Më lejoni të vëmë në vëmendjen Tuaj dhe t’ju shkruajmë për një çështje e cila rezulton e zvarritur, mendojmë më tepër për shkak të moskuptimit të ligjit dhe zvarritje të pakuptimta të personave përgjegjës në stafin tuaj që janë marrë me këtë çështje.

Në vijim të korespondencës tonë me Ministrinë e Drejtësisë për problemin e shtetasve shqiptar të dënuar në Greqi dhe që vuajnë dënimet në Shqipëri, dhe    për të realizuar rekomandimin e institucionit Tuaj ardhur me shkresn nr.6116/1 datë  26.10.2004 që institucioni ynë t’i propozojë vetë direkt Presidentit të Republikës faljen e të dënuarve përkatës kur është rasti, na nevojiten disa të dhëna që duhet të na i dërgojë Drejtoria e Bashkëpunimit Gjyqësor Ndërkombëtar.

Kështu lutemi të na dërgohet lista e shtetasve shqiptar të dënuar në Greqi, dhe që janë ekstraduar nga Greqia në Shqipëri dhe që aktualisht janë duke vuajtur denimin penal në burgjet shqiptare si dhe vendimet e plota të gjykatave greke të përkthyera në gjuhën shqipe të cilat duhet të ndodhen në dosjet gjyqësore në gjykatat tona ku është bërë njohja e vendimeve të gjykatave greke. Pas këtyre të dhënave dhe vetëm pasi të studjojmë vendimet e plota të gjykatave greke, të përkthyera në gjuhën shqipe, ne do të mund të konkludojmë nëse ekzistojnë kushtet për të bërë propozime për falje.

          Këtë kërkesë e bazojmë në pikën 4 të nenit 63 të Kushtetutës së Republikës së Shqipërisë, ku përcaktohet se:

“Organet dhe funksionarët publikë janë të detyruar t’i paraqesin Avokatit të Popullit të gjitha dokumentet dhe informacionet e kërkuara prej tij”.

Gjithashtu në nenin 13  të Ligjit nr.8454 dt.04.02.1999 “Për Avokatin e Popullit” të ndryshuar me Ligjin nr.9398 datë 12.05.2005 përcaktohet se:

“Avokati i Popullit fillon procedurën e shqyrtimit të çështjes kur vëren ose dyshon se ka ndodhur një shkelje e së drejtës, në bazë të ankesës apo të kërkesës së personit të interesuar ose të dëmtuar, si dhe me nismën e vet, për raste të veçanta të bëra publike, por me pëlqimin e të interesuarit ose të dëmtuarit.

           Në rastet kur Avokati i Popullit fillon proçedurën e shqyrtimit të çështjes me nismën e vet, dhe kur kujdestari ose përfaqësuesi i tij ligjor nuk vepron, nuk kërkohet pëlqimi i të dëmtuarit kur është i mitur apo i paaftë mendërisht apo me aftësi të kufizuara ose për mbrojtjen e të drejtave të një numri të madh të individëve.

           Në mbrojtje të interesave të një komuniteti të gjërë, të cilët mund të preken nga proçedimi administrativ, Avokati i Popullit ka të drejtë të fillojë një proçedim administrativ dhe të marrë pjesë në të, në përputhje me kërkesat e Kodit të Proçedurës Administrative”.

           Kërkesa jonë është e bazuar gjithashtu edhe në gërmën “b” të nenit 19 të Ligjit Nr. 8454 datë 04.02.1999 “Për Avokatin e Popullit” të ndryshuar ku thuhet se:

           “Avokati i Popullit ka të drejtë të kërkojë shpjegime nga çdo organ i administratës qëndrore dhe vendore, si dhe të marrë çdo dosje apo material  që ka lidhje me hetimin”.

Duke ju falenderuar për mirëkuptimin dhe bashkëpunimin Tuaj, lutemi të na dërgohen të dhënat e kërkuara sa më parë të jetë e mundur.

                                                           Me respekt

AVOKATI  I  POPULLIT

        Ermir  DOBJANI