Nr. 1707  Prot.                                                  Datë 17.07.2008

  L E T Ë R      F A L E N D E R I M I

Drejtuar:             Avokatit të Popullit

                          Zotit Ermir DOBJANI

I nderuar zoti DOBJANI,

Mora njoftimin Tuaj, ku na vini në dijeni për mendimet dërguar disa komisioneve parlamentare me shkresën Nr.160, datë 07.07.2008, për projektligjin “Për disa shtesa dhe ndryshime në Ligjin Nr.9418, datë 20.05.2005 “Për Sigurimin shoqëror suplementar të ushtarakëve të Forcave të Armatosura të Republikës së Shqipërisë” i ndryshuar.

Sa më sipër, Ju falenderoj për mbështetjen Tuaj dhe Institucionit Tuaj ndaj të drejtave ligjore të Shoqatës Kombëtare të Ushtarakëve në Rezervë të Shqipërisë (SHKURSH) për zgjidhjen e problemeve social-ekonomike të anëtarësisë të saj.

Gjithashtu, Ju shpreh komplimentet e mia për argumentet juridike e profesionale dhe për mosrënien dakord me projektligjin e Qeverisë, i cili, në vend të përmirësojë gjendjen social-ekonomike dhe të drejtave ligjore të ushtarakëve, e përkeqëson atë, duke cënuar parimin e sigurisë juridike dhe të barazisë përpara ligjit. Ai projekt nuk merr parasysh vendimin Nr.9, datë 26.02.2007 të Gjykatës Kushtetuese.

Ndërkohë, dëshiroj t’u bëj me dije, se projekti i mësipërm nuk ka kaluar akoma në Qeveri, kështu që, nëse e shikoni të arsyeshme, t’ua dërgoni mendimet edhe Ministrisë së Mbrojtjes, Ministrisë së Financave dhe Këshllit të Ministrave.

Duke përfunduar, më lejoni zoti Avokat i Popullit, t’u paraqes falenderimet e mia më të sinqerta për mbështetjen dhe të shpreh bindjen se kjo mbështetje nuk do të na mungojë edhe në të ardhmen.

  Me respekt,

            PRESIDENTI

  Kolonel (R) Mehdi POGACI