Nr. 252/6 Prot.                                        Tirane, me 31.03.2009

Drejtuar          :      Z. Ermir Dobjani

Avokat i Popullit

Lënda           :        Mbi udhëzimin e përbashkët në zbatim të Vendimit

të Këshillit të Ministrave Nr.15, datë 14.01.2009

I nderuar zoti Dobjani,

Në vijim të kërkesës tuaj, dërguar me shkresën Nr. K2/L12-2 Prot, datë 25.03.2009 për informacion mbi udhëzimin e përbashkët në zbatim të Vendimit të Këshillit të Ministrave Nr.15, datë 14.01.2009, bashkëlidhur dërgojmë udhëzimin e përbashkët të Ministrisë së Financave, Ministrisë së Brendshme dhe Ministrisë së Punës, Çështjeve Sociale dhe Shanseve të Barabarta “Për rregullat dhe mënyrën e kompesimit të pagesës për pajisjen me letërnjoftim për shtresat në nevojë”.

Duke Ju falenderuar për mirëkuptimin,

MINISTRI

BUJAR NISHANI

(firma, vula)

________________________________________________________________

REPUBLIKA E SHQIPËRISË                        REPUBLIKA E SHQIPËRISË

Ministria e Financave                                            Ministria e Brendshme

Nr. 1026/1  Prot.                                                      Nr. 252/4  Prot.

REPUBLIKA E SHQIPËRISË

Ministria e Punës, Çështjeve Sociale dhe

Shanseve të Barbarta

Nr. 331/1 Prot.

U   D   H   Ë   Z   I   M

Nr. 252/4,  datë 25.2.2009

“PËR RREGULLAT DHE MËNYRËN E KOMPESIMIT TË PAGESËS PËR PAISJEN ME LETËRNJOFTIM PËR SHTRESAT NË NEVOJË”

Në zbatim të ligjit nr. 9936, datë 26.06.2008, “Për menaxhimin e sistemit buxhetor në Republikën e Shqipërisë” të ligjit nr. 10025, datë 27.11.2008 “Mbi buxhetin e vitit 2009”, të Vendimit të Këshillit të Ministrave, nr.15, datë 14.01.2009 “Për kompesimin e pagave për pajisjen me letërnjoftim për shtresat në nevojë”,

U D H Ë Z O J M Ë :

I.   Kompesimi i pagesës për familjet në ndihmë ekonomike

1.   Kompesimi i pagesës për pajisjen me letërnjoftim, në masën 700 (shtatëqind) lekë, për çdo anëtar familjeje, që trajtohet me ndihmë ekonomike dhe që është 18 vjeç, ose mbush këtë moshë para datës 30 Qershor 2009, bëhet në njësinë e qeverisjes vendore, pranë të cilës tërhiqet pagesa e ndihmës ekonomike, pasi të paraqesin një kopje të aplikimit për pajisje me letërnjoftim, e cila duhet të jetë para datës 30 maj 2009.

2.   Në fund të çdo muaji, çdo njësi e qeverisjes vendore dërgon në Ministrinë e Punës, Çështjeve Sociale dhe Shanseve të Barabarta, list-pagesën të shoqëruar me fotokopje të aplikimeve për letërnjoftim të përfituesve të kompesimit të paguar për muajin përkatës për personat që përfitojnë ndihmë ekonomike.

3.   Ministria e Punës dhe Çështjeve Sociale bazuar në list-pagesat e marra nga njësitë e qeverisjes vendore, paraqet menjëherë në Ministrinë e Financave, kërkesat e detajuara për fonde, sipas strukturës buxhetore ku çelet dhe përdoret ndihma ekonomike.

4.   Ministria e Financave bazuar në kërkesën e Ministrisë së Punës dhe Çështjeve Sociale bën çeljen e fondeve për këtë Ministri.

5.   Ministria e Punës dhe Çështjeve Sociale pas çeljes së fondeve nga Ministria e Financave bën rimbursimin e tyre për njësitë e qeverisjes vendore.

II.  Kompesimi i pagesës për personat me aftësi të kufizuara dhe anëtarët e familjeve të tyre.

1.   Kompesimi i pagesës për pajisjen me letërnjoftim, në masën 700 (shtatëqind) lekë, për çdo person me aftësi të kufizuara, si dhe i anëtarëve të familjes së tij, mbi 18 vjeç, kur personi me aftësi të kufizuar është kryefamiljar, bëhet në njësinë e qeverisjes vendore, pranë të cilës ai tërheq pagesën e aftësisë së kufizuar, pasi të paraqesin në njësitë e qeverisjes vendore një kopje të aplikimit për pajisje me letërnjoftim, për vehte dhe secilin anëtar të familjes, e cila duhet të jetë para datës 30 maj 2009.

2.   Në fund të çdo muaji, çdo njësi e qeverisjes vendore dërgon në Ministrinë e Punës Çështjeve Sociale dhe Shanseve të Barabarta, listë-pagesën të shoqëruar me fotokopje të aplikimeve për letërnjoftim të përfituesve të kompesimit të paguar, për muajin përkatës, për personat që përfitojnë pagesën e aftësisë së kufizuar.

