Nr. 6922/1 Prot.                                        Tirane, me 09.12.2009

LËNDA:               Kthim përgjigje

DREJTUAR:      Z. Ermir Dobjani

                             Avokati i Popullit

TIRANË

Në përgjigje të shkresës suaj nr. KAB/D24-4 prot, datë 13.11.2009, lidhur me rekomandimin për zbatimin e Statutit të Universitetit Bujqësor të Tiranës për hyrjen në fuqi të Rregullores së studimeve të ciklit të dytë, në Fakultetin e Ekonomisë dhe Agrobiznesit, ju bëjmë me dije si më poshtë:

Së pari: Në zbatim të nenit 39, të ligjit nr. 9741, datë 21.05.2007 “Për arsimin e lartë në Republikën e Shqipërisë”, i ndryshuar, Ministria e Arsimit dhe Shkencës ka realizuar kontrollin e ligjshmërisë së këtij statuti dhe pas këtij kontrolli përgatiti rekomandimet dhe sugjerimet përkatëse lidhur me problematikat që ky statut paraqet, të cilat i janë dërguar Universitetit Bujqësor të Tiranës.

Gjithashtu është vendosur realizimi i një takimi të posaçëm me përfaqësues të këtij universiteti për diskutimin e çështjeve të ndryshme të statutit dhe asnjë përfaqësues i këtij universiteti nuk u paraqit në MASH, në datën dhe orën e caktuar, megjithatë Ministria po bën ende përpjekjet e saj për reflektimin e rekomandimeve tona në statut, me qëllim miratimin e tij nga kjo e fundit, në përputhje me ligjin e sipërcituar.

Duke qenë se statuti në fjalë nuk është miratuar, për rrjedhim as Rregullorja e studimeve të ciklit të dytë, në Fakultetin e Ekonomisë dhe Agrobiznesit, nuk mund të hyjë në fuqi.

Së dyti: Lidhur me ankesën e një grupi student­ësh, të cilët pretendojnë se duhet të zhvillojnë studimet në ciklin e dytë, në përfundim të të cilit të merret Diplomë e Nivelit të Dytë (DND), ju sqarojmë se: Ministria e Arsimit dhe Shkencës, mbi bazën e kërkesës së bërë nga Universiteti Bujqësor i Tiranës, përgatiti ndryshimin e Vendimit nr. 984, datë 30.09.2009 të Këshillit të Ministrave “Për kuotat e pranimit dhe tarifat e shkollimit në institucionet publike të arsimit të lartë për ciklin e dytë të studimeve dhe master i nivelit të parë me kohë të plotë, për vitin akademik 2009-2010”, i ndryshuar, për të shtuar numrin e kuotave të programeve të studimit, në ciklin e dytë, për këtë universitet.

Më tej Universiteti Bujqësor i Tiranës, bazuar në nenin 34, pika 1 të ligjit nr. 9741, datë 21.05.2007 “Për arsimin e lartë në Republikën e Shqipërisë”, i ndryshuar, ka të drejtë të bëjë regjistrimin në ciklin e dytë të studimeve, në përfundim të të cilit të merret Diplomë e Nivelit të Dytë (DND), vetëm ata studentë që kanë përfunduar një program studimi të ciklit të parë, si dhe plotësojnë standartet akademike të kritereve të pranimit që paraqet ky institucion.

Ju falenderojmë për mirëkuptimin,

SEKRETAR I PËRGJITHSHËM

ANTONIETA LULI

(firma, vula)