Tiranë, më 12/12/2005

E Drejta e Informimit Kerkon Transparence dhe Vullnet Politik

-Avokati i Popullit dhe USAID organizojne tryeze te rrumbullaket-

           Avokati i Popullit dhe Zyra Casalts, Projekti per Shtetin e se Drejtes, ne kuadrin e Agjensise Amerikane per Zhvillim Nderkombetar (USAID), bashke-organizuan sot, me 12 Dhjetor 2005, nje tryeze te rrumbullaket per diskutimin e nje projekt rregulloreje qe synon zbatimin me sukses dhe ne menyre te unifikuar te Ligjit për të drejtën e informimit në Shqipëri.

Në takim merrnin pjesë përfaqësues të institucioneve të ndryshme shtetërore qendrore dhe vendore, të pavarura si dhe nga organet e drejtësisë.

“Në Shqipërinë tonë të kohës së ish komunizmit, as që mund të flitej për gëzimin real të të drejtave dhe lirive themelore të njeriut dhe aq më tepër për të drejtën e shtetasve për të marre informacion për punët e shtetit”, tha ne fjalen e hapjes Avokati i Popullit, z. Ermir Dobjani.

“Por nga viti në vit, shteti i së drejtës në Shqipëri mori zhvillim, sepse nje nga qellimet me te rendesishme te tij, eshte garantimi i se drejtes se çdokujt që te kete akses ne te dhenat e interesit publik dhe të mbrojë te dhenat e tij personale”, vijoi Dobjani, i cili pershendeti sfiden që ka ndërmarre Qeveria e re Demokratike per rritjen e transparences ne favor te mireqeverisjes.

Zëvendëskryeministri Ilir Rusmajli theksoi mes të tjerave, se “Qeveria shqiptare është mjaft e interesuar për realizimin me transparencë të së drejtës për informim”. “Eshtë vullnet i qeverisë informimi i publikut me transparencë të plotë, pasi vlerësohet si mjet që ndihmon për luftën kundër korrupsionit dhe krimit”, - tha Rusmajli, i cili shtoi se “tashme asnje institucion nuk mund te justifikohet më për mungesën e njohjes së ligjit “Për të Drejtën e Informimit””.

“Zbatimi i ligjit për të drejtën e informimit është kritik për administratën publike në Shqipëri. Ruajtja e të drejtës së qytetarit për t’u informuar është guri i themelit për qeverisje transparente dhe të përgjegjshme”, tha në fjalën e tij, drejtuesi i Zyrës së Demokracisë dhe Qeverisjes të USAID-it, Bruce Kay, programi i të cilit ka për qëllim forcimin e shtetit ligjor në Shqipëri.

 Avokati i Popullit, Ermir Dobjani, prezantoi për pjesëmarrësit Projekt Rregulloren e të Drejtës së Informimit, të hartuar së bashku me USAID-in, të cilën çdo institucion publik dhe shtetëror, duhet ta zbatojë për çdo qytetar.

Në takim u bënë komente të ndryshme për përmirësimin e pikave të veçanta, si dhe u vu theksi në domosdoshmërinë për të sensibilizuar sa më shumë qytetarët për të drejtën që kanë për informim, si shprehje e rritjes së kulturës qytetare dhe demokracisë në vend.

Projekt-rregullorja në fjalë do të përmirësohet dhe do t’u paraqitet te gjithë institucioneve si një Rekomandim i Avokatit të Popullit.

Zëdhënësi i Avokatit të Popullit