Tirane 07/10/2003

Avokati i Popullit pret familjarët e Vullnet Bytyçit

          Avokati i Popullit Ermir Dobjani priti sot familjarët e viktimës së policisë greke, Vullnet Bytyçi, të cilët i ngushëlloi dhe i informoi për hapat që Zyra e tij ka ndërmarrë për ndëshkimin e fajtorit si dhe dëmshpërblimin e mundshëm të familjes së viktimës.

          “Duke qenë në dijeni të të gjitha hapave të ndërmarra, unë vleresoj se shteti shqiptar po demonstron përgjegjësine e tij të mjaftueshme, jo vetëm për të mundësuar ndëshkimin e fajtorëve, por edhe për të kërkuar përgjegjësine e autoriteteve greke, me qëllim eleminimin e rasteve të dhunës së pakuptimtë me ngjyresa ksenofobe të tyre ndaj shqiptarëve”, tha Dobjani.

          Në përgjigje të interesimit të familjarëve për rrugët e ndjekjes së çështjes së tyre pranë autoriteteve gjyqsore greke, Dobjani sugjeroi që ata të përgatisin një prokurë për Ambasadorin shqiptar në Athinë, në mënyrë që këtij të fundit t’i mundësohet ndjekja ligjore e kësaj çështjeje përmes një Avokati privat.

      “Unë e kuptoj se gjaku i djalit tuaj nuk mund të blihet me para, por e rëndësishme është që fajtori të dënohet jo vetëm penalisht, por edhe moralisht dhe materialisht”, u shpreh Dobjani.

          Më pas, Dobjani i informoi familjarët e viktimës Bytyçi për hapat që Zyra e tij ka ndërmarrë duke e bërë të pranishme çështjen e keqtrajtimit të shqiptarëve nga policia greke, jo vetëm në tryezën e Ombudsmanit grek, por edhe pranë Komisionerit për të Drejtat e Njeriut pranë Këshillit të Europës si dhe pranë Komitetit Ndërkombëtar Kundër Torturës dhe Trajtimeve Çnjerëzore.

          Dobjani i siguroi familjarët e Vullnet Bytyçit se në të njejtën mënyrë Zyra e Avokatit të Popullit shqiptar do të veprojë edhe në të ardhmen, për ta shtrirë më shumë dimensionin njerëzor në të gjitha forumet brenda dhe jashtë vendit, kurdoherë që të krijohet një mundësi e tillë. Në të njejtën mënyrë do të procedohet edhe për rastin e fundit të bërë publik nga media, sipas të cilit shtetasi shqiptar Arjan Torka është keqtrajtuar po nga policia kufitare greke në Kapshticë.

ZEDHENESI i AVOKATIT TE POPULLIT