REPUBLIKA E SHQIPERISE

REZOLUTE

PER VLERESIMIN E VEPRIMTARISE SE INSTITUCIONIT TE AVOKATIT TE POPULLIT PER VITIN 2007

Kuvendi i Shqipërisë,

- duke njohur rendësinë kushtetuese të Institucionit të Avokatit të Popullit për mbrojtjen e të drejtave, lirive dhe interesave të ligjshme të individit nga veprimet ore mosveprimet e paligjshme e të parregullta të organeve të administrates publike;

            - duke vlerësuar rolin e këtij institucionit të paanshëm për rritjen e përgjegjshmërisë dhe transparencës së administrates shtetërore në nivel qëndror e vendor, sistemit gjyqësor dhe prokurorisë nëpërmjet rekomandimeve të dhëna dhe masave të propozuara;

            - duke mbështetur fuqimisht veprimtarinë e këtij institucioni për krijimin e standarteve bashkëkohore në fushën e mbrojtjes së të drejtave themelore të njeriut dhe kontributit të dhënë për përmirësimin e legjislacionit vendas sipas standarteve ndërkombëtare,

Vëren se për vitin 2007:

            1. Veprimtaria e Institucionit të Avokatit të Popullit gjatë vitit 2007 ka synuar mbrojtjen e të drejtave të shtetasve shqiptarë, në përputhje me Kushtetutën, konventat ndërkombëtare dhe legjislacionin shqiptar;

            2. Institucioni i Avokatit të Popullit ka punuar për përmbushjen e objektivave sipas rezolutës së miratuar nga Kuvendi;

            3. Ka zhvilluar një volum pune të konsiderueshëm, duke i dhënë drejtimin e duhur edhe ankesave që janë jashtë juridiksionit të tij;

            4. Marrëdhëniet me Kuvendin, Këshillin e Ministrave, institucionet e tjera qendrore dhe ato të pavarura kanë ardhur duke u përmirësuar në mënyrë të ndjeshme;

            5. Marrëdhëniet me shtetasit shqiptarë, duke shkuar si institucion pranë tyre në bashki, komuna apo qarqe kanë dhënë rezultate të dukshme në punën e tij.

Kuvendi kërkon për vitin 2008:

            a) Angazhimin më të plotë të institucionit të Avokatit të Popullit për kryerjen e një punë informuese dhe sqaruese për kompetencat e tij kushtetuese dhe ligjore, si dhe për mbrojtjen e respektimin e të drejtave të njeriut;

            b) vendosjen e një marrëdhënie bashkëpunimi të vijueshëm me Televizionin Publik Shqiptar për të vendosur një komunikim të drejtpërdrejtë me të gjithë shtetasit shqiptarë;

            c) rritjen e shkallës së ndërgjegjësimit të publikut për kërkimin e të drejtave të shkelura apo të mohuara;

            d) vendosjen e mbajtjen e marrëdhënieve të bashkëpunimit e mirëkuptimit si me organizmat ndërkombëtare, ashtu edhe me forcat politike, shoqërinë civile, organizatat jofitimprurëse dhe median;

            dh) ndjekjen deri në përmbushje të rekomandimeve të bëra dhe masave të propozuara të këtij institucioni drejtuar institucioneve shtetërore dhe administrates publike;

            e) denoncimin në vijimësi të shkeljeve të të drejtave të shtetasve nga administrata shtetërore, qendrore apo vendore.

                                                                   K R Y E T A R E

                                                               Jozefina Topalli (Çoba)

14 prill 2008