I dashur zoti Jaeger.

          Të falenderoj për ndihmën dhe mbështetjen që i keni dhënë institucionit tonë. Me kënaqësi po ju përgjigjem pyetjeve Tuaja, bazuar në legjislacionin shqiptar dhe praktikën tonë të punës.

            1. Sipas ligjit nr.8454 datë 04.02.1999 “Për Avokatin e Popullit”, Ombudsmanit nuk i ndalohet të marrë përsipër raste (ankesa) për të cilat çështja (rasti) është në gjykatë apo në prokurori. Por kjo është lënë në diskrecionin e Avokatit të Popullit. Kjo del nga neni 14 i ligjit nr. 8454 datë 04.02.1999, pika “b” e nenit 18, pikën “c” në nenin 25, dhe pikën 2 të nenit 31 të ligjit në fjalë që po ju dërgojmë bashkëlidhur.

Nga pika 2 e nenit 31 del përsëri që seksioni i dytë merret edhe me ankesa për pushtetin gjyqësor. Por shtojmë se Ombudsmani nuk mund ta ndalojë apo pezullojë gjithë proçedurën për një ankesë në të njëjtën kohë që rasti ka shkuar përpara gjyqtarit apo gjykatës. P.sh. ne vetëm e nxitim gjykatën që të shpejtojë proçedurat nëqoftëse konstatohen zvarritje ose të riparojë shkeljet e të drejtave të njeriut. P.sh. nëqoftëse gjykata po shqyrton një rast ku i akuzuari nuk mbrohet me avokat, ne kërkojmë që atij t’i sigurohet një avokat. Pas vendimit të gjykatës, Ombudsmani ka rol vetëm që të kërkojë ekzekutimin (zbatimin) e vendimit gjyqësor por nuk mund ta kundërshtojë atë në themel.

          2. Sipas praktikës sonë zakonisht ne nuk i fillojmë veprimet tona ose i ndërpresim ato kur vihemi në dijeni se rasti (ankesa) ndodhet në të njëjtën kohë në gjykatë apo prokurori. Në raste fare të pakta ne vazhdojmë ta shqyrtojmë ankesën paralelisht me prokurorinë apo gjykatën. Një rast i tillë shumë i suksesshëm ka qenë në janar 2003 kur policia dhe prokuroria e Korçës deklaruan se një person (Gazmend Tahirllari) kishte vdekur nga pija alkoolike dhe jo nga dhuna e policisë. Ndërhyrja jonë bëri që kufoma të ekzumohej dhe të riekspertohej. Komisioni i dytë mjekoligjor i ngritur mbi bazën e kërkesës sonë konkludoi se personi kishte vdekur nga dhuna e policëve. Si rrjedhojë, 5 policë u dënuan për këtë krim. Përqindja e rasteve të tilla është fare e vogël në raport me rreth 2000-2500 ankesa në vit që ne pranojmë për shqyrtim. Por nëqoftëse rasti (ankesa) ndodhet për shqyrtim tek një organ më i lartë administrativ, ne e vazhdojmë proçedurën e verifikimit të ankesës. Ligji jonë nuk na pengon aspak për të ndërhyrë në çdo shkallë të administratës publike shqiptare.

          3. Sipas ligjit tonë nuk ka afate kohore për të bërë ankim kundër një vendimi administrativ tek Ombudsmani. Kurse, për të bërë ankim në gjykatë apo në organe më të larta administrative në raste të veçanta ka afate të veçanta, nga 5 ditë deri në 30 ditë.

          4. Në Shqipëri nuk ka gjykata të veçanta administrative. Por pranë gjykatave shqiptare veprojnë seksione të posaçme ku mund të bëhet kërkesë padi për vendime apo akte administrative. Sipas Kodit të Proçedurës Civile afati i shqyrtimit të çështjes në shkallë të parë është 30 ditë. Por ky afat në shumë pak raste mund të respektohet. Nëqoftëse vendimi nuk ankimohet në Gjykatën e Apelit, çështja mund të përfundojë edhe për 2-4 muaj. N.q.s. bëhen ankesa në Gjykatën e Apelit apo në Gjykatën e Lartë, çështja mund të zgjasë deri 2 apo më tepër vite.

          5. Nëqoftëse bëhet një ankim në zyrën tonë, ne kur e hetojmë çështjen, zakonisht pas rreth 2 muajve mund të bëjmë një rekomandim. Por mund të bëhet edhe më shpejt ose edhe më vonë.

          6. Në lidhje me nenet XX dhe XXX te draft dispozitat e paraqitura për mendim, mendimi ynë është se janë të gabuara. Nëqoftë se pranohen këto variante, Ombudsmani i vendit ku ato do veprojnë do të kishte pak shanse për të ndërhyrë me sukses në rastet e ankesave për shkeljet e të drejtave të njeriut. Ombudsmani në atë vend nuk do jetë i suksesshëm. Mendoj se dispozitat përkatëse të ligjit tonë i lënë mjaft fleksibilitet Ombudsmanit për të qënë energjik në mbrojtje të njerëzve që ankohen tek ai. Ligji shqiptar është mjaft i mirë dhe përbën një nga avantazhet tona që institucioni i Ombudsmanit në Shqipëri ka sukses. Prandaj bashkëlidhur po ju dërgoj edhe ligjin tonë komplet. Me sa njoh unë legjislacionet e mjaft vendeve, Ombudsmani polak ka një ligj akoma më të mirë, sidomos kur konstaton vendime të gabuara të gjykatave. Edhe Maqedonia në ligjin e ri të shtatorit 2003 ka futur të drejtën e Ombudsmanit për të pezulluar aktet administrative që shkelin të drejtat e njeriut. Pra edhe Maqedonia ka bërë një ligj shumë të mirë.

          Duke ju falenderuar për bashkëpunimin,

          Shihni edhe faqen tonë të internetit në gjuhën angleze.

          www.avokatipopullit.gov.al

                                                                                                                                                            AVOKATI  I  POPULLIT

         ERMIR DOBJANI