Tiranë, më 11/12/2003

Nxitet bashkëpunimi rajonal midis zyrave të Avokatit të Popullit të shteteve të Ballkanit

Sot, më datë 11 Dhjetor 2003, Avokati i Popullit z. Ermir Dobjani u takua në qytetin e Pogradecit me Avokatin e Popullit të Maqedonisë, z. Branko Naumovski.

Në takim merrte pjesë edhe i Ngarkuari me Punë i Ambasadës së Mbretërisë së Danimarkës në Tiranë, z. Fin Theilgard.

Takimi u iniciua nga Avokati i Popullit, z. Dobjani, me qëllim të hartimit të një projekti rajonal ndërkufitar, ku pritet të përfshihen zyrat e Avokatit të Popullit të Shqipërisë, Maqedonisë, Kosovës, Malit të Zi si dhe eventualisht të Greqisë.

Ky projekt do të fokusohet veçanërisht në drejtim të ngritjes së zyrave rajonale të përfaqësuesve të Avokatit të Popullit në qendrat kryesore urbane të zonave kufitare në secilin nga shtetet e mësipërm.

Përfaqësuesi i Mbretërisë së Danimarkës, z. Fin Theilgard përkrahu idenë e projektit dhe kërkoi që përfituesit e mundshëm të japin sa më shumë argumente mbi domosdoshmërinë e këtij projekti në favor të mbrojtjes së të drejtave të njeriut në zonat përkatëse.

Bashkëbiseduesit vendosën që këtë ide tua bëjnë të njohur edhe homologëve të tyre të Kosovës, Malit të Zi dhe Greqisë, gjatë muajit Janar të vitit 2004, në mënyrë që mundësisht në fund të këtij muaji të organizohet një mbledhje tjetër në Maqedoni, ku do të diskutohet me të gjitha palët që do të përfshihen në këtë projekt.

Zëdhënësi i Avokatit të Popullit