenese keto dhoma nuk jane me kushtet e pershtatshme, nga drejtuesit e organit eshte urdheruar qe ne to te futen vetem personat e shoqeruar te cilet dyshohen se jane autore te veprave penale. Me pas ne prezencen e prokurorit eshte bere edhe paraqitja per njohje e shtetases Gjulferie Bushi nga blereset e sendeve te vjedhura, te cilat ajo ua kishte shitur.

Gjate kohes qe shtetasi Klodian Bushi ka qendruar ne ambjentet e shoqerimit, punonjesi i policise Beqir Gjergji e ka kontrolluar ate here pas here kur kishte mundesi, dhe me kerkesen e tij i ka ndezur edhe cigare. Rreth ores 20.00 Beqir Gjergji duke qene rreth 10 metra larg dhomave te shoqerimit, ka degjuar zhurme, goditje te deres se dhomave te shoqerimit. Ai eshte afruar menjehere atje dhe i ka thirrur Klodianit, por ai nuk eshte pergjigjur. Pastaj Beqiri ka hapur deren me veshtiresi dhe ka konstatuar qe Klodiani ishte varur prapa deres me nje rrobe, (benevreke) te cilen e kishte lidhur ne qafe dhe krahun tjeter te saj ne hekurat siper deres. Beqiri i ka ardhur ne ndihme menjehere atij, duke e zgjidhur dhe nxjerre jashte ne oborr dhe per kete ka kerkuar edhe ndihmen e rojes qe ishte aty prane. Ata i kane dhene ndihmen e pare, duke i bere frymemarrje artificiale e veprime te tjera ndihmuese dhe derguar menjehere ne spitalin e qytetit Durres. Ne spital shtetasi Klodian Bushi eshte derguar i gjalle, por megjithse i eshte ofruar ndihma mjekesore, ai ka vdekur.

            Per kete ngjarje nga Prokuroria e Rrethit Gjyqesor Durres eshte filluar çeshtja penale dhe perveç veprimeve te tjera proceduriale eshte marre edhe vendimi per kryerjen e ekspertimit mjekoligjor te shtetasit Klodian Bushi.

Nga ana jone u konstatua se kerkesat (pyetjet) ne vendimin organit te prokurorise per ekspertimin e te ndjerit ishin te pa plota. Per te arritur ne nje konkluzion objektiv ne perfundim te hetimit qe po behet nga institucioni yne, me dt. 17.11.2009 i kerkuam Institutit te Mjekesise Ligjore qe te na informoje lidhur me shkakun e vdekjes se tij dhe faktin se, perse nuk jetoi i ndjeri, megjithse ai u dergua i gjalle ne spital. Pra, te kqyre edhe dokumentat per te na dhene informacion nese humbja e jetes se tij eshte pasoje e mosdhenies se ndihmes mjekesore ne kohe, per shkak te mosdhenies se ndihmes se specializuar nga personeli mjekesor apo per shkaqe te tjera objektive.

Familjaret e te ndjerit kane pretendime, se vetvarjen i ndjeri e ka bere per shkak te ushtrimit te dhunes fizike ndaj tij nga punonjesit e policise, por deri tani nuk jane provuar pretendimet e tyre. Megjithate lidhur me keto pretendime te familjareve jemi ne pritje te perfundimit te aktit te ekspertimit mjeko-ligjor nga Instituti i Mjekesise Ligjore. Me pas mund te shprehemi nepermjet nje rekomandimi tjeter.

Zoti Drejtor,

Nga hetimi yne lidhur me kete ngjarje te rende rezulton, se disa nga shkaqet qe sollen si pasoje vetvarjen ne ambjentet e policise te shtetasit Klodian Bushi jane:

I. Moszbatimi nga strukturat drejtuese te Komisariatit te Policise Durres te Leter – Porosise se Drejtorit te Pergjithshem te Policise se Shtetit Nr. 703, dt. 07.08.2008 “Per njohjen e raportit vleresues paraprak te delegacionit te CTP-se dhe marrjen e masave per plotesimin e rekomandimeve te tij”, si dhe te rekomandimeve te vazhdueshme te Avokatit te Popullit, lidhur me ndertimin  e dhomave te shoqerimit me standartet ligjore, si dhe per heqjen nga perdorimi dhe funksioni i atyre dhomave qe nuk plotesojne kriteret dhe kushtet domosdoshme.