3.   Ministria e Punës dhe Çështjeve Sociale bazuar në listë pagesat e marra nga njësitë e qeverisjes vendore, paraqet menjëherë në Ministrinë e Financave, kërkesat e detajuara për fonde sipas strukturës buxhetore ku çelet dhe përdoret pagesa e paaftësisë.

4.   Ministria e Financave bazuar në kërkesën e Ministrisë së Punës dhe Çështjeve Sociale bën çeljen e fondeve për këtë Ministri.

5.   Ministria e Punës dhe Çështjeve Sociale pas çeljes së fondeve nga Ministria e Financave bën rimbursimin e tyre për njësitë e qeverisjes vendore.

III. Kompesimi i pagesës për personat që përfitojnë pagesë papunësie

1.   Kompesimi i pagesës për pajisjen me letërnjoftim, në masën 700 (shtatëqind) lekë, për çdo person që përfiton pagesë papunësie, bëhet në zyrën përkatëse të punësimit, pranë të cilës ai tërheq pagesën e papunësisë, pasi të paraqesin në këtë zyrë një kopje të aplikimit për pajisje me letërnjoftim, e cila duhet të jetë para datës 30 maj 2009.

2.   Në fund të çdo muaji, çdo zyrë punësimi dërgon në Ministrinë e Punës, Çështjeve Sociale dhe Shanseve të Barabarta, listë-pagesën të shoqëruar me fotokopje të aplikimeve për letërnjoftim të përfituesve të kompesimit të paguar, për muajin përkatës, për personat që përfitojnë pagesën e papunësisë.

3.   Ministria e Punës dhe Çështjeve Sociale, bazuar në listë pagesat e marra nga zyrat e punës, menjëherë paraqet në Ministrinë e Financave, kërkesat e detajuara për fonde sipas strukturës buxhetore ku çelet dhe përdoret pagesa e papunësisë.

4.   Ministria e Financave bazuar në kërkesën e Ministrisë së Punës dhe Çështjeve Sociale bën çeljen e fondeve për këtë Ministri.

5.   Ministria e Punës dhe Çështjeve Sociale pas çeljes së fondeve nga Ministria e Financave bën rimbursimin e tyre për zyrat e punës.

IV. Kompesimi i pagesës për studentët

1.   Kompesimi i pagesës për pajisjen me letërnjoftim, në masën 700 (shtatëqind) lekë, për studentët që studiojnë në universitete dhe shkolla publike, bëhet pranë çdo universiteti (fakuleti), pranë të cilit ai studion, pasi të paraqesë në fakultet një kopje të aplikimit për pajisje me letërnjoftim, e cila duhet të jetë para datës 30 maj 2009.

2.   Në fund të çdo muaji, çdo Universitet dërgon në Ministrinë e Arsimit dhe të Shkencës, listë-pagesën të shoqëruar me fotokopje të aplikimeve për letërnjoftim të përfituesve të kompesimit të paguar, për muajin përkatës, për studentët.

3.   Ministria e Arsimit dhe të Shkencës bazuar në listë pagesat e marra nga Universitetet, menjëherë, paraqet në Ministrinë e Financave, kërkesat e detajuara për fonde në strukturën buxhetore që përfaqëson buxhetin e arsimit të lartë, specifikisht në artikullin 606.

4.   Ministria e Financave bazuar në kërkesën e Ministrisë së Arsimit dhe të Shkencës bën çeljen e fondeve për këtë Ministri.

5.   Ministria e Arsimit dhe të Shkencës pas çeljes së fondeve nga Ministria e Financave bën rimbursimin e tyre për universitetet.

V.  Kompesimi i pagesës për personat që përfitojnë pension.

1.   Kompesimi i pagesës për pajisjen me letërnjoftim, në masën 400 (katërqind) lekë, për personat që përfitojnë pension pleqërie, në fshat apo në qytet, të plotë apo të pjesshëm, për personat pa të ardhura në ngarkim të pensionistëve, si dhe për personat që përfitojnë pension invaliditeti, bëhet në zyrat ku merret pensioni, pasi përfituesi të paraqesë një kopje të aplikimit për pajisje me letërnjoftim, për vehte dhe për personat në ngarkim, e cila duhet të jetë para datës 30 maj 2009.

2.   Në fund të çdo muaji, çdo zyrë e sigurimeve shoqërore dërgon në Institutin e Sigurimeve Shoqërore, listë-pagesën të shoqëruar me fotokopje të aplikimeve për letërnjoftim të përfituesve të kompesimit të paguar, për muajin, për pensionistët dhe personat pa të ardhura, në ngarkim të tyre.

3.   Instituti i Sigurimeve Shoqërore bazuar në listë pagesat e marra, menjëherë paraqet në Ministrinë e Financave, kërkesat e detajuara për fonde, sipas strukturës buxhetore ku çelet dhe përdoret transferta për ISSH.

