Tiranë, më 17/06/2009

Marrëveshje Bashkëpunimi

ndërmjet

Avokatit të Popullit

dhe

Komitetit Shqiptar i Helsinkit

Hyrje

Kjo marrëveshje përbën bazën ligjore të bashkëpunimit ndërmjet institucionit të Avokatit të Popullit të Republikës së Shqipërisë (AP, në vazhdim) dhe Komitetit Shqiptar të Helsinkit (KSHH, në vazhdim) në kuadrin e angazhimit të përbashkët në mbrojtjen dhe respektimin efektiv të të drejtave themelore të njeriut dhe ligjit si dhe parandalimit të torturës.

Kjo marrëveshje është në përputhje me nenin 30, paragrafi I i Ligjit Nr.8454, datë 4.2.1999, ndryshuar “PËR AVOKATIN E POPULLIT”, i ndryshuar, Ligjin Nr. 9888, datë 10.3.2008 , “Për disa ndryshime dhe shtesa në Ligjin nr.8328, datë 16.4.1998 “Për të drejtat dhe trajtimin e të dënuarve me burgim”, të ndryshuar dhe hyn në fuqi pas nënshkrimit të përfaqësueve titullarë të subjekteve të sipër-përmendura.

Seksioni I

Dispozita të përgjithshme

Neni 1

Qëllimi

Kjo marrëveshje ka si qëllim bashkëpunimin e dy institucioneve për mbrojtjen e të drejtave të personave të arrestuar/ndaluar, të paraburgosurve dhe të dënuarve, në zbatim të kuadrit ligjor të lartpërmendur si dhe standarteve ndërkombëtare që lidhen me respektimin e të drejtave dhe parandalimin e keqtrajtimeve dhe të torturës për personat e ndaluar/arrestuar dhe ata që vuajnë dënimin.

Neni 2

Përkufizime

Për qëllime të kësaj marrëveshje:

a.       Monitorim është procesi i mbledhjes, vëzhgimit dhe vlerësimit të të dhënave, rezultateve, funksioneve dhe ecurisë së zbatimit të kuadrit ligjor dhe institucional.

b.       ekipi monitorues është grupi i ekspertëve që marrin pjesë gjatë vizitave monitoruese, të profesioneve jurist, psikolog, punonjës social/edukator, dhe mjek, sipas kërkesave të Protokollit Opsional në kuadër të Konventës së Kombeve të Bashkuara kundër Torturës.

c.       raporte monitorimi janë aktet administrative dhe dokumentuese që pasqyrojnë përmbushjen e misionit të ekipit të vlerësimit, sipas instrumentit standard të monitorimit.

Seksioni II

Bashkëpunimi dhe ndihma e ndërsjelltë

Neni 3

Fushat e bashkëpunimit

Në përputhje me qëllimin e kësaj Marrëveshjeje, fushat e bashkëpunimit dhe ndihma e ndërsjelltë mes dy institucioneve nënshkruese do të fokusohen në:

a)      ndërmarrjen e vizitave të përbashkëta monitoruese në komisariatet e policisë dhe institucionet e vuajtjes së dënimit (burgje, paraburgime);

b)      përgatitjen e raporteve të përbashkëta nga vizitat monitoruese;

c)      ofrimin e ekpsertizës dhe stafit/vëzhguesve në fushën ligjore, mjekësore dhe  psikosociale për mbarëvajtjen e monitorimit periodik të komisariateve të policisë dhe institucioneve të paraburgimeve dhe burgjeve;

d)      paraqitjen e propozimeve konkrete për përmirësimin e situatës së respektimit të të drejtave të personave të privuar nga liria duke përfshirë kuadrin legjislativ, institucional dhe zbatimin e ligjit në praktikë;

Neni 4

Monitorimi periodik dhe parimet e bashkëpunimit

a)      Njësia Kombëtare e Parandalimit të Torturës pranë AP në bashkëpunim me KSHH-në do të vëzhgojnë periodikisht trajtimin e individëve, që u është hequr liria në vendet e ndalimit, arrestimit ose burgosjes, me qëllim që të forcohet, kur është e nevojshme, mbrojtja e individëve nga tortura, trajtimi ose dënimi i egër, çnjerëzor ose poshtërues;

a)

b)      Njesia Kombëtar i Parandalimit të Torturës pranë AP dhe KSHH-ja bashkëpunojnë  në paraqitjen e rekomandimeve për organet përkatëse, me qëllim që të përmirësohen trajtimi dhe kushtet e individëve që u është hequr liria dhe të parandalohet tortura dhe trajtimi ose dënimi i egër, çnjerëzor ose poshtërues.