Sipas pikes 2 te Leter - Porosise, ne dhomat e shoqerimit duhet te ishin vendosur stola, karrike apo pajisje te tjera per qendrimin ulur te personave. Mbajtja paster, sigurimi i ajrimit e ndriçimit natyral ne keto ambjente dhe krijimi i mundesive per te kryer nevoja personale ne çdo kohe.

Ndersa sipas pikes 4 te saj, kerkohet heqja nga perdorimi dhe funksioni i dhomave aktuale te shoqerimit te shtetasve qe nuk plotesojne kushtet dhe kriteret e kerkuara duke krijuar ambjente te tjera me kushte komode per trajtim njerezor e dinjitoz, pa dyer te blinduara e pa hekura, me dritare te permasave normale qe te lejoje hyrjen e drites e te ajrimit te plote natyral, me tavolina e karrike pune, te lyera e te pastra, sipas kritereve qe duhet te plotesoje nje zyre pritje.

Mirepo ne kundershtim te hapur me urdherimet e bera ne kete Leter – Porosi, drejtuesit e policise se ketij organi nuk kane marre asnje mase ne zbatim te saj. Dhomat e shoqerimit te Komisariatit te Policise Durres jane jashte çdo standarti te kerkuar.  Ne kete komisariat nuk ka tre dhoma shoqerimi sikurse parashikon ligji nr. 9749 , dt. 04.06.2007 “Per Policine e Shtetit”, por ka vetem dy dhoma shoqerimi, nje koridor dhe nje WC, te cilat jane ne nje ambjent te perbashket dhe pa dyer ndarese nga njera tjetra. Dere nuk ka as WC-ja dhe si pasoje e kesaj mangesie, kur ka dy ose me shume persona te futur aty, ata jane te detyruar qe te kryejne nevojat personale ne prezence te njeri-tjetrit. Dhomat mbyllen nga nje dere e jashtme prej hekuri e cila eshte e pajisur me shul e dryn. Ato nuk kane permasat e duhura, nuk kane ajrim, jane pa ndriçim natyral dhe akoma me keq jane edhe pa ndriçim elektrik (erresire e plote gjate nates), jane te pa pajisur me stola apo karrike per te qendruar ulur te shoqeruarit.

Keto ambjente te papershtatshme jane konstatuar edhe me pare nga institucioni yne gjate inspektimeve te bera, qe para nje vit e gjysem e ne vazhdim. Per permiresimin e kushteve te tyre kemi bere disa rekomandime Drejtorise dhe Komisariatit te Policise Durres, por fatkeqesisht rekomandimet tona, megjithse jane mirepritur ne parim, ne fakt nuk kane gjetur zbatim praktik sepse rezulton se nuk eshte bere asgje konkrete per permiresimin e tyre.

Gjithashtu duhet te theksojme se drejtuesit e ketij organi i kane deklaruar ekipeve tona inspektuese, se i kane hequr ato dhoma nga perdorimi dhe se te shoqeruarit i mbajne ne koridorin e godines. Mirepo, ngjarja e ndodhur dhe hetimi yne provoi se, ne fakt ato jane ne perdorim dhe se drejtuesit e ketij organi nuk jane treguar te sinqerte me institucionin tone.

