I nderuar z. Gjinushi,

Përfitoj nga rasti që me këtë komunikim të parë zyrtar, t'ju dërgoj urimet më të mira dhe suksese në detyrën tuaj të lartë dhe t'ju shpreh gatishmërinë e Institucionit që përfaqësoj për të vazhduar bashkëpunimin e frutshëm në dobi të forcimit të shtetit të së drejtës dhe zbatimin e të drejtave dhe lirive themelore të individit në Shqipëri, si parakushte të rëndësishme për integrimin e vendit tone në strukturat euroatlantike.

Më poshtë do t'ju referoj diçka lidhur me problemin e rëndësishëm të gjakmarrjes që çdo ditë e më tepër po bëhet një plagë pë shoqërinë tone.

Në disa ankesa të ardhura pranë Zyrës sonë, kërkohet që Avokati i Popullit të ndërmjetësojë pranë autoriteteve të Administratës Shqiptare, në mënyrë që ankuesve fu bëhej i mundur emigrimi në ndonjë vend tjetër për shkak të kërcënimit që u vjen nga fenomeni i gjakmarrjes.

Ne e vlerësojmë problemin nga këndvështrimi i detyrimit që shteti ka për të siguruar jetën e shtetasve të tij dhe mbi këtë bazë menduam të nxisnim idenë e një lëvizje më të gjerë që parakupton një bashkëpunim të strukturave përkatëse të shtetit, të shoqërisë civile, por edhe angazhimin e pjesës së interesuar të faktorit ndërkombëtar; të gjitha këto në funksion të lehtësimit si të pozitës së familjeve të ngujuara, ashtu edhe të zbutjes së fenomenit të gjakmarrjes në tërësi.

Sipas nenit 30 të Ligjit “Për Avokatin e Popullit” kemi detyrimin që, në bashkëpunim me organizatat joqeveritare, të organizojmë të paktën një herë në vit veprimtari kombëtare për gjendjen e të drejtave dhe lirive të njeriut në Republikën e Shqipërisë. Për këtë arsye kemi menduar që në fillim te muajit Dhjetor te këtij viti të organizojmë një konferencë kombëtare që do të trajtojë një problem të tillë, që të mundësojë një debat të hapur, në përpjekje për të dhënë një përgjigje të mundshme lidhur me rrugët për zgjidhjen e situatës absurde që është krijuar nga fenomeni i gjakmarrjes.

Duke patur parasysh që të gjithë ata që janë menduar të ftohen e dinë kuadrin ligjor dhe atë social për trajtimin e problemit, ajo që pritet nga kjo konferencë është se do të mund të iniciojme hartimin e nje strategjie kombëtare me sugjerime të dobishme, për t’u thelluar në zgjidhjen e problemit dhe do të mund të skicohen rrugët konkrete që do t’i shërbenin zgjidhjes së tij. Kemi marrë mesazhin e bashkëpunimit me të gjitha strukturat qeveritare dhe joqeveritare për gjetjen e rrugëve konkrete për stabilizimin e situatës.

Për këtë, është dërguar pranë dikasterit tuaj një projekt për mënyren se si është menduar të organizohet konferenca dhe është kërkuar që të percaktohen nga ju personat që do të kontaktojnë me zyren tonë për këtë problem si dhe tema që do të referohet prej jush.

Për arsye të organizimit të kësaj konference është e nevojshme që të konfirmoni pjesëmarrjen tuaj dhe temën që do të dëshëronit të relatonit ju ose ndonjë person tjetër i ngarkuar nga ju sa më shpejt që të jetë e mundur.

Përveç relatimeve të lektorëve të ndryshëm në konferencë, do të zhvillohen dhe tryeza te rrumbullakta, ku do të diskutohen në grupe më të vogla problemet e trajtuara nga lektoret.

Në konferencë besojmë se do të merrni pjesë Ju dhe personalitete të tjera të larta të vendit, si Presidenti i Republikës, Kryeministri dhe disa ministra.

Paraprakisht problemi është konsultuar me z. Ilir Gjoni dhe z. Bashkim Fino, kur ishte Ministër i Pushtetit Lokal, por tashmë do bashkëpunohet konkretisht me gjithë institucionet e interesuara në këto çështje.

Sidoqoftë mendoj se do të ishte shumë efektive angazhimi juaj personal, i cili do te bënte të mundur që kjo Konferencë dhe Strategjia Kombëtare të realizoheshin dhe të kishim rezultate konkrete.

Duke besuar në mirëkuptimin dhe bashkëpunimin tuaj, lutemi na vini në dijeni sa më shpejt, mundësisht brenda dates 15.10.2001, për angazhimin tuaj për sa më sipër.

AVOKATI  I  POPULLIT

        Ermir  DOBJANI