Tiranë, më 9/12/2003

Mbrojtja e të drejtave të konsumatorëve, një nga prioritetet e sotme të shoqërisë shqiptare

- Avokati i Popullit Ermir Dobjani, takon Drejtorin e Përgjithshëm  të KESH-it, z. Andis Harasani -

Ditën e Martë, më 9 Dhjetor 2003, Avokati i Popullit Ermir Dobjani dhe Drejtori i Zyrës për Mbrojten e Qytetarëve, Kreshnik Spahiu zhvilluan në zyrat e Korporatës Elektroenergjitike, një takim pune me Drejtorin e Përgjithshëm të KESH-it, z. Andis Harasani.

Qëllimi i këtij takimi është njohja me strategjinë e kësaj korporate lidhur me rritjen e tarifave të çmimeve të energjisë elektrike për konsumatorët.

Vendimi i KESH-it për rritjen e çmimit të energjisë në masën rreth 10 përqind, duke filluar nga 1 Janari 2004, u arsyetua nga Drejtori Harasani si pjesë e strategjisë për të reduktuar deficitin e Korporatës nga humbjet në rrjet dhe mosarkëtimet e energjisë së konsumuar.

Pas shpjegimeve nga ana e specialistëve të KESH-it, Avokati i Popullit vlerësoi vullnetin e drejtuesve të kësaj Korporate për të qenë transparent, sikundër theksoi se ajo që i intereson Institucionit të Avokatit të Popullit është mbrojtja e të drejtave të konsumatorëve jo vetëm nga efektet negative të kësaj rritjeje, por edhe nga procedurat e parregullta që janë vënë re në rastin e rritjes së tarifave telefonike nga enti tjetër, Albtelekom.

Avokati i Popullit, z. Ermir Dobjani kërkoi mirëkuptimin e drejtuesve të KESH lidhur me idenë e tij për mundësimin e një oponence profesionale nga institucione të ndryshme akademike shqiptare, investimi i të cilave do të nxitet edhe përmes donacioneve të ndryshme, për të thënë fjalën e tyre edhe për shumë politika të tjera ekonomike, që ndikojnë drejtpërdrejtë në cilësinë e shërbimeve publike, e për pasojë edhe në cilësinë e jetës së qytetarëve shqiptare.

Në të njejtën linjë u shpreh edhe Drejtori i Zyrës për Mbrojtjen e Qytetarëve, z. Kreshnik Spahiu, i cili, sikurse edhe z. Dobjani vlerësoi procedurën e ndjekur nga Drejtori Harasani për respektimin e fjalës së fundit për problemin në fjalë, nga Enti Rregullator i Energjisë, si i vetmi autoritet për miratimin e çmimeve.

Pas takimit u zhvillua një konferencë shtypi me përfaqësues të medias së shkruar dhe elektronike, ku bashkëbiseduesit u shprehën publikisht për fazat e strategjisë së rritjes së tarifave si dhe për të drejtën e dy zyrave përkatëse në angazhimin e tyre në mbrojtje të konsumatorëve.

Takimi me përfaqësuesit e KESH-it është në vazhdën e angazhimit të Avokatit të Popullit për lehtësimin e problemeve sociale që shkakton shtrenjtësimi i shërbimeve bazë, që shteti u ofron qytetarëve, në kushtet e një situate monopoliste në favor të tij.

Avokati i Popullit vlerëson se shërbimet bazë si ato të elektroenergjisë, ujësjellësit dhe telekomunikimit përbëjnë shanset e pakta për një shtet që do të dëshmonin dimensionin social të tij në raport me qytetarët.

Zëdhënësi i Avokatit të Popullit