II.  Mosvleresimi i duhur nga drejtuesit e ketij organi dhe nga punonjesit e policise i rasteve te ndalimit dhe arrestimit te shtetasve. Ne gjykojme se, kur punonjesi i policise, qe eshte duke punuar me nje person ne organin e policise, krijon bindje se ai eshte autor i nje vepre penale dhe vendos qe personi do te duhet te ndalohet apo te arrestohet, duhet te marre te gjitha masat e nevojshme per sigurimin e tij, jo vetem qe ai te mos largohet, por edhe per sigurimin e jetes se tij. Qe ne kete moment duhet organizuar puna per ruajtjen e tij permanente me punonjes policie deri sa te perpilohen procesverbalet perkatese te ndalimit apo te arrestimit dhe dorezimin e tij ne dhomat e sigurise, ku ka te disllokuar me sherbim punonjes policie ne menyre te perhershme.

Kujtojme se per shkak te neglizhences se treguar nga punonjesit e policise gjate kryerjes se veprimeve hetimore proceduriale me autore te veprave penale ne ambjentet e policise, jane larguar disa persona me rrezikshmeri te theksuar shoqerore. Raste te tilla kane ndodhur edhe ne Drejtorine e Policise se Qarkut Durres.

III. Paaftesia dhe papergjegjshmeria e drejtuesve te Komisariatit te Policise Durres, te cilet kane pergatitur dhe miratuar plan-vendosjen e sherbimeve te policise se rendit, si dhe detyrat e shumta dhe koha e gjate e sherbimit te punonjesit te policise qe ka per detyre mbikqyrjen e te shoqeruareve.

Sipas “Plan-vendosjes se sherbimeve te policise se rendit per periudhen 01.06.2009 deri 31.12.2009 te Komisariatit te Policise Durres”, vendi i sherbimit Komandant N/Grupi; Pergjegjes Informacioni ne Repartin e Policise prane Komisariatit te Policise, detyre te cilen e kryente punonjesi i policise Beqir Gjergji diten qe ndodhi ngjarja, kishte 20 detyra:

- Te mbaje kontakte te vazhdueshme me sherbimet me qellim qe te dije ne çdo kohe vendndodhjen e tyre.

- Te beje hyrje daljet e perkohshme te armatimit per sherbim sipas punonjesve te policise kundrejt firmes.

- Ne çdo ndrrese sherbimi te jape listen e personave te shpallur ne kerkim dhe atyre te anulluar si dhe te regjistroje ne regjistrin perkates.

 - Te ushtroje kontrolle te vazhdueshme per te siguruar gatishmerine e rojeve qe sigurojne objektin e Drejtorise se Policise, ambjent ku ndodhet edhe Reparti i Policise.

- Te ushtroje kontrolle te vazhdueshme ne dhomat e shoqerimit ne funksion te sigurimit te te shoqeruareve.

- Te regjistroje ne librin perkates te gjithe personat e shoqeruar dhe te njoftoje sallen operative per gjendjen e tyre, aresyet e shoqerimit dhe kush punoi me ta. Te vere ne dijeni shefin e policise kriminale, shefin e rendit ne perfundim te kryerjes se procedurave nga specialistet perkates.

 - Te informoje komanden per gjendjen e dhomave te ndalimit, shqetesimet dhe problemet qe lindin gjate 24 oreve ne ambjentet e ndalimit.

- Te moslejoje futjen ne dhoma te ushqimeve per te ndaluarit qe ndodhen aty pa u kontrolluar me pare imtesisht duke zbatuar kerkesat e rregullores 1075, dt. 15.09.1999 “Per sigurimin dhe trajtimin e te paraburgosurve”.

- Te mosnxjerre te ndaluarit nga dhomat e ndalimit per veprime ne rast se nuk merren masa te plota per sigurimin e tyre.

- Te siguroje deren e jashtme te dhomave me kyç te cilin ta mbaje vete ne vend te sigurt ne kasaforte.

- Te kontrolloje rojet e brendshme te dhomave para se te marrin sherbimin, tu heqe atyre telefonin celular, armen e brezit dhe ti siguroje ato ne kasaforte deri ne perfundim te sherbimit.

- Perpilon raporte sherbimi per ngjarje qe ndodhin gjate sherbimit.

