Të nderuar Zotërinj!

Avokati i Popullit në rolin e Mekanizmit Kombëtar për Parandalimin e Torturës, bëri nje inspektim në dhomat e shoqërimit, në Komisariatin e Policisë Berat.           

 Inspektimi në Komisariatin e Policisë Berat  u krye në datën 22.09.2009 nga ora 13.30 deri në orën 15.30.

Gjatë inspektimit u konstatua se:

I. Lidhur me shoqërimin e shtetasve dhe ambjentet ku mbahen   këta persona:

Komisariati i Policise Berat dispononte ne inventarin e objekteve te tij dy dhoma shoqërimi, të cilat ndodheshin në një ndërtesë me vehte,  me dimensione të njëjta 3.5x4 m2. Njera nga keto dhoma ishte jashte parametrave dhe standarteve te kerkuara dhe ishin nxjerre jashte perdorimi nga ana e drejtuesve te policise. Ajo ishte pa dyer, pa ndriçim nga rrjeti, me shumë lagështi dhe tejet e amortizuar dhe pa dritare. Ndersa dhoma tjeter perballe saj plotesonte standartet, ishte paisur me tavoline karriga me dere dhe dritare me ndriçim te bollshem.

Në këtë komisariat policie nuk kishte dhoma të veçanta për të mitur dhe femra sipas konceptimit të bërë nga ligji i ri Nr.9749, dt. 04.06.2007 “Për Policinë e Shtetit”. Veprimet për të miturit kryheshin në zyrat e punonjësve të policisë, ndërsa femrat mbaheshin ne koridor ose në zyrat e oficerëve të policisë gjyqësore. 

Në momentin që është kryer inspektimi nuk kishte shtetas të shoqëruar, por nga biseda me drejtuesit e ketij komisariati u konstatua se te shoqeruarit mbaheshin ne oborr dhe ne rast rreshje apo moti te ftohte futeshin ne ndonje zyre. Kjo mase shoqerohej gjithmone me nje sere shqetesimesh nga ana e drejtuesve te policise, pasi ata nuk dispononin efektiv lidhur me kete sherbim.

Librat e shoqërimit, ndalimit apo arrestimit të shtetasve në polici u konstatua se plotësoheshin me shumë përgjegjësi, duke pasqyruar saktë shkakun ligjor, por nuk kishin rubrikë për njoftim të familjarëve dhe avokatit mbrojtës.

Nga këqyrja e librit te personave të shoqëruar, ndaluar apo arrestuar si dhe në bisedë me punonjësit e policisë së këtij komisariati përfshirë dhe drejtuesit e tij, mësuam se shoqërimi i personave në organet e policisë bëhej gjithmonë sipas kritereve ligjore të përcaktuara në nenet 11/6, 101/1/ “a” dhe “b” dhe 106 të ligjit nr.9749, dt.04.06.2007 “Për Policinë e Shtetit”.

           II. Lidhur me të ndaluarit, të arrestuarit dhe ambjentet që mbahen këta persona:

Dhoma të sigurisë në këtë Komisariat Policie nuk kishte pasi nuk ishte parashikuar në organik efektiv për sigurinë e tyre dhe nuk kishte dhoma te pershtatshme per kete funksion, ndaj personat e ndaluar apo arrestuar dërgoheshin menjëherë në Drejtorinë e Policisë së Qarkut Fier.

Nga drejtuesit e Komisariatit Policise Berat mesuam se kjo ishte nje praktike e sforcuar duke qene se kerkonte mjete dhe personel sherbimi per transferimin e te arrestuarve te ndaluar gjate kohes se kryerjes se proçedurave te hetimit deri ne dhenien  e mases se sigurise nga Gjykata e cila detyron vendosjen e te arrestuarit ne Institucionin e Paraburgimit Berat. Nisur nga keto konstatime del me se e nevojshme marrja e masave te menjehershme per sigurimin e fondeve per ndertimin e dhomave te sigurimit brenda ambjenteve te Komisariatit Berat.

Nga këqyrja e praktikave të personave të ndaluar apo arrestuar u vërejt se të arrestuarve dhe të ndaluarve, në procesverbalet e arrestimit dhe të ndalimit ju ishte shënuar ora  faktike si çasti, kur atyre ju është privuar liria në fakt  dhe jo ora e përpilimit të këtyre dokumenteve

Nuk u hasën raste që të arrestuarve te mitur te mos ju sigurohej mbrojtja e detyrueshme me avokat, si dhe ndihma (asistenca) psikologjike, siç parashikohet në nenet 35 e 49 të K.Pr.Penale.

          Në ambjentet e Komisariatit të Policisë nuk ishin të ekspozuara posterat për të drejtat e personave të shoqëruar, ndaluar apo arrestuar nga policia.

Avokati i Populli gjykon se konstatimet e nënvizuara më sipër përbëjnë shkelje të të drejtave dhe lirive themelore kushtetuese e ligjore të shtetasve. Ndërkohë, ato ulin imazhin dhe prestigjin e organeve të Policisë së Shtetit dhe për rrjedhojë edhe të vetë shtetit, si garant për mbrojtjen dhe respektimin e të drejtave dhe lirive të shtetasve.

          Për të rregulluar gjendjen e përshkruar më sipër në organet vendore të policisë dhe për të parandaluar shkelje të tilla në të ardhmen, bazuar në nenin 63, pika 3, e Kushtetutës së Republikës së Shqipërisë, ku thuhet se:  “Avokati i Popullit ka të drejtë të bëjë rekomandime dhe të propozojë masa kur vëren shkelje të të drejtave të njeriut nga administrata publike”, dhe nenit 21, gërma “b” e “c” të ligjit nr. 8454, datë 04.02.1999 “Për Avokatin e Popullit”, i ndryshuar, ku thuhet se: “Pas përfundimit të hetimit, Avokati i Popullit kryen këto veprime:

b. paraqet rekomandime për vënien në vend të së drejtës së shkelur tek organi administrativ, që, sipas tij ka shkaktuar shkelje të të drejtave dhe lirive…;

c. paraqet rekomandime për marrje masash për vënien në vend të së drejtës së shkelur tek organi epror i organit që ka shkaktuar shkeljen…”

        R E K O M A N D O J M Ë :

1.Të merren masa urgjente për rikonstruksionin e dhomave te shoqerimit  per ndarjen e tyre për persona të mitur dhe femra në Komisariatin e Policisë Berat, sipas konceptimit të bërë në ligjin nr.9749, datë 04.06.2007 “Për Policinë e Shtetit”

2.Te marren masa urgjente per krijimin e dhomave te sigurise ne Komisaritatin e Policise Berat dhe te behen shtesa ne organiken e ketij komisariati me qellim permbushjen efektive te ketij sherbimi.

3.Të merren masa për ekspozimin e posterave për të drejtat e personave të shoqëruar, ndaluar apo arrestuar nga policia.

4. Të merren masa, që në librat e shoqërimit, ndalimit apo arrestimit të shtetasve të hapen rubrika për njoftimin e familjarve dhe avokatit mbrojtës.

       Për masat që do të merrni në zbatim të këtij rekomandimi, lutemi të na vini në dijeni brenda afatit ligjor prej 30 ditësh, të përcaktuar në nenin 22 të ligjit “Për Avokatin e Popullit”.

Duke besuar në bashkëpunimin Tuaj,

AVOKATI  I  POPULLIT

        Ermir  DOBJANI