I nderuar zoti Muçi

Duke ju shprehur kënaqësinë per komunikimin korrekt ndërmjet institucioneve tona, ju bëj të njohur edhe problemet e mëposhtme.

1.Siç jeni në dijeni, me kërkesën tone Gjykata Kushtetuese, me vendimin nr.26, date 24.04.2001 ka vendosur shfuqizimin si antikushtetues te pikës 1, shkronja "c" te Vendimit te Këshillit të Ministrave nr. 119 date 18.03.2000 "Per proçedurat e privatizimit me ankand të paketave shtetërore të aksioneve të shoqërive që veprojnë në sektorët jo strategjikë" si dhe të pikes 4 të Vendimit të Këshillit të Ministrave nr.438 datë 14.08.1995 "Per privatizimin e ndërmarrjeve shtetërore të transformuara në shoqëri tregëtare" vetëm per pjesët ku ato shprehen : E para "dhe çmimit të truallit të përcaktuar sipas Vendimit te Këshillit të Ministrave nr.312 date 30.06.1994" dhe e dyta"...në përpjestime që i përgjigjen çmimit te truallit të njohur në bazë të Vendimit përkatës të Këshillit të Ministrave nr. 312 date 30.06.1994".

Megjithëse ka kaluar rreth 6 muaj, nuk jemi në dijeni që nga Qeveria të jetë nxjerrë ndonjë akt i ri per te realizuar ndryshimet që ka sanksionuar vendimi i Gjykatës Kushtetuese. Duke patur parasysh se dikasteri juaj duhet të paraqesë në Qeveri projektin përkatës do të dëshëronim të dinim se çfarë është bërë deri tani per problemin e mësipërm, te cilin ne e konsiderojmë mjaft te rëndësishëm per mbrojtjen e të drejtave të shtetasve tanë.

2.Nga Kuvendi i Shqipërisë është miratuar ligji nr.8810, date 17.5.2001 "Per përcaktimin e formës dhe të strukturës së formulës së privatizimit te shoqërisë anonime "Albtelecom". Në pikën 3 te nenit 2 bëhet fjalë per paketën e aksioneve që do t’u ofrohet ish pronarëve te truallit te objekteve të Telekomit, ç'ka bën të domosdoshme rregullimin e problemit që keni ngritur në pikën 1, pra nxjerrjes se akteve nënligjore në lidhje me caktimin e çmimit të truallit.

Veç kësaj nga ana e përfaqësuesit të Management Systems International (MSI) që financohet nga USAID per projektin e koalicionit të Shoqërisë Civile kundër korrupsionit na është kërkuar ndihmë që t'ju bëhet e mundur Transparenca e plotë per proçesin e privatizimit të Telekomit.

Ne mendojmë se kjo kërkesë e tyre duhet plotësuar, sepse është në pajtim me programin e Qeverisë ku bëni pjesë Ju dhe që natyrisht luftën kundër korrupsionit dhe Transparencën i konsideron si aspekte te rëndësishme të mirëqeverisjes. Në këtë pike bashkohemi edhe me objektin e veprimtarisë sonë.

Per këto arësye do te dëshëroja përgjigjen tuaj zyrtare në se përfaqësuesit e koalicionit te Shoqërisë Civile do te mund të kenë dijeni te plotë mbi te gjithë fazat dhe dokumentacionin përkatës te proçesit të privatizimit te Alb Telekomit.

Duke besuar në mirëkuptimin tuaj, presim përgjigje sa me shpejt të jetë e mundur.

AVOKATI  I  POPULLIT

        Ermir  DOBJANI