- Te mbaje ne kontroll personat e shoqeruar, per te parandaluar çdo veprim qe mund te rrezikoje jeten e tyre.

-  Tu jape ndihme te menjehershme ne rast se ka perkeqesime shendeti duke i derguar ne spital me nje grup te gatshem. Por ne çdo rast te vere ne dijeni komanden eprore, sallen operative.

- Te moslejoje futjen ne dhomat e shoqerimit te personave te tjere perveç ne rastet kur duhet te behet shoqerimi i tyre per siguri, apo per te dhene ndihme mjekesore.

- Te mospranoje ne dhoma persona te demtuar, te rrahur apo te plagosur pa marre me pare ndihme mjekesore. Per çdo rast te perpiloje raport sherbimi.

- Te moslejoje personat e shoqeruar te keqtrajtohen ne ambjentet e dhomave nga punonjes policie. Ne rast ndodhje te njoftoje komanden eprore.

- I raporton komandes problemet e konstatuara gjate sherbimit dhe problemet qe kane te bejne me mbarevajtjen e punes.

- Mban pergjegjesi per ruajtjen e automjeteve te bllokuara qe ndodhen ne ambjenet e drejtorise deri ne momentin e largimit te tyre ne piken e bllokimit e gjithe kjo procedure kundrejt dokumentacionit perkates.

- Te kerkoje zbatimin e urdherit te Shefit te Komisariatit  per forcimin e regjimit te hyrjes dhe daljes dhe per forcimin e rregullit ne Repartin e Policise.

 Gjithashtu sipas ketij plan-vendosje, sherbimi ne kete vend eshte i organizuar 24 ore nga ora 07.00 deri 07.00. Ne fakt diten e ngjarjes, me dt. 12.11.2009, punonjesi i policise Beqir Gjergji dhe te neserme ne dt. 13.11.2009 edhe kolegu i tij Behar Llane, te cilet duhet te permbushin te gjitha detyrat e pershkruara me larte, duke perfshire edhe mbajtjen nen kontroll te personave te shoqeruar, per te parandaluar çdo veprim qe mund te rrezikoje jeten e tyre, ishin ne sherbim per nje kohe prej 24 ore pa nderprerje.

Nga moria e detyrave qe ka ky vend sherbimi, si dhe nga koha e gjate e punes prej 24 ore pa nderprerje qe kryen punonjesi i policise i disllokuar ne kete vend, arrihet ne konkluzionin kategorik, se perpiluesi i plan-vendosjes se sherbimeve te policise se rendit zoti Genc Peka, me detyre Shef i Seksionit te Policise se Rendit dhe miratuesi i tij zoti Gjelosh Prendi, me detyre Shef i Komisariatit te Policise Durres, e kane bere ate ne menyre formale, te pa studjuar mire dhe te pa mbeshtetur ne baza e mundesi reale. Eshte e pamundur fizikisht dhe psikologjikisht qe nje punonjes policie t’i kryeje mire te gjitha 20 detyrat e ngarkuara sipas ketij plani, edhe ne qofte se sherbimi do te ishte i organizuar vetem per 8 ore pune dhe jo me per 24 ore sikurse eshte bere ne fakt.

IV. Mungesa e kontrollit nga strukturat e Drejtorise se Policise se Qarkut Durres dhe te Drejtorise se Pergjithshme te Policise se Shtetit ndaj organeve vendore te policise lidhur me zbatimin e detyrave, te percaktuara ne ligj, ne Leter – Porosi, Urdhera, Udhezime, Rekomandime e akte te tjera nenligjore, si dhe per te verifikuar bazueshmerine, objektivitetin dhe cilesine e plan-vendosjeve te sherbimeve te policise se rendit. Kujtojme se Leter – Porosia e Drejtorit te Pergjithshem te Policise se Shtetit Nr. 703, dt. 07.08.2008, e cila sikurse pershkruam me larte, ben fjale per heqjen nga perdorimi te dhomave te shoqerimit te papershtashme, sikurse jane ato te Komisariatit te Policise Durres, si dhe per permiresimin e kushteve te dhomave te shoqerimit ekzistuese, eshte nxjerre para me shume se nje viti. Mirepo nga hetimi i ketij rasti provohet se, Leter - Porosia nuk ka gjetur aspak zbatim nga drejtuesit e Policise ne Durres. Gjithashtu duhet te theksojme se zbatimi i detyrave te parashikuara prej saj nuk eshte kontrolluar nga strukturat e Drejtorise se Pergjithshme te Policise se Shtetit, te cilat kane per detyre qe te kontrollojne zbatimin e akteve te nxjerra nga ky organ qendror.

