Të nderuar zotërinj Ministra!

Mbi bazën e ankesave të disa të burgosurve që qëndrojnë për periudha të gjata kohore në dhomat e izolimit, Institucioni i Avokatit të Popullit ndërmorri një proces hetimi. Për të mësuar shkaqet e gjendjes janë kërkuar shpjegime me shkresën tonë nr.175 dt.30.03.2001, (lidhur me ndryshimin e vartësisë të dhomave të izolimit nga Ministria e Rendit Publik në Ministrinë e Drejtësisë). Ky ndryshim është përcaktuar edhe në Vendimin e Këshillit të Ministrave nr.384 dt.28.07.1999 që bën fjalë për disa masa për fuqizimin e rendit dhe të sigurisë publike.

          Megjithëse nga dita e kërkimit të këtyre shpjegimeve, ka kaluar një kohë shumë e gjatë, nuk na është kthyer akoma përgjigje zyrtare, duke na vënë në vështirësi për t’ju përgjigjur ankesës së të burgosurve.

Në funksion të zgjidhjes së këtij problemi, si dhe pasjes së marrëdhënieve korekte midis Institucioneve tona, është emergjente marja e masave përkatëse si dhe kthimi i përgjigjes të shkresës sonë të sipërcituar, pa vonesa të mëtejshme. Lutemi te mbani parasysh pikën 4 të nenit 63 të Kushtetutës së Republikës së Shqipërisë që thotë se: “Organet dhe funksionarët publikë janë të detyruar ti paraqesin Avokatit të Popullit të gjitha dokomentat dhe informacionet e kërkuara prej tij”.

Duke neglizhuar rastin, shprehim besimin për bashkëpunimin tuaj.

Bashkëlidhur një kopje e shkresës Nr.175 dt.30.03.2001.

                                                         Me respekt

AVOKATI  I  POPULLIT

       Ermir  DOBJANI