Tiranë, më 24/02/2009

Mbi konfliktin midis “Alba Film” sha dhe “Orafilm” shpk

                 Me daten 21.02.2009, rreth ores 16:00, shtetasi Kujtim Çashku, administrator i “Orafilm” shpk, qe ka si objekt zhvillimin e aktivitetit kulturor, kinematografik dhe edukimi universitar brenda e jashte vendit, ka telefonuar Avokatin e Popullit dhe i ka bere prezent shqetesimin e tij se, ne dt. 21.02.2009, ora 13.30, disa forca policie te shoqeruara nga Drejtori i “Alba Film”, kane shkuar ne ambjentet qe posedon shoqeria e tij dhe kane tentuar qe ta rrethojne ate me rrjete teli, duke nderprere procesin akademik. Ankuesi ngriti edhe pretendimin se gjate ketyre veprimeve ai eshte dhunuar fizikisht nga punonjesit e policise.

             Avokati i Popullit dergoi ne vend 3 eksperte, te cilat moren takim me z. Çashku. Sipas ankuesit, per shkak te goditjeve fizike dhe dhimbjeve te forta ai ishte rrezuar ne toke. Nderkohe, ankuesi pretendoi se nga policia, veç tij, jane dhunuar fizikisht edhe studentet e shkolles te cilet i ishin bashkuar atij per te kundershtuar paqesisht veprimet e punonjesve te “Alba Film” sha dhe te punonjesve te policise. Nga studentet e tij jane filmuar veprimet e dhunshme te policise. Pas goditjeve ai eshte vizituar ne urgjencen e QSU “Nene Tereza” Tirane dhe i eshte dhene mjekim.

             Avokati i Popullit nuk e paragjykon çeshtjen, por deklaron se nuk e ve ne diskutim vertetesine e thenieve te z. Çashku  per ushtrim dhune ndaj tij.

             Ne daten 23.02.2009, paradite, Avokati i Popullit se bashku me dy eksperte shkuan ne ambjentet e “ Orafilm ” shpk  dhe degjuan edhe nje here pretendimet e z. Çashku. Gjthashtu u mor takim edhe me Drejtorin e “Alba Film”. Gjate ketyre kontakteve u hodh ideja qe mosmarreveshja e tyre te zgjidhej ne rruge gjyqesore, pasi rrethimi i shkolles “Marubi” me police nuk ishte zgjidhja e duhur. Kete ide e mbeshteten edhe palet ne keto takime. Por, paraditen e sotme Policia e Shtetit ka hyre me dhune brenda hapesirave te Universitetit Marubi, duke shoqeruar forcerisht z. Kujtim Cashku dhe 4 studente, ne Komisariatin e Policise Nr. 4 Tirane.

             Ne kontaktet qe ekspertet e Avokatit te Popullit kane patur me keta persona brenda ne Komisariat eshte pretenduar per dhune dhe disa prej tyre jane drejtuar me vendimet perkatese per ekzaminim mjeko-ligjor.

             Perpara precipitimit te ngjarjes se mesiperme, Avokati i Popullit dje dhe diten e sotme ka punuar qe te mos perdorej policia ne kete konflikt civil dhe i ka paraqitur nje rekomandim Drejtorise se Policise se Qarkut Tirane, ku ka kerkuar qe Policia e Shtetit te pezulloje te gjitha veprimet administrative te organeve te saj vendore ne zbatim te kerkesave te “Alba Film” sha, deri ne perfundim te shqyrtimit gjyqesor te kesaj çeshtje.

             Nga studimi i VKM nr. 1445, dt. 29.10.2008 dhe i veprimeve administrative te kryera rezulton se permbajtja e tyre ka te meta serioze sepse:

             Se pari, vendimi i qeverise nuk pershkruan dhe nuk ka bashkelidhur genplanin e prones qe do t’i jepet me qira “TOP CHANNEL”. Ndersa ne fakt policise i eshte derguar nje genplan bashkelidhur VKM-se. Nga pyetja e Drejtorit te “Alba Film” sha, rezultoi se genplani ishte bere prej Drejtorise se “Alba Film” sha dhe se nuk ishte pjese e VKM-se.

             Se dyti, VKM-ja nuk pershkruan si subjekt detyrues “Orafilm” shpk, per te liruar e dorezuar hapsirat te cilat ajo posedon.

             Se treti, Avokati i Popullit gjykon se ky konflikt midis “Orafilm” shpk dhe “Alba Film” sha, eshte nje mosmarrveshje juridiko-civile dhe si e tille duhet zgjidhur nga Gjykata e Rrethit Gjyqesor Tirane.

             Nga “Alba Film” sha jemi informuar se, ne muajin Tetor 2008, ky konflikt ka nisur te gjykohet ne Gjykaten e Rrethit Gjyqesor Tirane, me kerkese padine e bere nga “Alba Film” sha. Por per shkak te gabimeve dhe mosnjohjes se ligjit, kerkese padia eshte kthyer per t’u plotesuar, pasi kishte te meta.

             Se katerti, organet e policise, para se t’i jepnin mbeshtetjen ne terren subjektit juridik “Alba Film” sha, duhet te kishin studjuar me kujdes dokumentacionin e paraqitur prej ketij subjekti dhe te mos ushtronin veprime represive ndaj studenteve dhe pedagogeve te Shkolles Marubi.

             Se pesti, sipas nenit 3, pika 6 te ligjit nr. 8741, dt. 21.05.2007 “Per arsimin e larte ne RSH”, shteti garanton paprekshmerine e institucioneve te arsimit te larte dhe nderhyrja e organeve te policise ne mjediset e tyre behet vetem me kerkese dhe leje te titullarit te institucionit te arsimit te larte. Vetem ne rastet e kryerjes se nje krimi flagrant apo te nje fatkeqesie natyre, policia ka te drejte qe te nderhyje edhe pa lejen e titullarit. Cenimi i ketyre institucioneve ndeshkohet sipas dispozitave ligjore ne fuqi.

             Se gjashti, Avokati i Popullit po vijon hetimet per veprime arbitrare te punonjesve  te policise ne dem te te drejtave dhe interesave te ligjshme te stafit pedagogjik dhe studenteve.

              Ne perfundim, Avokati i Popullit ka detyrimin moral te deklaroje se sulmi ndaj nje Pioneri te demokracise dhe te te drejtave te njeriut, siç eshte Z. Çashku, nuk i ben aspak mire konsolidimit te vlerave tona shoqerore dhe imazhit tone nderkombetar.

             Me lejoni t'ju kujtoj se Z. Çashku sot perkujton nismen e tij te pare, para 18 vjetesh, per lirimin e te denuarve politike. Edhe per kete shkak, ai mbetet dhe personalitet me integritet, dhe si nje kineast ikone, duhet te gezoje respektin e veçante nga te gjitha organet shteterore. Aq me teper qe eshte dekoruar edhe Ambasador i Paqes, nga Presidenti i Republikes.

          Per shkak te ketij kontributi, Zotit Çashku i takon me teper se kujtdo tjeter qe te kete te gjitha lehtesirat individuale per te kryer aktivitetin ne sherbim te kultures shqiptare ne fushen e kinematografise, mbase me teper edhe se vete bizneset qe jane ushtrojne veprimtarine e tyre ne te njejtat ambjente.

Zëdhënësi i Avokatit të Popullit