REPUBLIKA E SHQIPERISE

REZOLUTE

PER VLERESIMIN E VEPRIMTARISE SE INSTITUCIONIT TE AVOKATIT TE POPULLIT PER VITIN 2005

Kuvendi i Shqipërisë,

          - duke njohur dhe vlerësuar veprimtarinë e Avokatit të Popullit si një institucion jogjyqësor në ndihmë të qytetarëve, si dhe rolin e tij për rritjen e përgjegjshmërisë dhe transparencës së administratës publike, përfshirë organet ekzekutive të gjyqësorit dhe të prokurorisë;

          - duke konsideruar mbrojtjen e të drejtave të njeriut si një nga objektivat kryesore të këtij institucioni;

          - duke mbështetur punën e bërë për zbulimin e defekteve të administratës, denoncimin e sjelljeve të këqija të nëpunësve kundrejt shtetasve shqiptarë;

          - duke këmbëngulur në nxitjen e transparencës së administratës publike në veprimtarinë e saj dhe angazhimin në rritjen e cilësisë së shërbimeve publike;

në bazë të nenit 26, të ligjit nr.8454, datë 04.02.1999, “Për Avokatin e Popullit” dhe nenit 103, pika 2, të Rregullores së Kuvendit, pasi u njoh me Raportin për Veprimtarinë e Institucionit të Avokatit të Popullit për vitin 2005;

Konstatoi:

- punën e bërë nga institucioni i Avokatit të Popullit për dhënien e ndihmës ligjore në rastet e konflikteve midis administratës dhe publikut;

- rritjen e ngarkesës së punës së këtij institucioni, sikundër rezulton nga rritja e numrit të ankesave që i janë drejtuar atij, si dhe nga numri i rasteve të shqyrtuara në krahasim me një vit më parë;

- bërjen gjithnjë e më publike të veprimtarisë së këtij institucioni.

           Kuvendi kërkon që për vitin 2006 t’u kushtohet vëmendje e veçantë këtyre objektivave:

          - vazhdimit të bashkëpunimit me Kuvendin për informimin për shkallën e respektimit të të drejtave të njeriut, si dhe për shkeljet e administratës publike në Shqipëri;

          - rritjes së nivelit të bashkëpunimit me administratën publike shqiptare për rritjen e standardeve të qeverisjes, si dhe forcimit të bashkëpunimit me shoqërinë civile;

          - organizimit të ditëve të hapura në mënyrë periodike në zona të ndryshme të vendit, për të rritur shkallën e ndërgjegjësimit të publikut, si dhe zbatimit edhe të formave të tjera për t’iu afruar sa më shumë atij;

          - bërjes publike në mënyrë të vazhdueshme të shkeljeve të administrastës publike në fushën e të drejtave të njeriut, duke kërkuar edhe masa ndaj personave përgjegjës sipas ligjit;

          - rritjes cilësore të nivelit të raportimeve pranë organizmave ndërkombëtarë;

          - rritjes së këmbënguljes së institucionit për ndjekjen e rekomandimeve të dhëna për administratën publike shqiptare, përfshirë edhe gjyqësorin dhe prokurorinë.

Tirane, me 20.03.2005