Tirane 01/10/2003

Avokati i Popullit dërgon pranë Ambasadave Shqiptare librin 

“Akte ligjore në ndihmë të të burgosurve shqiptarë jashtë Shqipërisë”

Në zbatim të projektit të përbashkët të Avokatit të Popullit me Ministrinë e Punëve të Jashtme dhe Ministrinë e Drejtësisë, për botimin e librit “Akte ligjore në ndihmë të të burgosurve shqiptarë jashtë Shqipërisë”, Avokati i Popullit ka nisur tashmë sasitë e para të këtij botimi pranë ambasadave shqiptare në Danimarkë, Angli, Slloveni dhe Kroaci.

          Përsa i përket Greqisë, Ministria e Drejtësisë së Republikës Greke ka kërkuar të dërgohet nje sasi prej 3000 kopjesh. Dje, më 30 Shtator 2003, u nisën 800 kopjet e para pranë Ambasadës Shqiptare në Athinë, ndërsa pjesa tjetër do të dërgohet pasi libri të ribotohet së shpejti.

          Libri “Akte ligjore në ndihmë të të burgosurve shqiptarë jashtë Shqipërisë” do të dërgohet së shpejti edhe në Itali, Maqedoni dhe vende të tjera ku ka të burgosur shqiptarë.    

Me këtë rast, Avokati i Popullit kujton se është detyre e ambasadave shqiptare që të mundësojnë dërgimin e këtij botimi pranë bibliotekave të burgjeve të vendeve përkatëse.

          Botimi në fjalë në gjuhën shqipe përmban një sërë konventash, instrumente ndërkombëtare për mbrojtjen e të drejtave të të burgosurve shqiptarë jashtë vendit.

          Nisma e Avokatit të Popullit për botimin e këtij libri erdhi pas një kërkese që Avokatit të Popullit iu bë gjatë një vizite në Slloveni, ku ndër të tjera ai mori kontakte edhe me disa të burgosur shqiptarë në burgjet sllovene.

          Realizimi dhe shpërndarja e këtij libri bëhet në kuadrin e përgjegjësive që shteti shqiptar ndjen për respektimin e të drejtave të bashkatdhetarëve tanë, kudo dhe në çfarëdo lloj kushtesh që ata të ndodhen.

ZEDHENESI I AVOKATIT TE POPULLIT