Nr.  168/1   Prot.                                 Tiranë, më 08/11/2005

Lenda:        Dërgohet informacioni mbi konkluzionet dhe rekomandimet e Komitetit kundër Torturës.

Drejtuar:    Ministrit të Brendshëm

                             Z. Sokol OLLDASHI

                                                                          Tiranë

          I nderuar z. Ministër,

          Konstatojmë me kënaqësi që me ardhjen Tuaj në drejtimin e Ministrisë së Brendshme, mardhëniet tona Institucionale në kryerjen e misioneve kushtetuese janë përmirësuar dukshëm. Kështu p.sh. mund të përmendim shpejtësinë dhe korrektësinë e treguar ne kthimin e përgjigjeve të shkresave, si dhe mirëpritjen, vlerësimin dhe zbatimin e disa rekomandimeve tona për mbrojtjen dhe respektimin e të drejtave të qytetarëve.

           Nga Ministria e Punëve të Jashtme, me shkresën Nr. 7539 Prot., dt. 14.06.2005, na është dërguar një informacion “Mbi konkluzionet dhe rekomandimet e Komitetit kundër Torturës`”. Disa nga këto rekomandime ne Jua kemi dërguar me shkresën tonë Nr. 168 Prot., dt. 07.10.2005, ne pikën V të saj, me titull “ Rekomandime për çështje të pazgjidhura”,  të cilat kanë të bëjnë me parandalimin e torturës dhe formave të tjera të keqtrajtimit dhe shkeljeve të ligjit nga policia. Kështu mund të përmëndim sidomos çështjet që kanë të bëjnë me personat që shoqërohen dhe pyeten në zyrat e Policisë si:

- të drejtën e individit të privuar nga liria, për njoftimin e një të afërmi ose të një të treti ose avokatit sipas dëshirës;

           - të drejtën e vizitës, efektivisht të zbatueshme, nga një mjek për personat e privuar nga liria, qysh në fillim të privimit të tyre nga liria;

           - çdo person të privuar nga liria prej policisë, t’i dorëzohet sistematikisht një formular ku saktësohen të drejtat e tij;

           - përpunimin e një udhëzimi të saktë (kod i sjelljes) për marrjen në pyetje nga policia të personave të ndaluar, arrestuar dhe për personat e mbajtur nga policia për qëllime administrative;

           - përmirësimin e kushteve të mbajtjes së shtetasve në qelitë e paraburgimit dhe në ambjentet e policisë;

           - akordimin e një buxheti të posaçëm organeve të policisë për të financuar ushqimin e të ndaluarve pa burime financiare, apo të huajëve që kapen duke kaluar kufirin shtetëror;

           - realizimin e plotë të kalimit të vartësisë së personelit të dhomave të izolimit nga Ministria e Rendit Publik në atë të Ministrisë së Drejtësisë;

           - formimin profesional fillestar dhe në vazhdim të punonjësve të policisë të të gjitha gradave dhe kategorive, si dhe përzgjedhjen dhe rekrutimin e punonjësve të rinj të policisë.

           - vendosjen e një numëri telefonik falas për komunikimin me Avokatin e Popullit të personave të izoluar nga Policia etj.

           Meqenëse shkresa e Ministrisë së Punëve të Jashtme, me Nr. 7539 Prot., dt. 14.06.2005, “Mbi konkluzionet dhe rekomandimet e Komitetit kundër Torturës`” është dërguar para emërimit Tuaj në detyrën e Ministrit të Brendshëm, po Jua dërgojmë atë me qëllimin e rakordimit të rekomandimeve tona me rekomandimet që jepen nga Komiteti kundër Torturës.

           Bashkëlidhur është shkresa e cituar më sipër.

           Duke besuar në mirëkuptimin Tuaj, presim përgjigje të veçantë për këto Rekomandime Specifike.