Tiranë, më 26/02/2004

Hapni Padi Civile Brenda Procesit Penal, për të Siguruar Dëmshpërblimin

 -Avokati i Popullit ngushëllon dhe këshillon familjarët e viktimave të Selenicës-

 Avokati i Popullit, z. Ermir Dobjani, vizitoi ditën e mërkurë, më 25 Shkurt 2004, familjarët e minatorëve Refat Tozaj dhe Eduart Memaj, viktima të tragjedisë së ndodhur në Minierën e bitumit në Selenice të Vlorës, duke i ngushëlluar dhe këshilluar ata për hapat e mëtejshëm që u takon të ndërmarrin për të siguruar drejtësi për humbjen e të dashurve të tyre.

“Ju këshilloj t’i drejtoheni organit të Prokurorisë së Rrethit të Vlorës dhe të kërkoni ngritjen e nje padie civile në kuadrin e procesit penal, tashmë të hapur”, këshilloi z. Dobjani në përgjigje të pyetjeve të familjarëve të viktimave.

“Si Institucion i Avokatit të Popullit, ne do të ndërmarrim hapat tona, duke rekomanduar që pasuria e sipërmarrësit francez në Shqipëri, të vihet nën sekuestro konservative, me qëllim sigurimin e një dëmshpërblimi sa më të drejtë për familjet e viktimave”, shtoi Avokati i Popullit në vijim të interesimit të tyre.

Avokati i Popullit e cilësoi vizitën e tij pranë familjeve të viktimave në vazhdën e reagimit të të gjitha strukturave përkatëse shtetërore, duke u shprehur me këtë rast se “është e vërtetë që privatizimet u kanë lënë dorë të lirë sipërmarrësve vendas e të huaj të thithin forcat e lira të punës dhe kjo është një gjë e mirë. Por, sakaq, ne të gjithë nuk mund të mbetemi duarjashtë teksa shohim që punëdhënësit privatë neglizhojnë të zbatojnë rregulloret e sigurisë teknike dhe kushtet e kontratave që sigurojnë të drejtat dhe detyrimet e duhura të punëmarrësve në raport me punëdhënësit”, u shpreh z. Dobjani.

Familjarët e viktimave e falenderuan Avokatin e Popullit, duke shprehur besimin se Institucioni që ai drejton do të vazhdojë të punojë gjithmonë e më shumë për të mbrojtur të drejtat e tyre dhe të të gjithë punonjësve shqiptarë në raport me administratorët, qofshin ata të huaj apo shqiptarë.

Zëdhënësi i Avokatit të Popullit