REPUBLIKA E SHQIPERISE

PROJEKTREZOLUTË

PER VLERESIMIN E VEPRIMTARISE SE INSTITUCIONIT TE AVOKATIT TE POPULLIT PER VITIN 2008

Kuvendi i Shqipërisë,

- në vijimësi i ka kushtuar rëndësi institucionit të Avokatit të Popullit për mbrojtjen e të drejtave, lirive themelore dhe interesave të ligjshme të shtetasve nga veprimet ose mosveprimet e paligjshme e të parregullta të organeve të administratës publike;

- në vite ka vlerësuar rolin e këtij institucioni kushtetues të pavarur për rritjen e përgjegjshmërisë dhe transparencës së administratës shtetërore në nivel qendror e vendor, sistemit gjyqësor dhe prokurorisë nëpërmjet rekomandimeve të dhëna dhe masave të propozuara;

- ka mbështetur veprimtarinë e këtij institucioni për krijimin e standarteve bashkëkohore në fushën e mbrojtjes së të drejtave themelore të njeriut

Konstaton se:

1.  Institucioni i Avokatit të Popullit gjatë vitit 2008 ka punuar për përmbushjen e objektivave sipas rezolutës së miratuar nga Kuvendi;

2. Avokati i Popullit ka zhvilluar një volum pune të konsiderueshëm;

3. Ka mbajtur marrëdhënie të ngushta bashkëpunimi me Kuvendin, Këshillin e Ministrave, gjyqësorin, institucionet e tjera qendrore dhe ato të pavarura;

4. Mekanizmi Kundër Parandalimit të Torturës, që funksionin pranë këtij institucioni ka punuar për të pëmbushur angazhimet në përputhje me Konventën Europiane për Parandalimin e Torturës

5. Për herë të parë gjatë vitit 2008 ka paraqitur në Kuvend tre raporte të veçanta për gjendjen e shëndetit mendor në Republikën e Shqipërisë, për mbrojtjen e të drejtave të fëmijëve dhe për botimin e akteve ndërkombëtare të ratifikuara nga shteti shqiptar në fushën e të drejtave të njeriut.

Kuvendi kërkon për vitin 2009:

a) gjetjen e mundësive dhe zgjidhjeve nga ana e institucionit të Avokatit të Popullit për sensibilizimin e opinionit publik lidhur me kompetencat kushtetuese dhe ligjore të tij;

b) denoncimin në vijimësi të shkeljeve të të drejtave të shtetasve nga administrata shtetërore, qendrore apo vendore dhe rritjen e shkallës së ndërgjegjësimit të publikut për kërkimin e të drejtave të shkeluara, apo të mohuara;

c) përmbushjen me sukses të programit të inspektimit në komisariate policie, burgje, qendra paraburgimi, spitale, reparte ushtarake etj

 ç) thellimin e bashkëpunimit me Televizionin Publik Shqiptar dhe televizionet e tjera kombëtare apo lokale për të mbajtur një komunikim të drejtpërdrejtë me shtetasit shqiptarë;

d) ndjekjen e rekomandimeve të bëra nga ky institucion deri në realizimin e tyre;

dh) intensifikimin e bashkëpunimit me organizmat ndërkombëtare, shoqërinë civile dhe organizatat jofitimprurëse;

e) veprimtaria e njësisë për monitorimin dhe parandalimin e torturës që funksionon pranë Avokatit të Popullit  të ketë aksesin e duhur me akte ligjore apo nënligjore si edhe detyrimin për të zhvilluar inspektime.