4.   Ministria e Financave bazuar në kërkesën e Institutit të Sigurimeve Shoqërore bën çeljen e fondeve për ISSH-në.

VI. Kompesimi i pagesës për punonjësit e institucioneve buxhetore (të qeverisjes qëndrore) dhe anëtarëve të familjeve të tyre

1.   Kompesimi i pagesës për pajisjen me letërnjoftim, në masën 200 (dyqind) lekë, për çdo punonjës buxhetor me pagë bruto nën 35 000 (tridhjetë e pesë mijë) lekë, dhe për anëtarët e familjeve të tyre në ngarkim, pa të ardhura, bëhet pranë punëdhënësit të tyre, pas paraqitjes një kopje të aplikimit për pajisje me letërnjoftim, për vehte dhe anëtarët e familjes në ngarkim pa të ardhura, i cili duhet të jetë para datës 30 maj 2009.

2.   Në fund të çdo muaji, çdo njësi shpenzuese dërgon në Ministrinë e Linjës / Institucionet listë-pagesën të shoqëruar me fotokopje të aplikimeve për letërnjoftim e përfituesve të kompesimit të paguar për muajin përkatës.

3.   Ministria e Linjës / Institucioni, bazuar në informacionin e marrë nga njësitë shpenzuese, menjëherë paraqet në Ministrinë e Financave, kërkesat e detajuara për fonde sipas strukturës buxhetore në artikullin 606.

4.   Ministria e Financave bazuar në kërkesën e ministrive të linjës, bën çeljen e fondeve për këto ministri.

5.   Ministria e linjës, pas çeljes së fondeve nga Ministria e Financave bëjnë rimbursimin e fondeve për njësitë shpenzuese.

6.   E njëjta proçedurë do të ndiqet edhe për punonjësit e spitaleve nga ISKSH.

VII. Kompesimi i pagesës për punonjësit e institucioneve buxhetore (të qeverisjes qendrore në vartësi të Ministrisë së Brendshme dhe të qeverisjes vendore) dhe anëtarëve të familjeve të tyre.

1.   Kompesimi i pagesës për pajisjen me letërnjoftim, në masën 200 (dyqind) lekë, për çdo punonjës buxhetor (të qeverisjes qendrore në vartësi të Ministrisë së Brendshme dhe të qeverisjes vendore) me pagë bruto nën 35 000 (tridhjetë e pesë mijë) lekë, dhe për anëtarët e familjeve të tyre në ngarkim, pa të ardhura, bëhet pranë çdo prefekture ose nënprefekture me status prefekture, pas paraqitjes së një kopjeje të aplikimit për pajisje me letërnjoftim, për vehte dhe anëtarët e familjes në ngarkim pa të ardhura, i cili duhet të jetë para datës 30 maj 2009.

2.   Në fund të çdo muaji, çdo prefekturë ose nënprefekturë me status prefekture, dërgon në Ministrinë e Brendshme, listë-pagesën e përfituesve të shoqëruar me fotokopje të aplikimeve për letërnjoftim të kompesimit të paguar për muajin përkatës.

3.   Në fund të çdo muaji njësitë e qeverisjes vendore dërgojnë në Ministrinë e Brendshme listë-pagesën të shoqëruar me fotokopje të aplikimeve për letërnjoftim e përfituesve të kompesimit të paguar për muajin përkatës për punonjësit e gjendjes civile, sekretaret e deputetëve, seksionin e administrimit të tokës në qarqe, si dhe punonjësit e administratës së tyre.

4.   Ministria e Brendshme, bazuar në informacionin e marrë nga njësitë e qeverisjes vendore bën një kërkesë përmbledhëse për rimbursimin e fondeve në Ministrinë e Financave, për institucionet e varësisë së saj në strukturën përkatëse buxhetore ku punonjësit marrin pagën, ndërsa për njësitë vendore në artikullin 606, programin “… dhe funksione të deleguara të pushtetit vendor”.

5.   Ministria e Financave bazuar në kërkesën e Ministrisë së Brendshme, bën çeljen e fondeve për këtë ministri.

6.   Ministria e Brendshme, pas çeljes së fondeve nga Ministria e Financave bën rimbursimin e fondeve për institucionet e saj dhe njësitë e qeverisjes vendore.

7.   Të njëjtën procedurë duhet të ndjekë edhe Ministria e Ekonomisë, Tregtisë dhe Energjetikës për punonjësit të Qendrës Kombëtare të Regjistrimit të Biznesit, të cilët konsiderohen si funksion i deleguar në bashki.

Pas përfundimit të procesit të aplikimit për letërnjoftim dhe përfundimit të pagesave dhe rimbursimit të përfituesve, ministritë e linjës, duhet të dërgojnë në Ministrinë e Financave raportin përfundimtar financiar.

Ky udhëzim hyn në fuqi menjëherë.

Ridvan Bode                                                                Bujar Nishani

Ministër i Financave                                                    Ministër i Brendshëm

(firma, vula)                                                                         (firma, vula)

Anastas Duro

Ministër i Punës, Çështjeve Sociale

dhe Shanseve të Barabarta

(firma, vula)