Perveç sa me siper, gjate kqyrjes se dokumentacionit dhe ambjenteve qe lidhen me kete ngjarje u konstatua se:

1. Shtetasit Klodian e Gjulferie Bushi ishin regjistruar ne dy libra, ne ate te quajtur “Liber i takimeve ne Drejtorine e Policise se Qarkut Durres” edhe ne “Librin e shtetasve te shoqeruar ne polici”. Ne fakt u provua, perveç te tjerave dhe me deklarimet e punonjesve te policise, se ata nuk u shoqeruan ne polici, por u thirren per probleme “pune” dhe si te tille nuk duheshin regjistruar ne librin e personave te shoqeruar. Ky fakt eshte nje tregues tjeter i mosnjohjes se ligjit “Per Policine e Shtetit” nga drejtuesit vendor te policise dhe efektivat e tyre lidhur me konceptin e shoqerimit te shtetesave ne organet e policise si dhe me rastet e kriteret ligjore te shoqerimit te parashikuara ne ligjin “Per Policine e Shtetit”.

2. Ne kete organ nuk ka liber tip per takimet e shtetasve ne Drejtorine e Policise se Qarkut Durres, ku te jene te pasqyruar te gjitha te dhenat e nevojshme, por si i tille ishte “pershtatur”, apo “sajuar” nje “Regjister per automjetet dhe targat e vjedhura ose te humbura”, i cili nuk ka te dhenat e duhura per te pasqyruar takimet e shtetasve.

3. Ne librin e takimeve te shtetasve ne kete organ, megjithse quhet i tille, jane pasqyruar shenime per problematika te ndryshme dhe pa nje rregullsi. Ne te jane regjistruar persona te shoqeruar, shtetas qe bejne kallzime te ndryshme, shtetas per takime private dhe persona te tjere per te cilat nuk eshte pasqyruar asnje aresye perse figurojne te regjistruar ne te.

4. Keto fakte tregojne jo vetem per mungese pergjegjesie te drejtuesve te ketij organi te cilet kane miratuar vendosjen e ketij libri, por ne te njejten kohe edhe mungese kontrolli prej tyre te punes se strukturave vartese, lidhur me shenimet qe ata bejne ne libra, si dhe per pasqyrimin e te dhenave te tjera te nevojshme.

5. Ne librin e shtetasve te shoqeruar nuk pasqyrohen te gjitha kerkesat e ligjit “Per Policine e Shtetit” lidhur me njoftimin e familjareve, te te afermeve apo te personit qe i shoqeruari beson, ora e njoftimit te tyre, emri i te njoftuarit dhe numri i telefonit te tij.

6. Ne dhomat e shoqerimit dhe ne koridorin e godines te ketij organi ku mbahen te shoqeruarit nuk ka te afishuara postera per te drejtat e njeriut, per parandalimin e dhunes ndaj qytetareve nga punonjesit e policise, per te drejtat ligjore te personave te shoqeruar etj.

7. Ne zyren e informacionit te ketij komisariati nuk kishte liber per regjistrimin e personave te arrestuar dhe te ndaluar.

