Nr. 1097 Regj.                                            Tirane, me 12.7.2005

Lënda: Njoftim për masat e marra rreth rekomandimeve të Avokatit të Popullit

Avokatit të Popullit

Seksionit të Veçantë

TIRANE

Në respekt të vlerësimeve të bëra nga ana e Juaj për punën dhe aktivitetin e Brigadës së Stërvitjes bazë Bunavi, si dhe duke vlerësuar ndihmesën Tuaj në lidhje me Rekomandimet e dhëna për zgjidhjen e problemeve që ishin objekt i inspektimit Tuaj, ju njoftojmë se janë marrë masa dhe vijojnë ato për përmirësimin e problemeve dhe shqetësimeve të ngritura.

Për sa më sipër në mënyrë të detajuar Ju njoftojmë:

Për çuarjen në parametrat e lejuara të kubaturës për frymë, kanë filluar punimet për ndërtimin e një fjetine të re katër katëshe prej muajit Qershor 2005, e cila përfundon në vitin 2006. Përfundimi i kësaj fjetine krijon kushte optimale jetese dhe me standarte të larta të kushteve higjeno-sanitare. Në kushtet aktuale kemi në kontroll të plotë gjendjen e  higjenës dhe gjendjen shëndetësore të efektivave.

Në kushtet e mungesës së bibliotekës janë marrë të gjitha masat që literatura me të cilën furnizohet njësia të shpërndahet në reparte e nënreparte, me qëllim që ajo të jetë sa më afër ushtarëve dhe oficerëve e nënoficerëve për t’u shfrytëzuar. Ne kemi planizuar që në të ardhmen e afërt brenda mjediseve të klasave të përshtatim vendosjen e një biblioteke të centralizuar në bazë Brigade.

Në lidhje me problemet e shqetësimet që ngrihen për trajtimin e ushtarëve ju njoftojmë se janë marrë masa për mos cënimin e korrespondencës së ushtarëve, duke centralizuar marrjen e saj nga zyrat përkatëse e qytetit të Vlorës dhe shpërndarjen e saj me përgjegjësi tek ushtarët.

Me qëllim që ushtarët të shohin programet televizive në përputhje me orarin e veprimeve janë marrë masa që në kompani të ketë televizor, si dhe të organizohet nga personeli përgjegjës shikimi i programeve.

Përsa i përket larjes së ushtarëve me ujë të ngrohtë janë realizuar kushtet e nevojshme për larjen e efektivave çdo ditë individualisht megjithatë janë dhënë udhëzime që larja e tyre të vihet në kontroll nga nivelet përgjegjëse dhe ushtarët të kontrollohen çdo ditë gjatë kontrollit të mbrëmjes nga personeli i shërbimit. Larja e teshave të efektivave bëhet nga firmat private, gjë e cila ka rritur së tepërmi nivelin në këtë shërbim.

Në çdo cikël stërvitor në Brigadë organizohen aktivitete të ndryshme me karakter edukativ dhe argëtues. Kemi planizuar dhe realizuar me ushtarët që vijnë kryesisht nga zonat veriore të vendit vizita në qytetin e Vlorës në “Muzeun e Pavarësisë” dhe përgjatë rivierës së Vlorës kemi zhvilluar aktivitete të përbashkëta me të rinjtë e shkollës së mesme “Ali Demi” si dhe kemi sjellë në repart parodistët e Vlorës dhe për çdo cikël ansamblin e ushtrisë.

Për çdo cikël organizohen aktivitete sportive si kampionat futbolli dhe gara të ndryshme. Me gjithë punën e bërë në këtë drejtim jemi të ndërgjegjshëm se akoma më shumë e më mirë duhet organizuar koha e lirë e ushtarëve.

Për njohjen e ushtarëve me legjislacionin, sidomos për ligjet kryesore që veprojnë në fushën ushtarake, në programin e stërvitjes bazë kemi planizuar tema të veçanta për njohjen e ligjeve: “Statusit të Ushtarakut”, ligjit “Për disiplinën në Forcat e Armatosura të Republikës së Shqipërisë”, ligjit “Për shërbimin ushtarak në Republikën e Shqipërisë”, “Për gradat dhe karrierën në ushtri”, ligjeve ndërkombëtare të luftës si “Konventa e Gjenevës dhe e Hagës” etj. Për njohjen e kërkesave themelore të këtyre ligjeve tek ushtarët janë përgatitur leksione në zbërthim të tyre dhe me instruktorët zhvillohen trajnime për kuptimin e trajtimin më mirë të tyre.

Përfundimet tuaja lidhur me theksimin që duhet t’i bëhet edukimit të ushtarëve me frymën e këtyre ligjeve janë marrë në konsideratë nga ana jonë dhe po reflektohet më së miri në rritjen e nivelit të vet personelit mësimdhënës nëpërmjet programeve të trajnimit që zhvillojmë me ta para çdo cikli stërvitor.

Ju bëj me dije dhe Ju siguroj se i gjithë personeli i Brigadës së Stërvitjes Bazë është në një proces permanent pune ku prioriteti kryesor mbetet sigurimi maksimal i kushteve të jetesës së ushtarëve dhe edukimi i tyre.

Me konsideratë të veçantë

KOMANDANTI I REPARTIT USHTARAK 5570

KOLONEL VLADIMIR QIRJAZI

(firma, vula)