Me vendimin e tij nr. 384 dt. 28.07.1999 Këshilli i Ministrave i Republikës së Shqipërisë ka miratuar programin "Për disa masa për fuqizimin e rendit dhe të sigurisë publike".

Në këtë program ndër detyrat e përcaktuara për Ministrinë e Drejtësisë është që brenda muajit gusht 1999 të bëhet riorganizimi i shërbimit të ruajtjes dhe shoqërimit të paraburgosurve, me synimin kalimin e këtij shërbimi nga policia e rendit në policinë e burgjeve.

Megjithëse ka kaluar një kohë e gjatë, nga gushti i vitit 1999 ky shërbim ende qëndron në vartësi të Ministrisë së Rendit Publik, ndonëse edhe në ligjin "Për Policinë e Shtetit" ky shërbim nuk është parashikuar si drejtim i punës së Ministrisë së Rendit Publik.

Në nenin 92 të "Rregullores së përgjithshme të burgjeve" miratuar me V.K.M. nr. 96 dt. 09.03.2000 është parashikuar që ndaj të paraburgosurve zbatohen dispozitat e kësaj rregulloreje. Por për sigurimin e trajtimin e të paraburgosurve edhe Ministri i Rendit Publik ka miratuar rregulloren nr.1075 dt.15.09.1999. Pra, për të njëjtën veprimtari, janë nxjerrë dy akte nënligjore.

Mendoj se do të ishte e drejtë dhe do të ndihmonte në funksionimin normal të administratës shtetërore respektimi i parimeve bazë në nxjerrjen e akteve nënligjore siç përcakton neni 118 i Kushtetutës se Republikës se Shqipërisë.

Në praktikën e punës se përditshme qëndrime të kësaj natyre sjellin anomali në veprimtarinë normale të administrates publike, si psh. ruajtja dhe trajtimi i të paraburgosurve per policinë e rendit është jashtë detyrave institucionale të saj, stafi i policisë se rendit është i paspecializuar per ruajtjen e trajtimin e të burgosurve etj, prandaj lutemi të na shpjegoni se cilat janë shkaqet që ky shërbim nuk kalon në vartësi të Ministrisë se Drejtësisë dhe çfarë masash janë marrë ose do merren per të zgjidhur këtë problem.

Duke ju falenderuar paraprakisht per mirëkuptimin,

AVOKATI  I  POPULLIT

        Ermir  DOBJANI