Duke marrë shkas nga një shkrim në media si dhe ankimi i fëmijës Ergest Shele Shtëpia e Fëmijës Sarandë, për kryerjen e veprimeve haptazi të paligjshme nga ana e policisë Sarandë, si: ndalimi i tij në polici ndonëse mosha e tij është 11 vjeç e gjysëm, përdorimi i dhunës fizike (rrahje, prerje të trupit me thikë, fikje cigaresh në trup e të pështyrë në gojë si dhe veprime të tjera ndaj tij), bëmë verifikimin e çështjes në vënd. Nga verifikimi rezultoi se punonjësi i policisë kriminale të rrethit Sarandë, Rrapo Xhevara, në datën 26.06.2000, ka kryer veprime haptazi të paligjshme duke dhunuar kështu në mënyrë brutale të drejtat dhe liritë themelore të njeriut, të cilat “janë të pandashme, të patjetërsueshme e të padhunueshme dhe qëndrojnë në themel të të gjithë rendit juridik” (neni 15 i Kushtetutës).

          1. Marrja dhe shoqërimi në Komisariatin e Policisë Sarandë, të fëmijës Ergest Shele, në datën 26.06.2000 ora 16³⁰ si dhe mbajtja e tij deri në datën 27.06.2000 ora 12³⁰, për një kohë prej 20 orësh, është haptazi e paligjshme dhe në kundërshtim me të gjitha kriteret ligjore që nevojiten në këto raste. Kjo, për faktin se nga njëra anë, Ergest Shele për shkak të të qënurit të tij fëmijë, në moshën 11 vjeç e gjysëm, nuk është subjekt për t’u ndaluar apo shoqëruar në polici, mbasi nuk plotëson moshën për përgjegjësi penale, 14 vjeç (neni 12 i K.P.), kurse nga ana tjetër, në drejtim të tij nuk ka pasur asnjë të dhënë si autor i mundshëm i vjedhjes së çantës me të holla të qytetarit Fredi Marto.

          2. Po kështu, gjatë kohës që ai është mbajtur në polici, ndonëse nuk është marrë me cilësinë e të pandehurit, pasi ka qënë nën moshën ligjore (14 vjeç), në realitet është trajtuar me këtë cilësi, duke i bërë pyetje mbi autorësinë e vjedhjes ndaj qytetarit Fredi Marto si dhe kryer veprime të tjera me karakter hetimor, me Odise dhe Erion Qurku etj, të cilat përshkruhen në mënyrë të hollësishme në raportin e shërbimit të policisë dt.26.06.2000. Për më tepër, këto veprime janë kryer pa praninë e një kujdestari apo mbrojtësi të tij, për të siguruar objektivitetin në kryerjen e këtij veprimi dhe dhënien e shpjegimeve të lira e të vullnetshme nga personi i pyetur. Kjo, ka sjellë si pasojë që Ergest Shele të marrë përsipër autorësinë e veprës penale pa qënë në fakt autor i saj, ndërkohë kur siç ka rezultuar në fakt, autor i kësaj vepre është një person tjetër.

          3. Gjithashtu, gjatë qëndrimit të Ergest Sheles në polici, ndaj tij është përdorur dhunë, duke e goditur me shkop gome, me thikë në krahun e djathtë, duke i fikur cigaren në trup etj, fakte këto jo vetëm që pretendohen nga ankuesi por që edhe konfirmohen nga edukatoret e tij të Shtëpisë së Fëmijës Sarandë, të cilat e kanë parë dhe mjekuar atë pas daljes nga komisariati i policisë. Çarja e krahut të djathtë me thikë dhe fikja e cigares në trup, u konstatua edhe nga punonjësi jonë i dërguar për verifikimin e çështjes, ndonëse nga momenti i shkaktimit të tyre ka kaluar  gati një muaj kohë.

          Nga sa më sipër del në mënyrë të qartë dhe bindëse se oficeri i policisë Sarandë, z. Rrapo Xhevara ka vepruar haptazi e në mënyrë brutale në kundërshtim me Kushtetutën dhe ligjin penalo procedurial, duke shkelur dhe dëmtuar rëndë lirinë dhe të drejtat e qytetarit Ergest Shele. Veprimet e kryera nga ana e këtij oficeri të policisë janë të kryera me dashje dhe ndërgjegje të plotë. Përgjegjësi, mendojmë se kanë edhe drejtuesit e komisariatit të policisë Sarandë, të cilët me ardhjen në dijeni, duhet të kishin parandaluar këtë shkelje të rëndë të të drejtave të njeriut nga vartësi i tyre.

          Duke u nisur nga shkelja e rëndë e lirisë dhe të drejtave të njeriut, të Ergest Sheles, të cilat përbëjnë elementet e një vepre penale, kërkuam para Prokurorisë së Rrethit Sarandë, ndjekjen penale të tij, ndërsa Ju në bazë të nenit 63 të Kushtetutës si dhe neneve 21 e 22 të ligjit nr.8454 dt.04.02,1999 “Për Avokatin e Popullit”, ju,

P R O P O Z O J M Ë

          1. Nxjerrjen në lirim të oficerit Rrapo Xhevara.

          2. Analizën e çështjes në komisariatin e policisë Sarandë për të nxjerrë përgjegjësinë e personave të tjerë.

          Për masat e marra lutemi të njoftohet Organi ynë brënda 30 ditëve.

          Bashkëlidhur ju dërgojmë 6 copë fotokopje mbi bazën e të cilave është bazuar propozimi ynë.

                                                               AVOKATI  I  POPULLIT

         ERMIR DOBJANI