Të nderuar Zotërinj,

Duke ju falenderuar për bashkëpunimin që kemi patur në fushën e mbrojtjes së të drejtave të emigrantëve shqiptarë në Greqi, më lejoni t’ju vë në dijeni për një shkelje të rëndë të nenit 6 të Konventës Europiane të të drejtave të njeriut në gjykatën e Selanikut, që u bë publike në emisionin “Shqip” të Tv Top Chanel më 21 nëntor 2003.

Konkretisht disa të burgosur shqiptarë që janë dënuar në Greqi dhe që vuajnë dënimet në Shqipëri, sepse janë transferuar këtu, janë ankuar se gjatë gjykimeve të tyre nuk janë zbatuar si duhet proçedurat. Gazetarja e  Tv Top Chanel zj. Rudina Xhunga ka vajtur në gjykatën e Selanikut. Atje ajo ka investiguar në lidhje me personat që bëjnë përkthimin në gjuhët greqisht dhe shqip. Ka konstatuar se nga viti 1991 deri në vitin 2000 përkthime të të dënuarve shqiptarë ka bërë edhe zonja Niki Vavacula, e cila në fakt nuk din fare gjuhën shqipe. Këtë gjë gazetarja e ka vërtetuar edhe duke bërë një intervistë me zj. Vavacula. Por ka edhe dokumente të gjykatës greke e cila në vitin 2001 ka konstatuar se ajo nuk e di gjuhën shqipe, e megjithatë nuk e ka dënuar atë. Faktin e mësipërm e kanë vërtetuar edhe zoti Kristo Pepa e zj. Olga Vasiliu që punojnë si përkthyes pranë gjykatës në Selanik.

Në këto kushte del qartë se gjatë viteve 1991-2000 në gjykatat penale të Selanikut (shkalla e parë dhe ajo e dytë), në të gjitha rastet që zj. Vavacula ka qenë si përkthyese e shtetasve shqiptarë është shkelur gërma “e”, pika 3 e nenit 6 të Konventës Europiane të të drjetave të njeriut. Të gjitha proçeset gjyqësore penale ku ka përkthyer zj. Vavacula kanë qenë të parregullta sepse të akuzuarve nuk u është siguruar përkthyes që me të vërtetë të dinte gjuhën shqip-greqisht, por atyre formalisht ju është caktuar si përkthyes një person që dinte gjuhën greke dhe gjuhë sllave apo turke, por nuk dinte gjuhën shqipe.

Zj. Rudina Xhunga ka mësuar se prokuroria e Selanikut po bën hetime kundër zj. Vavacula, pasi ka denoncuar përkthyesi Kristo Pepa. Por  duke patur parasysh rëndësinë e çështjes do të rekomandonim që edhe institucionet tona të përfshihen në këtë çështje duke jua bërë  prezent institucioneve homologe greke. Në këtë rast për të gjetur mënyrat se si duhen ndihmuar shtetasit shqiptarë të dënuar në Greqi, në radhë të parë autoritetet greke duhet të nxjerrin të dhëna nga gjykata penale në Selanik (shkalla e parë dhe e dytë), se në sa raste dhe për cilët shtetas shqiptarë zj. Vavacula ka qenë përkthyese gjatë viteve 1991-2000. Pasi të evidentohen të gjitha këto raste duhet bashkëpunuar për të përcaktuar se çfarë duhet bërë që këtyre të dënuarve t’u garantohet një proçes për rishikimin e çështjeve të tyre, siç e parashikon ligji penal grek, por edhe gjithë konventat ndërkombëtare.

Këtë çështje ne ja kemi ngritur edhe Ombudsmanit grek, Amnisti International dhe institucioneve të Këshillit të Europës që merren me të drejtat e njeriut.

Duke besuar në mirëkuptimin dhe bashkëpunimin tuaj,

                                                           Me respekt

AVOKATI  I  POPULLIT

        Ermir  DOBJANI