Per te permiresuar sherbimin e policise ndaj qytetareve, per permiresimin e kushteve te dhomave te shoqerimit, per mbajtjen nen kontroll te personave te shoqeruar ne polici, per respektimin e te drejtave te tyre kushtetuese e ligjore dhe per te parandaluar ndodhjen e ngjarjeve te padeshiruara ne ambjentet e policise, bazuar ne piken 3, te nenit 63 te Kushtetutes se Republikes se Shqiperise ku thuhet se: “Avokati i Popullit ka te drejte te beje rekomandime dhe te propozoje masa kur veren shkelje te te drejtave dhe lirive te njeriut nga administrata publike”, ne nenin 21/c te ligjit nr. 8454 dt.04.02.1999 “Per Avokatin e Popullit”, te ndryshuar, ku percaktohet se: “Avokati i Popullit paraqet rekomandime per marrje masash per venien ne vend te se drejtes se shkelur tek organi epror i organit qe ka shkaktuar shkelje te te drejtave dhe lirive” dhe ne nenin 24/b, te ligjit nr. 8454, dt. 04.02.1999 “Per Avokatin e Popullit”, ku thuhet se: “Kur Avokati i Popullit veren se eshte vete permbajtja e ligjit ose e akteve te tjera normative dhe jo zbatimi i tyre shkaku qe krijon premisa per shkelje te te drejtave te njeriut, te njohura nga Kushtetuta ose ligjet e tjera, ka te drejte t’u propozoje organeve te administrates ndryshimin ose permiresimin e akteve nenligjore; …” ju,

R E K O M A N D O J M E :

1. Analizimin e ngjarjes se vetvarjes se shtetasit Klodian Bushi ne ambjentet e shoqerimit te Komisariatit te Policise Durres dhe nxjerrjen e pergjegjesive administrative te drejtuesve te Komisariatit te Policise Durres, Genc Peka, me detyre Shef i Seksionit te Policise se Rendit dhe Gjelosh Prendi, me detyre Shef i Komisariatit te Policise Durres,  te cilet me veprimet dhe mosveprimet e tyre jane bere shkaktare te kesaj ngjarje te rende.

2. Rasti i vetvarjes se shtetasit Klodian Bushi dhe shkeljet e drejtuesve te Komisariatit te Policise Durres te pergjithesohen ne te gjitha organet e policise vendore me qellim rritjen e cilesise se sherbimit policor dhe parandalimin e ngjarjeve te ngjashme ne te ardhmen.

3. Rishikimin dhe permiresimin e “Plan-vendosjes se sherbimeve te policise se rendit” ne Komisariatin e Policise Durres dhe ne te gjitha organet vendore te policise ne shkalle vendi, si dhe plotesimin e tyre me numrin e punonjesve te policise te domosdoshem per te kryer sa me mire dhe me cilesi te larte detyrat funksionale.

4. Marrjen e masave te menjehershme per ndertimin e dhomave te shoqerimit te shtetasve ne Komisariatin e Policise Durres sipas kerkesave te ligjit nr. 9749, date 04.06.2007 “Per Policine e Shtetit” dhe ne zbatim te Leter – Porosise se Drejtorit te Pergjithshem te Policise se Shtetit Nr. 703, dt. 07.08.2008, duke krijuar ambjente te pershtashme, dinjitoze, te pajisura me orendite e nevojshme per qendrim, te ndara me vete per femrat, meshkujt dhe te miturit, si dhe pa dyer apo zgara hekuri dhe pa shula e dryna.

5. Te merren masa te menjehershme per ndertimin apo rikonstruksionin me parametra dhe standarte bashkekohore te dhomave te shoqerimit te shtetasve ne te gjitha Komisariatet e Policise ne shkalle vendi, ku ato mungojne.

6. Nga strukturat drejtuese te organeve vendore te policise te punohet me te gjithe efektivat per njohjen e ligjit “Per Policine e Shtetit” dhe zbatimin me rigorozitet te kritereve ligjore lidhur me rastet e shoqerimit te shtetasve ne organet e policise, si dhe per trajtimin dinjitoz te tyre. Nderkohe nga strukturat drejtuese e kontrolluese vendore dhe qendrore te Policise se Shtetit te ushtrohet kontroll i vazhdueshem ndaj vartesve lidhur me shoqerimin e shtetasve ne organet e policise.

