Sot më datën 29.05.2003 në zyrën e Avokatit të Popullit u mblodhën përfaqësuesit e Shoqatës Kombëtare të ish të Përndjekurve Politike, kryesuar nga zoti Kurt Kola, Shoqatës së ish të Përndjekurve Demokratë Antikomunistë, të përfaqësuar nga zoti Afrim Haçi, Shoqatës Mbarëkombëtare të ish të Përndjekurve Politikë, përfaqësuar nga zoti Besim Ndregjoni si dhe përfaqësuesi i Qeverisë, Sekretari i Përgjithshëm, zoti Ylli Manjani dhe drejtori i Insitutit të Integrimit të ish Përndjekurve Politikë zoti Simon Miraka.

          Pjesëmarrësit pranuan rolin ndërmjetës, sipas Kushtetutës të Institucionit të Avokatit të Popullit dhe shprehën besimin e tyre në këtë rol të tij. Ata shprehën angazhimin e tyre për institucionalizimin e dialogut për gjetjen e zgjidhjeve të qëndrueshme për dëmshpërblimin e ish të përndjekurve brenda standarteve kushtetuese dhe ligjeve në fuqi. Qeveria kërkoi si kusht për vazhdimin e bisedimeve unifikimin e kërkesave të të gjitha shoqatave pa përjashtim, me qëllim që zgjidhja që do propozohet në institucionet vendimmarrëse Kushtetuese të jetë e gjithëpranueshme dhe përfundimtare. Palët gjithashtu ranë dakort që pas unifikimit të qëndrimeve të shoqatave të nënshkruajnë menjëherë një marrëveshje si bazë për fillimin e negociatave që do të çojnë në hartimin sa më shpejt të jetë e mundur të një projektligji që të çojë drejt zgjidhjes përfundimtare.