c)      Programi ndërtohet me synim realizimin korrekt të aktiviteteve me një shpërndarje kohore dhe gjeografike, në kuadër të mbrojtjes dhe respektimit të të drejtave të personave të privuar nga liria, si dhe duke u kombinuar me planet vjetore të inspektimit të miratuara nga AP dhe planet e miratuara të monitorimeve të KSHH-së në kuadër të projektit ‘Së bashku për një respektim më të mirë të të drejtave të personave të privuar nga lira” projekt i financuar nga Komisioni Evropian, i cili përfshin periudhën Janar 2009 – Korrik 2010.

d)      Ndihma dhe bashkëpunimi profesional ofrohet mbi bazën e nevojave të identifikuara gjatë vizitave monitoruese dhe rasteve të evidentuara, duke respektuar parimin e ligjshmërisë, paanësisë, konfidencialitetit. Si rrjedhim, palët angazhohen në shkëmbimin e informacionit dhe ndihmesë reciproke në rastet specifike të torturës të evidentuara gjatë vizitave monitoruese.

Seksioni III

Procesi i monitorimit të vazhdueshëm në bazë të legjislacionit të brendshëm dhe ndërkombëtar

Neni 5

Standartet për monitorim, raportim dhe parandalim

a)      Standartet që do të vihen në zbatim nga KSHH dhe AP gjatë proçesit të monitorimit, raportimit dhe parandalimit të keqtrajtimeve/torturës janë bazuar tek konventat ndërkombëtare të ratifikuara nga Republika e Shqipërisë dhe legjislacioni vendas, përkatësisht:

                                 i.            Konventa e OKB-së kundër Torturës dhe Trajtimeve, ose Dënimeve të tjera Mizore, Çnjerëzore dhe Degraduese

                               ii.            Konventa Evropiane per Parandalimin e Tortures

                              iii.            Standardet përkatëse Minimale të OKB-së dhe Evropiane te Burgjeve

                             iv.            Protokolli Opsional në kuadër të zbatimit të Konventës kundër Torturës

                               v.            Konventa Evropiane për mbrotjen e të drejtave themelore të njeriut, me ratifikimin e saj me Ligjin nr. 8137, datë 1996 dhe me depozitimin e instrumentave të ratifikimit pranë Sekretarit të Përgjithshëm të Këshillit të Evropës më 2 tetor 1996

                             vi.            Kushtetuta e Republikës së Shqipërisë

                            vii.            Ligjin nr. 9888, dt. 10.03.2008  ‘Për trajtimin dhe të drejtat e personave të dënuar me burgim’

                          viii.            Kodin e Procedurës Penale të Republikës së Shqipërisë;

Seksioni IV: Burime dhe mjete

Neni 6

Mjete  dhe pajisje logjistike

a)      KSHH  vë në dispozicion vëzhguesit e tija për ekipin monitorues për realizimin e programit të miratuar paraprakisht.

b)      AP angazhohet të përfshijë ekspertizën e ofruar nga KSHH, në rekomandimet e tij dhe të ndihmojë në përmirësimin e trajtimit të personave të privuar nga liria në ambjentet e komisariateve të policisë dhe ato të vuajtjes së dënimit.

Seksioni V

Dispozitat e fundit

Neni 7

Hyrja në fuqi dhe zbatimi

Kjo marrëveshje hyn në fuqi, pas nënshkrimit nga palët nënshkruese me dt 17/06/2009 dhe është e vlefshme me një mandat 1-vjeçar (i rinovueshëm).

Palët nënshkruese emërojnë përkatësisht:

Z. Ervin Karamuço, drejtues i Njësisë së Mekanizmit Kombëtar të Parandalimit të Torturës pranë Avokatit të Popullit, dhe

zj. Edlira Papavangjeli, menaxhere programesh në Komitetin Shqiptar të Helsinkit

për ndjekjen e zbatimit të kësaj marrëveshjeje.

Neni 11 – Amendimet

Kjo marrëveshje mund të rishikohet dhe amendohet në bazë të konsensusit ndërmjet palëve nënshkruese.

Avokat i Popullit                                                   Drejtore ekzekutive
(firma, vula)                                                                                           (firma, vula)