I nderuar Z.Ministër,

Duke u nisur nga një ankesë e një grupi ish ambasadorësh të Republikës së Shqipërisë që kanë kërkuar zgjidhjen e problemit të mospagesës së kontributit të sigurimeve shoqërore dhe shëndetësore për bashkëshortët/et që kanë shoqëruar nëpunësin në përfaqësitë tona diplomatike, kemi shkëmbyer korrespondencën përkatëse me Sekretarin e Përgjithshëm të Ministrisë së Punëve të Jashtme e më pas dhe me Ministrin e Financave, Ministrin e Punës, Çështjeve Sociale dhe Shanseve të Barabarta si dhe me Institutin e Sigurimeve Shoqërore.

Objekti i ankesës është mosparashikimi në buxhetin e Ministrisë së Punëve të Jashtme i fondit të kontributeve të sigurimeve shoqërore për bashkëshortët/et e nëpunësve të përfaqësive diplomatike të vendit tonë, ashtu siç dhe përcaktohet shprehimisht në nenin 46, paragrafi 1 të Ligjit nr.9095 datë 3.07.2003 “Për Shërbimin e Jashtëm në Republikën e Shqipërisë”: “Për personelin e Përfaqësive Diplomatike, koha e qëndrimit jashtë shtetit i njihet për efekt të vjetërsisë në punë dhe të pagesës së kontributit të sigurimeve shoqërore dhe shëndetësore edhe bashkëshortit/es, i cili/e cila shoqëron nëpunësin në përfaqësinë diplomatike”. 

Ankuesit shpjegojnë se janë munduar që këtë problem ta zgjidhin në rrugë institucionale me strukturat përkatëse të Ministrisë së Punëve të Jashtme, por sipas tyre: “..megjithë dëshirën e mirë të shprehur nga strukturat përkatëse, për fat të keq konstatojmë që edhe në buxhetin e Ministrisë për vitin 2008 nuk është parashikuar zgjidhja financiare e këtij problemi”.

Nga Sekretari i Përgjithshëm i Ministrisë së Punëve të Jashtme, kemi marrë përgjigje me shkresën nr.3332/1 prot., të datës 27.03.2008, ku ndër të tjera sqarohet se:

“Ministria e Punëve të Jashtme me Urdhrin nr.406 datë 3.09.2007 ka ngritur grupin e punës për këtë problem, i cili konkludoi lidhur me numrin e personave ndaj të cilëve duhet të derdhet ky kontribut që nga viti 1994, në mënyrë që të bëhej përllogaritja e fondit përkatës.

Drejtoria e Financës në Ministrinë e Punëve të Jashtme duke mos pasur një akt zyrtar ku të përcaktohet paga bazë mbi të cilën do bëhet përllogaritja e fondit që do të duhej për të përballuar këto kontribute për kategorinë e parashikuar në ligj, ka kërkuar përcaktimin e kësaj page nga Ministria e Punës dhe Çështjeve Sociale duke bërë me dije për këtë problem edhe Ministrinë e Financave. Aktualisht Institucionet në fjalë ende nuk kanë kthyer një përgjigje mbi bazën e së cilës do të vijohet më tej. Pas përgjigjes së Institucioneve në fjalë dhe në përputhje me to, MPJ do të hartojë projekvendimin për tu miratuar nga Këshilli i Ministrave duke i dhënë zgjidhjen përfundimtare këtij problemi”.

Mbi këtë bazë ju drejtuam më pas për shpjegime Ministrisë së Punës, Çështjeve Sociale dhe Shanseve të Barabarta dhe Ministrisë së Financave.

Nga Ministria e Punes, Çeshtjeve Sociale dhe Shanseve te Barabarta kemi marre pergjigje me shkresen nr.806/1 prot., te dates 22.4.2008, ku nder te tjera sqarohet se: 

“Mbeshtetur ne Ligjin nr.7703 date 11.05.1993 “Per Sigurimet Shoqerore ne RSH” nenin 58, pika 2 “Keshilli i Ministrave mund të deklaroje edhe periudha të tjera si periudha të sigurimit duke u derdhur kontributi ne fondin e sigurimit shoqeror nga buxheti i shtetit” si dhe duke qene se Ligji nr.9095 date 3.07.2003 “Per Sherbimin e Jashtem ne RSH” ne nenin 46 ju njeh kohen e qendrimit jashte shtetit, per efekt te vjetersise ne pune, bashkeshortit/es te cilet shoqerojne nepunesin ne perfaqesine diplomatike, buxheti i shtetit duhet te paguaje kontributet mbi bazen e pages minimale mujore per efekt kontributesh te sigurimeve shoqerore e shendetesore, te caktuara me Vendim te Keshillit të Ministrave”.

