Tirane 15/09/2003

Ambasadori Robert Barry takon Avokatin e Popullit

Avokati i Popullit Ermir Dobjani priti sot (e hene) në zyrën e tij Ambasadorin Robert Barry, Kryetar i Misionit te OSBE/ODIHR për Vëzhgimin e Zgjedhjeve për organet e pushtetit lokal 2003 në vendin tonë.

Bashkëbiseduesit shkëmbyen mendime në funksion të mbarëvajtjes së procesit zgjedhor në vend. Në interesim të Ambasadorit Barry, z. Dobjani vlerësoi se që pas zgjedhjeve të vitit 2001, partitë politike, qeveria dhe institucionet e tjera të shtetit shqiptar kanë qenë të angazhuara për krijimin e infrastrukturës së përshtatshme, me qëllim të sigurimit të një procesi zgjedhor të hapur, të lirë e të ndershëm, të gjitha këto në funksion të sigurimit të një rezultati sa më të pakontestueshëm.

Ambasadori Barry vlerësoi kontributin e Institucionit të Avokatit të Popullit në drejtim të përmirësimit të listave të votuesve, të pastrimit të KZQV-ve nga anëtarët e inkriminuar në proceset e mëparshme si dhe në drejtim të sigurimit të monitorimit të medias nga bordi i posaçëm, krijuar për këtë qëllim.

Avokati i Popullit u shpreh i gatshem për të ofruar kontributin e tij në drejtim të mirëfunksionimit të procedurave të ankimit, për shkelje të mundshme që mund të kryhen gjatë procesit zgjedhor, veçanërisht ditën e zgjedhjeve dhe në procesin e numërimit të votave.

Zedhenesi i AVOKATIT TE POPULLIT