Kryeministri Fatos Nano takon Avokatin e Popullit Ermir Dobjani

          Kabineti i Kryeministrit njofton se Kryeministri Fatos Nano është takuar sot më 28 Maj 2003, me Avokatin e Popullit Ermir Dobjani.

          Në këtë takim, ndër të tjera, bashkëbiseduesit janë ndalur në mënyrë të veçantë në çështjen e ish të përndjekurve politikë.

          Kështu, për mënyrën e trajtimit ligjor të tyre, Kryeministri dhe Avokati i Popullit ranë dakort se kjo çështje duhet trajtuar në bashkëpunim me shoqatat e të përndjekurve, me qëllim gjetjen e zgjidhjeve afatgjata dhe të qëndrueshme.

          Kryeministri Nano u angazhua në verifikimin e detajuar të të gjithë veprimeve apo mosveprimeve të institucioneve të shtetit në zbatim të ligjit për shpërblimin e ish të dënuarve politike. Në takim, u theksua se Instituti i Integrimit të ish të përndjekurve politike duhet të luajë një rol më aktiv nga sa luan deri më sot.

          Bashkëbiseduesit theksuan nevojën e hartimit dhe nënshkrimit të një marrëveshjeje ndërmjet Qeverisë dhe Përfaqësisë së të përndjekurve politikë nën garancinë e Avokatit të Popullit. Kjo gjë garanton që Shoqatat e ish të përndjekurve të ndërtojnë një përfaqësi të tyren me qëllim që debati të institucionalizohet, duke nxjerrë palët nga konfrontimi absurd dhe duke i përfshirë ato në angazhime konkrete.

          Avokati i Popullit, Ermir Dobjani, u shpreh i gatshëm për të ofruar ndërmjetësimin e tij në çështjen në fjalë.