7. Ne ambjentet e shoqerimit te shtetasve te vendosen postera me te drejtat ligjore te personave te shoqeruar te parashikuara ne dispozitat e ligjit “Per Policine e Shtetit”. Gjykojme se postera te tilla kane vlere informuese per te shoqeruarit, por ne te njejten kohe ato sherbejne edhe si mjet kujtese per punonjesit e policise per t’i zbatuar e respektuar keto te drejta.

8. Libri i personave te shoqeruar te riformatohet dhe te unifikohet me qellim qe te pasqyrohen ne menyre te plote kerkesat e ligjit, duke shtuar disa kolona te tjera qe kane te bejne me:

- Njoftimin e familjareve, te afermeve apo personit qe i shoqeruari beson, ora e njoftimit te tyre, emri i te njoftuarit dhe numri i telefonit te tij.

- Nenshkrimi i te shoqeruarit ne liber pasi ai lihet i lire. Vendosja e kesaj te dhene do te parandaloje mundesine e abuzimit te punonjesve te policise me aresyen dhe kohen e shoqerimit te tyre.

- Kolona ne te cilen regjistrohet aresya e shoqerimit, te kete me shume hapsire me qellim qe te pasqyrohet me shume informacion per aresyen e shoqerimit, sepse deri aktualisht ajo ka ngelur e pergjithshme si “verifikim” apo “konflikt”.

9. Te krijohet dhe unifikohet libri i takimeve te shtetasve me punonjesit e policise ne organet e policise, duke pasqyruar te gjitha te dhenat e nevojshme, per gjeneralitetet e tyre, punonjesin e policise qe takon, qellimin e takimit, oren e hyrjes dhe ate te daljes, si dhe te dhena te tjera te cilat do t’i vleresoni te domosdoshme.

10. Te rritet niveli kulturor e profesional dhe pergjegjesia e punonjesve te policise qe administrojne librat dhe regjistrat e organit te policise. Ne librin e shoqerimit te shtetasve ne polici te regjistrohen menjehere sapo sillen ne organ te gjithe dhe vetem personat e shoqeruar nga punonjesit e policise. Ndersa ne librin e takimeve te regjistrohen te gjithe dhe vetem ata persona qe vijne vete apo ata qe jane thirrur nga policia ne organ per probleme administrative, per probleme penale dhe per kryerje te veprimeve hetimore-proceduriale dhe te pasqyrohen me korrektese te dhenat e sakta e te verteta.

11. Ne çdo organ vendor policie te vendoset sa me shpejte nje liber me vete per regjistrimin e personave te arrestuar apo te ndaluar nga punonjesit e policise te atij organi. Ky liber duhet te jete perveç librit qe qendron ne dhomat e sigurimit. Ne kete liber, i cili duhet te qendroje dhe te administrohet nga punonjesi i policise se informacionit, te regjistrohen vetem personat e arrestuar apo te ndaluar nga policia. Praktika e deritanishme e regjistrimit te personave te arrestuar dhe te ndaluar ne librat e shoqerimit, sikurse kemi rekomanduar edhe me pare, duhet  te ndryshohet menjehere.

12. Nga strukturat e Drejtorise se Pergjithshme te Policise se Shtetit , te ushtrohet me shume dhe me mire kontroll ne organet e policise vendore lidhur me zbatimin e akteve normative ligjore e nenligjore per respektimin e te drejtave te njeriut dhe te rekomandimeve te here pas hershme te Avokatit te Popullit te cilat jane vleresuar e mirepritur nga organi juaj.

Per masat e mara ne zbatim te ketij rekomandimi, lutemi te na ktheni pergjigje brenda afatit ligjor prej 30 ditesh te parashikuar ne nenin 22 te ligjit “Per Avokatin e Popullit”.

Duke besuar ne mirekuptimin tuaj,

AVOKATI  I  POPULLIT

        Ermir  DOBJANI