Ndersa nga Ministria e Financave kemi marre pergjigje me shkresen nr.3424/1 prot., te dates 2.04.2008, se kjo Ministri ja ka derguar per kompetence shqyrtimin e problemit, Institutit të Sigurimeve Shoqerore.

Nga shkresa nr.2393/1 prot., e dates 28.05.2008 e Institutit te Sigurimeve Shoqerore, rezulton se ky Institucion i eshte drejtuar Ministrise se Puneve te Jashtme per kete problem me disa shkresa, te cilat na i kane listuar ne menyre kronologjike. Dhe ne keto shkresa eshte kerkuar shprehimisht nga Ministria e Puneve te Jashtme:

a-Hartimi i nje projektvendimi per mbulimin me fonde, me destinacion pagesat e kontributeve të sigurimeve shoqerore dhe shendetesore, per personelin qe shoqeron nepunesin ne perfaqesine diplomatike, per sigurimin e periudhave të kaluara të tyre.

b-Programimi i fondeve per sigurimin e personelit qe shoqeron nepunesin ne perfaqesine diplomatike gjate hartimit te treguesve te projektbuxhetit, per vitin e ardhshem.

Perveç kesaj ne keto shkresa Instituti i Sigurimeve Shoqerore ka shprehur gatishmerine per te dhene ndihmen me specialiste te sigurimit dhe te pensioneve, por nga Ministria e Puneve te Jashtme nuk i eshte kthyer asnje pergjigje dhe nuk kane pasur asnje kerkese per bashkepunim. Pra edhe pergjigja drejtuar Institucionit tone nga Ministria e Puneve te Jashtme eshte bere per te kaluar rradhen.

Nga sa me siper pershkruam rezulton se te pakten qe nga viti 2005 problemi qendron i pazgjidhur nga neglizhenca e strukturave qe merren me Buxhetin dhe Personelin ne Ministrine e Puneve te Jashtme. Ne e shohim problemin plotesisht te zgjidhshem, por duket qarte se keto struktura e kane zvarritur pa asnje arsye çeshtjen, duke treguar paaftesi dhe moskujdesje per koleget e tyre. Keshtu qe kjo kategori personash, pra bashkeshortët/et e nepunesve te perfaqesive tona diplomatike nuk kane perfituar ende nga parashikimi i bere ne nenin 46, paragrafi 1 të Ligjit nr.9095 datë 3.07.2003 “Për Shërbimin e Jashtëm në Republikën e Shqipërisë”, ndonese mund te kete prej tyre qe humbasin mjaft per mosperfitim te pensionit qe ju takon.

Me Rekomandimin tone te dates 20.06.2008, qe po ju dergojme bashkelidhur, i kemi kerkuar ish Ministrit Basha, marrjen e masave per zgjidhjen e problemit. Por deri tani nuk kemi patur asnje pergjigje zyrtare.

Për këtë qëllim në bazë të Kushtetutës së Republikës së Shqipërisë, neni 63/3, ku përcaktohet se:

“Avokati i Popullit ka drejtë të bëjë rekomandimet dhe të propozojë masa kur konstaton shkelje të të drejtave dhe lirive të njeriut nga Administrata Publike...”, si dhe në bazë të Nenit 21/b të Ligjit Nr.8454 dt.04.02.1999, “Për Avokatin e Popullit” (me ndryshimet përkatëse), ku përcaktohet se: “Avokati i Popullit paraqet rekomandime për vënien në vend të së drejtës së shkelur tek organi administrativ që sipas tij ka shkaktuar shkelje të të drejtave dhe lirive”:

JU REKOMANDOJME

1.Marrjen e masave të shpejta (duke patur parasysh buxhetin e vitit 2010) për zgjidhjen e problemit të pagesës së kontributit të sigurimeve shoqërore dhe shëndetësore për bashkëshortët/et, që shoqërojnë nëpunësin në përfaqësinë diplomatike.

2.Fillimin e ecurise disiplinore per shqyrtimin e punes se personave pergjegjes per kete çeshtje, me qellim marrjen e masave administrative per moskryerje te detyres se tyre. 

Lidhur me qëndrimin që do të mbani ndaj këtij rekomandimi, në zbatim të nenit 22 të Ligjit Nr.8454 dt.4.02.1999 “Për Avokatin e Popullit”, i ndryshuar me Ligjin Nr.9398 dt.12.05.2005, lutemi të vihemi në dijeni brenda afatit 30 ditor.

            Duke besuar ne bashkëpunimin Tuaj,

                                                           Me respekt,

AVOKATI  I  POPULLIT

      ERMIR  DOBJANI