I nderuar Z. Kryeministër,

          Me anë të kësaj letre, më lejoni t’ju informoj shkurt për situatën e dhunës dhe keqtrajtimeve në organet e policisë dhe në burgje. Rreth një vit më parë vlerësuam pozitivisht angazhimin Tuaj direkt para Qeverisë dhe Mediave për të respektuar liritë dhe të drejtat e shtetasve tanë gjatë shoqërimeve në organet e policisë dhe në burgje si dhe për ndëshkimin e çdo zyrtari të çdo niveli që përdor dhunë ose shkel të drejtat e tyre.

          Deklarimet direkte të nivelit më të lartë të Qeverisë i kishin kërkuar prej vitesh Raportet e Komisionit kundër Torturës pranë Këshillit të Europës, por vetëm Ju i bëtë realitet. Si pasojë, gjatë vitit 2006 është konstatuar se ka rënie në rastet e dhunës dhe keqtrajtimeve nga organet e policisë. Për fat të keq, në antitezë, në burgje janë shtuar vdekjet e personave si në Lezhë e Tiranë si dhe ankesat për keqtrajtime nga policia e Drejtorisë së Përgjithshme të Burgjeve. Gjithashtu hap mjaft pozitiv është edhe ndryshimi i nenit 86 të Kodit Penal për përkufizimin e Torturës.

          Me këtë rast, ju vë në dijeni se nuk kemi parë ndonjë angazhim konkret për të zbatuar porosinë Tuaj që të vendosen linja telefonike të drejtpërdrejta nga komisariatet e policisë dhe nga burgjet për të komunikuar direkt qytetarët me Ministrinë e Brendshme dhe Ministrinë e Drejtësisë kur kanë ankesa për keqtrajtime. Vendosjen e kësaj linje, siç jua kemi bërë të ditur me shkresën tonë nr.81, datë 07.04.2006, kemi kërkuar të bëhet edhe në institucionin tonë.

          Duke besuar në mirëkuptimin Tuaj, shprehim gatishmërinë e institucionit tonë për të vazhduar bashkëpunimin me agjensitë përkatëse në interes të mbrojtjes së të drejtave dhe lirive të njeriut në Shqipëri.

                                                           Me respekt

AVOKATI  I  POPULLIT

        Ermir  DOBJANI