Nr. 10035/1 Prot./D.S                                 Tiranë, më 30/12/2009

Lënda:  Mbi kërkesën tuaj për informacion në lidhje me transferimin në Shqipëri të  shtetasve shqiptarë që vuajnë dënimin në Maqedoni.

AVOKATIT TË POPULLIT

Seksioni i Veçantë

Ministria e Drejtësisë, pasi trajtoi kërkesën tuaj K2/m83-7 Prot. Nr.Dok 200802466/7, datë 09.12.2009, sqaron sa vijon:

Në vijim të sqarimeve mbi transferimin e shtetasve shqiptarë që aktualisht vuajnë dënimin në burgjet e huaja në përgjithësi dhe ato maqedonase në veçanti, theksojmë se Ministria e Drejtësisë nuk ndjek asnjë politikë diskriminuese në trajtimin e kërkesave të shtetasve shqiptarë që vuajnë dënimin në burgjet e huaja.

Ministria e Drejtësisë ka trajtuar kërkesat e shtetasve maqedonas Dashamir Sllatina, Habib Rexhepi dhe Blerim Fejzullahu, nga të cilët shtetasit Dashamir Sllatina dhe Habib Rexhepi aktualisht janë transferuar në Maqedoni, ndërsa është në proces transferimi i shtetasit Blerim Fejzullahu.

Ministria e Drejtësisë është në proces të analizimit të çështjeve të transferimit të shtetasve shqiptarë që vuajnë dënimin në burgjet e huaja. Ky proces përfshin analizën e parimit të reciprocitetit me shtetet e huaja, kapacitetet penitenciare aktuale të sistemit shqiptar, si dhe shqyrtimin konkret të çdo rasti të veçantë. Në përfundim të saj, Ministria e Drejtësisë dërgon njoftimin për pranimin ose jo të kërkesave të tilla, si personit të interesuar, ashtu edhe shtetit të huaj.

Ministria e Drejtësisë konfirmon se u ka përcjellë autoriteteve maqedonase përgjigjet përkatëse në lidhje me çështjen e transferimit të shtetasve shqiptarë që vuajnë aktualisht dënimin në Maqedoni.

Duke Ju falenderuar për bashkëpunimin,

MINISTRI

BUJAR NISHANI

(firma, vula)