Tirane 21/10/2003

Zhvilloi Punimet Kongresi i Tretë i Ombudsmanëve dhe Mediatorëve Frankofone

- Avokati i Popullit, z. Ermir Dobjani zgjidhet Anëtar i Këshillit Administrativ -

Avokati i Popullit, z. Ermir Dobjani, mori pjesë në Kongresin e 3-të të Ombudsmanëve dhe Mediatorëve Frankofonë, ku mbajti edhe kumtesën me temë “Aksesi i Ombudsmanit në dokumentet zyrtare”.

“Duke qenë realist për gjendjen aktuale të ndërgjegjësimit të administratës shqiptare për rëndësinë e informimit për dokumentet zyrtare, konstatoj se ka filluar një përmirësim i ndjeshëm jo vetëm në praktikën e dhënies së informacionit, por edhe në metodikën dhe organizimin e punës së organeve përkatëse në këtë drejtim”, u shpreh Dobjani në kumtesën e tij.

          Fjala e Avokatit të Popullit u pasua nga pyetjet e shumë të pranishmëve, të cilët vlerësuan rolin e Avokatit të Popullit në Shqipëri, kompetencat e tij si dhe familjarizimin relativisht të shpejtë të administratës shqiptare me funksionimin e këtij institucioni të rëndësishëm, garant të procedurave demokratike në Shqipëri. 

          Ombudsmanët dhe Mediatorët e Frankofonisë të mbledhur në këtë Kongres Ndërkombëtar, mbajtur nga 14-17 Tetor 2003 në Yasmine Hammamet të Tunizisë, shpallën nevojën për të mbrojtur vlerat e demokracisë, të shtetit të së drejtës dhe të drejtat e individit.

Kryetema e këtij Kongresi ishte ndërgjegjësimi dhe rritja e “Transparencës Administrative”, ku protagonistë janë pikërisht Ombudsmanët dhe Mediatorët, si ndikues në rritjen e besimit të publikut tek administrata, e për pasojë tek forcimi i shtetit të së drejtës, si parakusht edhe për mbrojtjen e të drejtave të njeriut.

Kongresi i 3-të Statutor i Shoqatës së Ombudsmanëve dhe Mediatorëve të Frankofonisë (SHOMF) miratoi edhe një deklaratë përfundimtare, e cila rithekson rolin e Ombudsmanëve dhe Mediatorëve, si mbrojtës të të drejtave të qytetarëve nga gabimet, neglizhenca, padrejtësitë dhe abuzimet që mund të bëjnë autoritetet publike ndaj qytetarëve.

          Deklarata finale vlerëson se Ombudsmanët dhe Mediatorët janë instrumente shumë efektive për të matur sa më saktësisht gjendjen e demokracisë dhe realizueshmërinë e të drejtave të njeriut në një vend.

          Ndër të tjera, deklarata përfundimtare i fton anëtarët e kësaj Shoqate që të veprojnë kur ka interesa të përbashkëta, në bashkëpunim me organizatat jofitimprurëse të mbrojtjes së të drejtave të njeriut, në emër të solidaritetit që duhet t’i bashkojë ata që punojnë për këtë mision të lartë.

Shoqata e Ombudsmanit Frankofon, anëtar i së cilës është edhe Avokati i Popullit i vendit tonë, grupon rreth 40 Ombudsmanë dhe Mediatorë nga 30 vende të botës. Misioni i kësaj shoqate ndërkombëtare është gjetja dhe përdorimi i të gjitha mjeteve të mundura për t’u shërbyer më mirë interesave të qytetarëve.

Në përfundim të Kongresit, Avokati i Popullit, z. Ermir Dobjani u zgjodh anëtar i Këshillit Administrativ të kësaj Shoqate.

Zedhenesi i AVOKATIT TE POPULLIT