________________________________________________________________

V E N D I M

            Kolegji i Gjykatës Kushtetuese të Republikës së Shqipërisë, i përbërë nga:

            Vladimir Kristo,             Kryetar i Gjykatës Kushtetuese

            Sokol Sadushi,               Anëtar i      “                  “

            Petrit Plloçi                    Anëtar i      “                  “

në datë 07.03.2008 mori në shqyrtim paraprak kërkesën me nr.35 Akti, që i përket:

            K Ë R K U E S:         ILIR GJERASI

            O B J E K T I:           Shfuqizimin si antikushtetues të vendimeve nr.8 dhe 10, datë 12.09.2007 të Kolegjeve të Bashkuara të Gjykatës së Lartë

Kërkuesi ka pretenduar se vendimet janë rezultat i një proçesi të parregullt ligjor për shkaqet si vijon:

- vendimet shkelin të drejtat e punonjësve të Doganave dhe vijnë në kundërshtim me nenin 42 të Kushtetutës dhe me nenin 6 të Konventës Europiane të të Drejtave të Njeriut, të cilët parashikojnë të drejtën e individit për një proçes të rregullt ligjor;

- Gjykata e Lartë nuk mund të marrë atributet e pushtetit ligjvënës. Edhe pse Kodi Doganor është i mangët lidhur me parashikimin nëse punonjësit doganorë përfshihen në shërbimin civil, kjo nuk i jep të drejtë Gjykatës së Lartë të kryejë detyrën e ligjvënësit;

- vendimet bien në kundërshtim me nenin 107 të Kushtetutës, sepse punonjësit e administratës doganore plotësojnë të dyja kushtet e parashikuara në nenin 107 të Kushtetutës, për të qenë nëpunës publikë;

- Kolegjet e Bashkuara të Gjykatës së Lartë kanë nxjerrë konkluzione të gabuara kur vërejnë se nuk ka ligj të posaçëm që të rregullojë marrëdhëniet e punës së Administratës Doganore. Janë një sërë vendimesh të lëna në fuqi nga Gjykata e Lartë, që kanë pranuar se punonjësit e Administratës doganore janë nëpunës civilë. Baza ligjore ku është mbështetur Drejtoria e Përgjithshme e Doganave në nxjerrjen e akteve administrative të largimit nga puna është pikërisht Ligji nr.8549, datë 11.11.1999 “Statusi i Nëpunësit Civil”. Me vendimin unifikues të Gjykatës së Lartë duhej interpretuar dhe ky fakt.

Kolegji i Gjykatës Kushtetuese, pasi shqyrtoi kërkesën, dokumentet shoqëruese dhe bisedoi çështjen në tërësi,

V ËR E N:

Duke patur parasysh kërkesën dhe dokumentet bashkëlidhur, Kolegji i Gjykatës Kushtetuese konstatoi se lidhur me vendimin nr.8, datë 12.09.2007 të Kolegjeve të Bashkuara të Gjykatës së Lartë, çështja nuk mund të shqyrtohet nga Gjykata Kushtetuese, pasi me këtë vendim, çështja është dërguar për vazhdimin e gjykimit në gjykatën e rrethit. Për pasojë, kërkuesi nuk ka shteruar të gjitha mjetet juridike përpara se t’i drejtohet Gjykatës Kushtetuese.

Lidhur me vendimin nr.10, datë 12.09.2007 të Kolegjeve të Bashkuara të Gjykatës së Lartë, kërkuesi nuk legjitimohet të kërkojë shpalljen e këtij vendimi si antikushtetues, sepse nuk ka qenë palë në atë gjykim.

Në këto kushte, kërkesa e paraqitur nuk mund të pranohet për shqyrtim në seancë plenare.

PËR KËTO ARSYE:

Kolegji i Gjykatës Kushtetuese të Republikës së Shqipërisë, në bazë të nenit 31 të Ligjit nr.8577, datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë”,

V E N D O S I:

Moskalimin e çështjes për gjykim në seancë plenare.

Nr.35 i Regj.Themeltar.

Nr.35 i Vendimit.

Tiranë, më 07.03.2008

     ANËTAR                   ANËTAR                          KRYETAR

    /Petrit Plloçi/ (dv)                /Sokol Sadushi/ (dv)                     /Vladimir Kristo/ (dv)

Vërtetohet njësia me origjinalin

SEKRETAR I PËRGJITHSHËM

Kujtim OSMANI

(firma, vula)