Lenda: Per problemet qe kane ngritur te denuarit ne Greqi dhe

                  qe vuajne denimet ne Shqiperi.

     Drejtuar: Presidentit të Republikës

                     Z. Alfred  MOISIU

                     Ministrit të Drejtësisë

                     Z. Fatmir  XHAFAJ

Tirane

Në muajin korrik 2004 së bashku me kryetarin e Komisionit të përhershëm parlamentar për të drejtat e njeriut, z.Vangjel Dule dhe disa deputetë të tjerë vizituam burgun e Kosovës në rrethin e Elbasanit. Qëllimi i vizitës ishte kërkesa e vazhdueshme, kryesisht e të dënuarve nga gjykatat greke që vuajnë dënimin në Shqipëri.

Pretendimet kryesore të tyre mund të përmblidhen si më poshtë:

1. Ankohen se në masat e dënimit ndaj tyre ka arsye të bazuara për të menduar se kanë ndikuar konsideratat negative të gjykatave greke për racën dhe fenë e shqiptarëve të gjykuar. Sipas tyre, kur në të njëjtin proçes janë akuzuar shtetas grekë si bashkëpunëtorë me shqiptarët, grekët janë favorizuar duke ju dhënë pafajësi ose dënime mjaft të ulta në krahasim me shqiptarët.

2. Gjatë gjykimeve në Greqi ka patur raste të rënda të shkeljes së të drejtave të njeriut, si mungesë të përkthyesve që njohin gjuhën shqipe (rasti Vavacula), apo që avokatët grekë nuk i kanë ndihmuar realisht për të bërë mbrojtje profesionale, apo nuk kanë bërë ankim në gjykatat e shkallëve më të larta, me mendimin se nuk do ju lejohet ekstradimi në Shqipëri, apo se do t’u ngrihet dënimi.

3. Dënimet për trafikim të lëndëve narkotike kryesisht, Kanabis sativa (që është një nga drogat më të lehta dhe në disa shtete europiane nuk dënohet, p.sh. në Holandë), janë tepër të rënda, krahasuar edhe me dënimet e zbatuara për raste analoge në Shqipëri.

4. Nuk kanë patur mundësi të apelojnë vendimet e njohjes së vendimeve të gjykatave greke në gjykatat shqiptare të Apelit apo në Gjykatën e Lartë.

Duke patur edhe më parë ankesa të të dënuarve për këto probleme mendimi ynë është që i vetmi institucion që mund t’i japë një zgjidhje pozitive ankesave që do të rezultojnë të drejta është aplikimi nga Presidenti i Republikës i të drejtës së faljes së pjesshme apo të plotë ndaj çdo kërkese të dënuari në mënyrë individuale.

Që të realizohet kjo duhet patjetër që Drejtoria e Përgjithshme e Burgjeve të studjojë vendimet e plota të çdo të dënuari në Greqi për të konstatuar sa qëndrojnë pretendimet e mësipërme për çdo të dënuar. Mbas këtij verifikimi individual të vendimit gjyqësor grek mund t’i propozohet Presidentit të Republikës falja pjesore ose e plotë e dënimit për ata të dënuar në Greqi që do të vlerësohet se duhet të aplikohet falje.

Zyra e Avokatit të Popullit është e gatshme të bashkëpunojë për këtë çështje me ekspertët e Ministrisë së Drejtësisë dhe të administratës së burgjeve.

Duke besuar në mirëkuptimin Tuaj,