Më 20 Gusht 2008, Avokati i Popullit, z. Ermir Dobjani ka marrë një letër nga një grup të burgosurish Shqiptarë që vuajnë dënimet e tyre në burgun e Patras, në Greqi.

Kështu, katër qytetarë shqiptarë, identitetin e të cilëve nuk e bëjmë të njohur për arsye mbrojtjeje, gjate muajit Gusht 2008, kanë parashtruar pranë Institucionit të Avokatit të Popullit shqetësimin e tyre “për mosrespektimin nga drejtësia Greke të të drejtave të njeriut”, referuar kjo proceseve gjyqësore dhe masave ndëshkuese selektive që drejtësia greke aplikon ndaj tyre.

Në përmbajtje të kërkesave të parashtruara në letër, ankuesit kanë kërkuar “t’u jepet fund të gjitha formave të diskriminimit, vetëm e vetëm për faktin e mbajtjes prej tyre të kombësisë shqiptare, të shprehura këto në dënime të tilla që kapin vlera maksimale në krahasim me ato që jepen për shtetasit Grekë”.

Duke reaguar ndaj këtij shqetësimi, Zyra e Avokatit të Popullit ia ka përcjellë atë Presidentit të Republikës dhe Qeverisë Shqiptare, Ambasadorit shqiptar në Greqi dhe Ambasadorit Grek në Shqiperi si dhe Ombudsmanit Grek në Athine, duke u bashkengjitur edhe nga një kopje të letrës në fjalë, por duke ruajtur edhe identitetin e ankuesve.

Avokati i Popullit synon arritjen e një sensibilizimi të mëtejshëm rreth këtij problemi, me qëllim që kjo kategori personash të mund të gëzojë në praktikë një trajtim të barabartë me shtetasit grekë.

Të burgosurit shqiptarë të Patras kanë kërkuar njëkohësisht që veprimet e Avokatit të Popullit t’u bëhen të njohura atyre dhe opinionit publik përmes medias, dhe konkretisht me anë të gazetës “Shekulli”.

Me këtë rast, Zyra e Avokatit të Popullit i siguron ata se do të jetë në ndjekje të shqetësimit të tyre dhe për asnjë çast nuk do të reshtë së trajtuari këtë problem, gjatë gjithë veprimtarisë së saj në vazhdimësi.